Johneʼ ku yaʼalik: «Le máaxoʼob tsʼokaʼan u beeloʼoboʼ sáamsamal ku kʼaʼabéettal u yeʼeskoʼob paciencia. Maʼ xaaneʼ le máax maʼ tsʼokaʼan u beeloʼ maʼ jach kʼaʼanaʼan u yilkiʼ, chéen baʼaleʼ jach táaj kʼaʼabéet utiaʼal le máaxoʼob tsʼokaʼan u beeloʼoboʼ».

•  ¿Baʼaxten unaj a weʼesik paciencia?

•  ¿Baʼax jeʼel u yáantkech a weʼes pacienciaeʼ?

•  Jach kʼaʼanaʼan u yeʼesaʼal paciencia

•   Le máax tsʼokaʼan u beeloʼ maas séeb u yilik le baʼax maʼ maʼalob ku beetik u núupoʼ.

   Jessenaeʼ ku yaʼalik: «Kéen máanak kʼiin tsʼokaʼan a beeleʼ maas séeb a wilik le baʼaloʼob maʼ maʼalobtak ku beetik a núupoʼ. Kéen úuchuk leloʼ ku maas talamtal a weʼesik paciencia».

•   Wa maʼ ta weʼesik pacienciaeʼ jeʼel a waʼalik baʼaloʼob maʼ unajeʼ.

   Carmeneʼ ku yaʼalik: «Yaan kʼiineʼ séeb in waʼalik baʼax kin tuklik. Wa ka in weʼes pacienciaeʼ míin maas jeʼel in tuklik baʼax ken in waʼaleʼ, wa maʼ xaaneʼ jeʼel in pʼatik chéen beyoʼ».

   Le Bibliaoʼ ku yaʼalik: «Le máax yaan u yaabilajeʼ yaan u paciencia yéetel ku yeʼesik u yutsil» (1 Corintios 13:4). Le máaxoʼob u yaabiltmubaʼoboʼ maas unaj u yeʼeskoʼob paciencia, chéen baʼaleʼ yaan kʼiineʼ maʼ bey u yúuchliʼ. John, le máax tsʼoʼok k-yáax aʼalikoʼ, ku yaʼalik: «Yaan kʼiineʼ séeb u pʼáatal minaʼan u paciencia máak. Le oʼolaleʼ kʼaʼabéet u tsʼáaik u yóol máak u yeʼese».

•   Kéen jáan úuchuk wa baʼax.

   Baʼax jeʼel u yúuchleʼ: A núupeʼ ku yaʼalik junpʼéel baʼal ku beetik u yaatal a wóol le oʼolal ku taaktal a sutik u jeel tiʼ.

   Teksto jeʼel u yáantajeʼ: «Maʼ a séeb pʼuʼujul, tumen le máaxoʼob ku pʼuʼujuloʼoboʼ minaʼan u naʼatoʼob» (Eclesiastés 7:9).

   Beet lelaʼ: Maʼ a séeb núukik. Tukulteʼ maʼ u yóoliliʼ a núup u beetik u yaatal a wóoliʼ. Junpʼéel libroeʼ ku yaʼalik: «Yaan kʼiineʼ jeʼel k-tuukul kʼaas yoʼolal wa baʼax tu yaʼalaj k-núupeʼ, pero u jaajileʼ maʼ t-naʼataj le baʼax tu yaʼaloʼ» (libro Fighting for Your Marriage [Maʼ a jáan tuklik a pʼatik a núup]).

   Tsʼoʼoleʼ kex wa u yóoliliʼ a núup u yaʼaliktech baʼaleʼ, eʼes paciencia yéetel maʼ a sutik u jeel, beyoʼ maʼ tun maas nojochtal le problemaoʼ. Le Bibliaoʼ ku yaʼalik: «Tuʼux minaʼan siʼeʼ ku tuʼupul le kʼáakʼoʼ» (Proverbios 26:20).

   Ethaneʼ ku yaʼalik: «Wa ku káajal a tuklik u pʼekmech a wataneʼ, tukult baʼaxten a yaabiltmaj yéetel beet wa baʼax jatsʼuts u yilik letiʼ».

   Tukulte:

  •  ¿Baʼax ka beetik kéen u yaʼal wa ken u beet a núup junpʼéel baʼal maʼ uts ta tʼaaniʼ?

  •  ¿Bix jeʼel a maas eʼesik paciencia kéen kaʼa úuchuk leloʼ?

•   Wa mantatsʼ ku beetik a núup junpʼéel baʼax a pʼeek.

   Baʼax jeʼel u yúuchleʼ: Techeʼ cada táan a tsʼíikil tumen a núupeʼ jach junpuliʼ maʼ tu lepʼik u yóol.

   Teksto jeʼel u yáantajeʼ: «Seguernak a muʼyajtikabaʼex ta baatsileʼex yéetel a perdonarkabaʼex ta baatsileʼex yéetel u jaajil a wóoleʼex» (Colosenses 3:13).

   Beet lelaʼ: Ilawil a kaxtik u yutsil a núup, maʼ a tuukul chéen ta woʼolal. Tukulte: «Wa mantatsʼ kin tuukul tiʼ le baʼax maʼ maʼalob ku beetik in núupoʼ, ¿jeʼel wa u maas yantal problemas ichiloʼoneʼ? Tsʼoʼoleʼ le Bibliaoʼ ku yaʼalikeʼ «tuláakloʼon k-tʼóochpajal yaʼab u téenel» (Santiago 3:2). Lelaʼ u kʼáat u yaʼaleʼ tak teech beetik baʼax maʼ maʼalob yaan kʼiiniʼ.

   Niaeʼ ku yaʼalik: «Yaan kʼiineʼ maas kin weʼesik paciencia tiʼ in amigoʼob ke tiʼ in wíicham. Como maas yaʼab tiempo kin máansik tu yéeteleʼ, maas kin wilik le baʼax maʼ maʼalob ku beetkoʼ. Chéen baʼaleʼ wa kin weʼesik paciencia tiʼ in wíichameʼ, yaan in weʼesik xan in yaabiltmaj yéetel kin respetartik. Le oʼolaleʼ jach kʼaʼabéet u yeʼesaʼal le jatsʼuts modosaʼ».

   Tukulte:

  •  ¿Ka weʼesik wa paciencia kéen u beet baʼax maʼ maʼalob a núupiʼ?

  •  ¿Baʼax jeʼel u páajtal a beetik utiaʼal a maas eʼesik pacienciaeʼ?