Yaan u kʼuchul u kʼiinileʼ a paalaleʼ yaan u aktáantkoʼob wa baʼax ken u beet u lúubul u yóoloʼob. ¿Baʼax jeʼel a beetik utiaʼal a wáantkoʼobeʼ?

•  Le baʼax unaj a wojéeltikoʼ

•  Le baʼax unaj a beetkoʼ

 Deporsi ku beetik máak baʼax maʼ maʼalob yaan horaiʼ. Le Bibliaoʼ ku yaʼalikeʼ «tuláakloʼon k-tʼóochpajal yaʼab u téenel» (Santiago 3:2). Chéen baʼaleʼ le baʼaloʼob maʼ maʼalobtak ku beetik le paalaloʼoboʼ ku yáantkoʼob utiaʼal ka u kan u aktáantoʼob le baʼaxoʼob ku yúuchultiʼoboʼ. Lelaʼ jujunpʼíitil ken u kan u beetoʼob. Laura, juntúul maamatsileʼ, ku yaʼalik: «Teen yéetel in wíichameʼ tsʼoʼok k-tsʼáaik cuenta maas maʼalob ka u yil k-paalal u aktáantkoʼob baʼax ku yúuchultiʼob ke ka u beetoʼob bey mix baʼal uchaʼaneʼ. Beyoʼ maʼ tun lúubul u yóoloʼob wa maʼ jach maʼalob u bintiʼobiʼ».

 Yaʼab mejen paalaloʼobeʼ maʼ u yojloʼob u aktáantoʼob baʼax ku yúuchultiʼobiʼ. Yaan horaeʼ lelaʼ ku yúuchul tumen letiʼe taatatsiloʼob utskíintik le baʼaxoʼob ku beetkoʼoboʼ. Jeʼex wa maʼ maʼalob jóokʼik u calificaciónoʼobeʼ ku yaʼalikoʼobeʼ u culpa le maestrooʼ. Wa xan ku baʼateloʼob yéetel u yéet xookoʼobeʼ ku yaʼalikoʼobeʼ maʼ tiʼ u hijoʼob yanchaj u culpailiʼ.

 Chéen baʼaleʼ, ¿bix kun kaanbal u paalaloʼob wa maʼ tu kaʼanskoʼob u yutskíintoʼob baʼax ku beetkoʼob?

•   Kaʼans tiʼ a hijo jeʼel u bin kʼaasil tiʼ wa yaan baʼax maʼ maʼalob ku beetkiʼ

   Le Bibliaoʼ ku yaʼalik: «Jeʼel baʼaxak ka u pakʼ máakeʼ le xan ken u joche» (Gálatas 6:7).

   Wa ku beetik máak baʼax kʼaaseʼ yaan xan u bin kʼaasil tiʼ. Le mejen paalaloʼoboʼ unaj u naʼatkoʼobeʼ jeʼel u bin utsil tiʼob wa kʼaasil tiʼob yoʼolal baʼaxoʼob ku beetkoʼobeʼ. Tu lugar a waʼalik tiʼ yaanal máax yaan u culpaileʼ chaʼa u yilik a paalal baʼax problemail tu taasaj le baʼax tu beetoʼ. Kéen a beeteʼ chʼaʼ en cuenta jaypʼéel años yaantiʼ. Áant u yiloʼobeʼ tuláakal baʼax maʼ maʼalob ku beetik máakeʼ ku muʼyajtik kéen tsʼoʼokok.

•   Áant a paalal u yiloʼob bix jeʼel u yutskíintikoʼob baʼax úucheʼ

   Teksto jeʼel u yáantajeʼ: «Juntúul utsul máakeʼ jeʼel u lúubul siete u téeneleʼ, pero yaan u kaʼa líikʼil» (Proverbios 24:16).

   Kex ku yaatal u yóol máak kéen u beet baʼax maʼ maʼalobeʼ maʼ u kʼáat u yaʼal wa tsʼoʼok tiʼ beyoʼ. Áant a paalal utiaʼal maʼ u yilik chéen le baʼax kʼaas tsʼoʼok u yúuchultiʼoʼ baʼaxeʼ ka u yil bix jeʼel u yutskíintikeʼ. Jeʼex wa maʼ tu máansaj u exameneʼ áant u yileʼ utiaʼal u maas jóoʼsik maʼalob calificaciónoʼobeʼ unaj u maas xook, beyoʼ tuláakʼeʼ maas maʼalob kun bintiʼ (Proverbios 20:4). Wa a hija ku baʼateʼel yéetel u amigaeʼ, kex maʼ tiʼ letiʼ yanchaj u culpaileʼ, áant u yil kʼaʼabéet u tʼaan tu yéetel (Romanos 12:18; 2 Timoteo 2:24).

•   Kaʼans tiʼ a paalal maʼ tuláakal baʼal kun jóokʼol maʼalobil tiʼiʼ

   Le Bibliaoʼ ku yaʼalik: «Kin waʼalik tiʼ cada juntúul tiʼ teʼexeʼ maʼ unaj u tuklik u maasil tiʼ le unaj u tuklik tu yoʼolaloʼ» (Romanos 12:3).

   Maʼ a waʼalik tiʼ a hijo jach maʼalob u beetik tuláakal baʼal. Lelaʼ maʼ maʼalobiʼ tumen tak le máaxoʼob jach maʼalob u calificaciónoʼoboʼ yaan horaeʼ ku bin kʼaasil tiʼob tu examenoʼob. Tsʼoʼoleʼ tak le máaxoʼob jach maʼalob u báaxtikoʼob junpʼéel deporteoʼ yaan horaeʼ ku perderoʼob. Le paalaloʼob maʼ tu tuklikoʼob wa maas maʼaloboʼob tiʼ u maasiloʼ maʼ tu séeb lúubul u yóoloʼob.

   Le Bibliaoʼ ku yaʼalikeʼ le baʼaxoʼob ku muʼyajtik máakoʼ ku yáantik utiaʼal u aktáantik le baʼaxoʼob ku yúuchultiʼoʼ (Santiago 1:2-4). Yaan horaeʼ ku yaatal u yóol máak tumen maʼ tu jóokʼol maʼalob baʼax ku beetik, le oʼolaleʼ áant a paalal utiaʼal maʼ u lúubul u yóoloʼob.

   U jaajileʼ yaan u bisik yaʼab tiempo yéetel yaan u kʼaʼabéettal u chúukpajal a wóol utiaʼal a kaʼansik tiʼ a paalal u aktáantoʼob baʼax ku yúuchultiʼob. Chéen baʼaleʼ kéen nojochchajkoʼobeʼ yaan a wilik maʼ chéen kunel úuchik a kaʼanskoʼobiʼ. Junpʼéel libro ku tʼaan tiʼ u kaʼansaʼal yéetel yaabilaj le paalaloʼoboʼ ku yaʼalik: «Le paalaloʼob u yojloʼob u aktáant baʼax ku yúuchultiʼoboʼ maases maʼatech u yoksikubaʼob ich problemas kéen chiʼichnakchajkoʼob. Baʼaxeʼ maas ku kʼantal u tuukuloʼob» (Letting Go With Love and Confidence). Tsʼoʼoleʼ maʼ unaj k-tuʼubsikeʼ lelaʼ láayliʼ yaan u yáantkoʼob kéen nojoch máakchajkoʼobeʼ.

 Beet lelaʼ: Wa ku yilik a paalal a wojel a aktáant baʼax ku yúuchultecheʼ letiʼob xaneʼ bey ken u beetiloʼoboʼ.