Yaʼab máaxoʼob tsʼokaʼan u beeloʼobeʼ maʼ suukaʼan u múul tsikbaloʼobiʼ, kex kulaʼanoʼobeʼ maʼ chéen chʼaʼabil u jóoʼskoʼob tiempo utiaʼal u múul tsikbaloʼobiʼ. ¿Baʼaxten bey u yúuchultiʼoboʼ?

•  Hasta bey maʼ u kʼaj óoltmubaʼobeʼ, ¿baʼaxten bey u yúuchultiʼoboʼ?

•  Le baʼax unaj a beetkoʼ

•  Baʼax ku yaʼalik uláakʼ máaxoʼob tsʼokaʼan u beeloʼob

•  Utiaʼal a múul tsikbaltikeʼex

•   «Jach kaʼanaʼanoʼon»

   Annaeʼ ku yaʼalik: «Kex yaantoʼon tiempo utiaʼal k-tsikbaleʼ yaan horaeʼ jach kaʼanaʼanen wa maʼeʼ letiʼ jach kaʼanaʼan. Tsʼoʼoleʼ wa kaʼanaʼaneneʼ jach séeb in pʼuʼujul yoʼolal jeʼel baʼalakeʼ le óolal maases chéen k-chaʼantik tele».

•   «Le tecnologíaoʼ ku beetik k-perdertik yaʼab tiempo»

   Katherineʼ ku yaʼalik: «Le Internet yéetel le redes socialesoʼ jeʼel u beetik k-perdertik yaʼab tiempoeʼ. Yaan horaeʼ maʼatech in tsikbal yéetel in wíicham tumen maas yaʼab tiempo táan u meyajten Internet. Yaan kʼiineʼ hasta táanxel cuarto k-wenel».

•   «Maʼ igual yéetel baʼax k-náaysik k-óoliʼ»

   Janeeʼ ku yaʼalik: «Kéen suunak in wíicham tu meyajeʼ uts tu tʼaan u beetik uláakʼ baʼaloʼob utiaʼal u náaysik u yóol. Maʼ in pʼeekiʼ tumen kin naʼatik jach yaʼab u meyaj, pero maas maʼalob wa ka u máans tiempo tin wéetel».

•   «Chéen meyaj k-sen beetik»

   Marke’ ku yaʼalik: «Tak le tiaʼanen tin wotochoʼ chʼiikilen meyaj. Tu lugar in máansik tiempo yéetel in wataneʼ chéen táan in núukik le mensajeʼob yéetel le correoʼob yaan yil yéetel in meyajoʼ».

•   Jóoʼseʼex tiempo utiaʼal a múul beetkeʼex wa baʼax.

   Teksto jeʼel u yáantajeʼ: Unaj «a jach ilkeʼex máakalmáak le baʼaloʼob maas kʼaʼanaʼantakoʼ» (Filipenses 1:10).

   Tukult lelaʼ: Le baʼaxoʼob ka beetkeʼexoʼ, ¿ku yeʼesik wa maas kʼaʼanaʼan a wilik a máansik tiempo yéetel a núup ke a meyaj wa a beetik uláakʼ baʼaloʼob uts ta wich? ¿Ku conformar wa a núup yéetel le tiempo ku sobrartechoʼ?

   Beet lelaʼ: Ilawil a jóoʼskeʼex tiempo utiaʼal a beetkeʼex baʼax maas uts ta tʼaaneʼex yéetel a núupeʼex.

   Annaeʼ ku yaʼalik: «Jach ku kiʼimaktal in wóol kéen in wil ku jóoʼsik tiempo in wíicham utiaʼal k-múul beetik wa baʼax. Kin wuʼuyik jach u yaabiltmen yéetel kin wilik jach uts tu tʼaan u máansik tiempo tin wéetel. Leloʼ ku beetik in maas yaabiltik».

•   Kanáant maʼ u meyajtech láalaj hora a celular wa a tablet.

   Teksto jeʼel u yáantajeʼ: «Tuláakal baʼal yaan u súutukil» (Eclesiastés 3:1).

   Tukult lelaʼ: Wa a jóoʼsmaj tiempo utiaʼal a máans yéetel a núupeʼ, ¿láalaj hora wa táan a núukik le mensajeʼob wa le correoʼob ku túuxtaʼaltechoʼ?

