Le péepenoʼoboʼ utiaʼal u xikʼnaloʼobeʼ kʼaʼabéet u yáax chokotal u xiichʼel u xiikʼoʼob yéetel u juul le Kʼiinoʼ. Wa nookoyeʼ ku xáantal táan u pʼáatik u chokotaloʼob, baʼaleʼ u péepenil le repollooʼ séeb u káajal u xikʼnal kex nookoy. ¿Bix u beetik?

 Tuukulnen tiʼ lelaʼ: Yaʼab péepenoʼobeʼ táanil tiʼ u káajal u xikʼnaloʼobeʼ ku yantaloʼob tuʼux choko Kʼiin, baʼaleʼ yanoʼobeʼ ku nupikoʼob u xiikʼoʼob yéetel uláakʼoʼobeʼ ku láaj xitʼkoʼob. Chéen baʼaleʼ u péepenil le repollooʼ ku tsʼáaik u xiikʼoʼob bey u formail junpʼéel xaʼaycheʼeʼ, mix jach xiitʼiliʼ, mix jach nuupʼliʼ. Le científicoʼoboʼ tsʼoʼok u yilkoʼobeʼ le bix u tsʼáaik u xiikʼoʼoboʼ ku yáantaj utiaʼal ka séeb chokochajak le xiichʼoʼob yanoʼob tu kaʼanlil u puʼuchoʼ.

 Jujuntúul máaxoʼob ku xookoʼob tiʼ junpʼéel universidad yaan Inglaterraeʼ (Universidad de Exeter), tu yiloʼob wa jeʼel u maas maʼalobtal bix u meyaj le paneles solares wa ku tsʼáaikoʼob jeʼex u tsʼáaik u xiikʼ le péepenaʼ. Le ka tu beetoʼobeʼ tu yiloʼobeʼ u dobleil corriente ku yantal.

 Le científicoʼoboʼ tu yiloʼob xaneʼ u xiikʼ le péepenoʼobaʼ jach maʼalob bix beetaʼanikoʼob tumen ku paklan julikubaʼob utiaʼal u maas séeb chokotaloʼob. Le oʼolaleʼ tu beetoʼob le paneles solares jeʼex u tsʼáaik u xiikʼ le péepenoʼoboʼ. Úuchik u beetkoʼob lelaʼ tu yiloʼobeʼ maas maʼalobchaj u meyajoʼob yéetel maas sáalchajoʼob. Yoʼolal lelaʼ le profesor Richard ffrench-Constantoʼ tu yaʼaleʼ u péepenil le repollooʼ jach maʼalob bix u aprovechartik u juul le Kʼiinoʼ.

 Techeʼ, ¿bix a wilik? ¿Chéen wa bey anchajik u péepenil le repollooʼ?