Yaan taatatsiloʼobeʼ maʼ tu chaʼik tiʼ u paalal ka yanak u redes sociales tumen u yojloʼob jach peligroso. Pero wa teech ka chaʼik tiʼ a paalal ka yanak u redes socialeseʼ, ¿bix jeʼel a wáantkoʼob utiaʼal u kanik u usartoʼob tubeeleʼ?

Teʼ xookaʼ yaan k-tʼaan tiʼ lelaʼ:

•  ¿Jach wa chʼiikil a hijo chéen tiʼ u redes sociales?

•  ¿Bix u yuʼubikuba a hijo kéen u yil baʼax ku beetik u amigoʼob?

•  ¿Baʼaxoʼob ku beetik a hijo teʼ redes socialesoʼ?

•  Utiaʼal a múul tsikbaltikeʼex

 Le baʼax unaj a wojéeltikoʼ: Le redes socialesoʼ séeb u suut vicioil. Le oʼolal le taatatsiloʼoboʼ unaj u yilkoʼob bukaʼaj tiempo ku máansik u paalal teʼ redes socialesoʼ.

 Teksto jeʼel u yáantajeʼ:«Jach [ileʼex] máakalmáak le baʼaloʼob maas kʼaʼanaʼantakoʼ» (Filipenses 1:10).

 Tukult lelaʼ: ¿Jach wa ku yáakʼabtal táan u usartik le redes sociales a hijooʼ? ¿U conectarmuba wa teʼ redes sociales tu lugar u beetik u tarea wa u máansik tiempo yéetel u láakʼtsiloʼob? Le doctoroʼoboʼ ku yaʼalikoʼobeʼ le paalaloʼoboʼ kʼaʼabéet u weenloʼob nueve horas. Chéen baʼaleʼ tsʼoʼok u yilaʼaleʼ le máaxoʼob ku máanskoʼob yaʼab tiempo tu redes socialesoʼ menos tiʼ siete horas ku weenloʼob.

 Beet lelaʼ: Kéen tsikbalnakech yéetel a hijoeʼ aʼaltiʼ máakalmáak le baʼaloʼob maas kʼaʼanaʼantakoʼ. Aʼal xan tiʼ bukaʼaj utsil jeʼel u taasik wa ku kanik u tsʼáa u pʼiis le tiempo ku máansik teʼ redes socialesoʼ. Aʼaltiʼeʼ kéen horachajak u weenleʼ maʼ unaj u usartik u celulariʼ. Wa ka beetik beyaʼ yaan a wáantik a hijo u controlartuba. Le modos jeʼelaʼ yaan u yáantik tak kéen nojochchajak (1 Corintios 9:25).

 Le baʼax unaj a wojéeltikoʼ: Le paalaloʼoboʼ kéen u yiloʼob le fotoʼob yéetel le videoʼob ku naʼaksaʼal tumen u amigoʼoboʼ jeʼel u yaatal u yóoloʼobeʼ wa jeʼel tak u deprimiroʼobeʼ.

 Teksto jeʼel u yáantajeʼ: «Maʼ a tsʼíiboltkeʼex baʼax u tiaʼal u maasil» (1 Pedro 2:1).

 Tukult lelaʼ: ¿Bix u yuʼubikuba a hijo yoʼolal le fotoʼob ku naʼaksaʼal tumen u amigoʼob teʼ redes socialesoʼ? ¿Ku tuklik wa maas ku divertirkuba u maasil ke letiʼ?

 Beet lelaʼ: Tsikbalt yéetel a paalal baʼaxten maʼ maʼalob ka u comparartuba máak yéetel u maasiliʼ. Maʼ u tuʼubultecheʼ maas jeʼel u afectartaʼal le mejen x-chʼúupalaloʼoboʼ tumen letiʼobeʼ maas ku preocuparkubaʼob yoʼolal u yantal u amigaʼob wa u amigoʼob bey xan yoʼolal bix u yilaʼaloʼob. Jeʼel xan u páajtal a waʼalik tiʼ a paalaleʼ cada wa baʼax kʼiineʼ ka xuʼuluk u usartik u redes sociales. Jacob, juntúul táankelem xiʼipaleʼ, ku yaʼalik: «Tin desactivartaj junpʼéel tiempo in redes sociales, leloʼ jach tu yáanten in wil baʼax maas importante ichil in kuxtal. Joʼopʼ in beetik baʼaloʼob maʼalobtak tin woʼolal bey xan yoʼolal u maasil».

 Le baʼax unaj a wojéeltikoʼ: U meyaj tiʼ máak le redes socialesoʼ jeʼel u beetik u yoksikuba tiʼ problemaseʼ.

 Teksto jeʼel u yáantajeʼ: ‹Tseleʼex tiʼ teʼex tuláakal u jejeláasil kʼaakʼas kʼuuxilil, pʼujaʼanil, tsʼíikilil, awat tʼaan yéetel poochʼil. Baʼaxeʼ eʼes a wutsileʼex ta baatsileʼex› (Efesios 4:31, 32).

 Tukult lelaʼ: Le redes socialesoʼ, ¿tsʼoʼok wa u beetik u yoksikuba a hijo tiʼ problemas, tiʼ baʼateltʼaanoʼob wa tiʼ uláakʼ baʼaloʼob maʼ unajiʼ?

 Beet lelaʼ: Kaʼans tiʼ a hijo u yeʼes jatsʼuts modos tak teʼ redes socialesoʼ. Junpʼéel libroeʼ ku yaʼalik: «Kaʼans tiʼ a paalaleʼ jach junpuliʼ maʼ maʼalob ka u beet u kʼasaʼanil máakiʼ, mix tak teʼ redes socialesoʼ» (Digital Kids).

 Kʼaʼajaktecheʼ le redes socialesoʼ maʼ junpʼéel baʼax jach táaj kʼaʼabéet tiʼ máakiʼ yéetel maʼ tuláakal le taatatsiloʼob ku chaʼik ka usartaʼak tumen u paalaloʼoboʼ. Wa ka chaʼik tiʼ a hijo u yokol teʼ redes socialesoʼ kʼaʼabéet a wilik wa u yojel u controlart le tiempo ku máansikoʼ, wa u yojel u yéey tubeel u amigoʼob yéetel wa maʼ tu yokol u chaʼant baʼaloʼob kʼaastakiʼ.