   Beet lelaʼ: Suukchajak a múul janaleʼex yéetel ilawil maʼ u meyajteʼex a celulareʼex teʼ súutukiloʼ. Aprovecharteʼex u yorail le janal utiaʼal a tsikbaltikeʼex le baʼaxoʼob ku yúuchulteʼexoʼ.

•   Wa ku béeytaleʼ, ilawil a paklan áantkabaʼex.

   Teksto jeʼel u yáantajeʼ: «Maas maʼalob kaʼatúul ke chéen juntúul, tumen maas ku bin utsil tiʼob yoʼolal le meyaj ku beetkoʼoboʼ» (Eclesiastés 4:9).

   Tukult lelaʼ: ¿Jaytéen ka bin maan wa ka bin a beet uláakʼ baʼal chéen ta juunal?

   Beet lelaʼ: Suukchajak a múul meyajeʼex, tak tiʼ baʼaloʼob chéen juntúul jeʼel u páajtal u beetkeʼ. Ilawil a paklan áantkabaʼex mantatsʼ.

   Ninaeʼ ku yaʼalik: «K-bin maan, k-pʼoʼik trastes, k-pakik nookʼ, k-páak wa k-míistik le terrenooʼ ku yáantaj utiaʼal k-múul meyaj. K-beetik le meyajoʼobaʼ jach ku yáantaj utiaʼal k-maas bisikba».

•    Naʼat yaan baʼaxoʼob maʼ kun páajtal u beetik a núup.

   Teksto jeʼel u yáantajeʼ: «Tuláakal máak unaj u yojéeltik bukaʼaj utsil a puksiʼikʼaleʼex» (Filipenses 4:5).

   Tukult lelaʼ: ¿Bix jeʼel a weʼesik ka naʼatik baʼaxoʼob ku béeytal u beetik a núupeʼ?

   Beet lelaʼ: Tsikbalteʼex baʼax ku béeytal u beetik cada juntúul yéetel bix jeʼel a weʼeskeʼex a wutsileʼexeʼ. Chʼaʼtukleʼex bey baʼaxoʼob jeʼel u páajtal a beetkeʼexeʼ yéetel baʼax kʼiin ken a beeteʼex. Beyoʼ tu kaʼatúulaleʼex kun kiʼimaktal u yóol.

   Danielaeʼ ku yaʼalik: «In wíichameʼ maʼatech u yuʼubik wa ku kaʼanal, yaʼab baʼaloʼob taak u beetik, pero teneʼ como kʼojaʼaneneʼ séeb in wuʼuyik in kaʼanal. Le oʼolal kin waʼaliktiʼ ka u beet le baʼaxoʼob uts tu yichoʼ, beyoʼ teneʼ ku béeytal in jeʼelel. K-ilkeʼ tu kaʼatúulaloʼon k-jóoʼsik u yutsil, letiʼeʼ ku beetik ejercicio yéetel teneʼ kin pʼáatal jeʼelel».

 Cada juntúul tiʼ teʼexeʼ u tukult bix jeʼel u núukik le baʼax ku kʼáataʼaloʼ, le kéen tsʼoʼokkeʼ ka múul tsikbaltikeʼex.

•    ¿Kin wilik wa in máansik tiempo yéetel in núup?

•   Tiʼ tuláakal le baʼaloʼob suuk in beetik yéetel in núupoʼ, ¿máakalmáak maas uts tin tʼaaniʼ?

•   ¿Bey baʼax uts ta tʼaan ka u beet a núup ta wéeteleʼ?

•   ¿Jaytéen tiʼ junpʼéel kʼiin ku saʼatal a wóol tumen táan u meyajtech a celular wa a tablet? ¿Ku pʼáatal wa maʼ ta wuʼuyik baʼax ku yaʼaliktech a núup tumen naayal a wóol le táan a usartik a celular wa a tabletoʼ?

•   ¿Bix jeʼel a weʼesik ka naʼatik baʼaxoʼob ku béeytal u beetik a núupeʼ?

•   ¿Baʼax jeʼel u páajtal a kʼexkeʼex tu séebaʼanil utiaʼal a maas máanskeʼex tiempo yéetel a núupeʼexeʼ?