Le máaxoʼob kaʼanchajaʼan u xookoʼoboʼ ku yaʼalikoʼobeʼ le máaxoʼob suuk u tsʼáaikoʼob graciasoʼ maas kiʼimak u yóoloʼob, maʼ tu jáan kʼojaʼantaloʼob, u yojel u aktáantoʼob le problemasoʼ, tsʼoʼoleʼ maʼalob u biskubaʼob yéetel u maasil. Robert Emmons, juntúul máax kaʼanchajaʼan u xookeʼ, ku yaʼalikeʼ le máax suuk u tsʼáaik u graciasiloʼ maas maʼ séebaʼan u tsʼíiboltik baʼax yaan tiʼ u maasiliʼ, maʼ tu jáan kʼuuxil yéetel maʼ tu creerkuba. a

 ¿Baʼax utsil ku taasik tiʼ le paalaloʼob u kaʼansaʼaloʼob u tsʼáaʼob graciasoʼ? Durante cuatro añoseʼ beetaʼab junpʼéel estudio yéetel 700 paalaloʼob yéetel ilaʼabeʼ le paalaloʼob kaʼansaʼanoʼob u tsʼáaʼob graciasoʼ maas maʼ tu beetkoʼob trampa teʼ exámenoʼoboʼ, maʼ tu drogarkubaʼob, maʼ tu káaltaloʼob yéetel maʼalob u biskubaʼob yéetel u maasil.

•   U tsʼaʼabal tiʼ le chan paal tuláakal baʼax ku kʼáatkoʼ. Yaʼab mejen paalaloʼobeʼ maʼ suuk u tsʼáaikoʼob graciasiʼ tumen ku tuklikoʼobeʼ deporsi kʼaʼabéet u tsʼaʼabaltiʼob tuláakal le baʼax ku kʼáatkoʼoboʼ.

   Teʼ kʼiinoʼobaʼ yaʼab máakoʼob bey xan u tuukuloʼoboʼ. Katherine, juntúul maamatsileʼ, ku yaʼalik: «Le yóokʼol kaabaʼ u kʼáat ka k-tukleʼ jeʼel u yantaltech tuláakal baʼax a kʼáateʼ. Le anuncioʼob ku máansaʼal teʼ televisiónoʼ bey u yaʼalikoʼoboʼ. Tsʼoʼoleʼ ku yaʼalikoʼobeʼ táanil tiʼ toʼon unaj u yantal».

•   Kaʼans u tsʼáaʼob gracias desde tu chichniloʼob. Kaye, juntúul maamatsileʼ, ku yaʼalik: «Le paalaloʼoboʼ séebaʼan u kaanbaloʼob, le oʼolal maas maʼalob ka kaʼansaʼakoʼob desde tu chichniloʼob. Wa ku beetaʼal beyaʼ bey jeʼex ka tsʼaʼabak u toj cheʼil junkúul chan pakʼal utiaʼal ka xiʼik tojeʼ».

•   Kaʼanseʼextiʼob baʼax unaj u yaʼalikoʼob. Kéen eʼesaʼak utsil tiʼ a paalal wa kéen siʼibiktiʼob wa baʼaxeʼ kaʼanstiʼob u tsʼáaʼob gracias. Jeʼex u bin u nojochtaloʼobeʼ bey kun bin u naʼatkoʼob baʼaxten unaj u tsʼáaikoʼob u graciasil tiʼ u maasil.

   Teksto jeʼel u yáantajeʼ: «Tsʼáaʼex [...] u graciasil tuláakal baʼal» (Colosenses 3:15).

   Jeffreyeʼ ku yaʼalik: «K-áabil yaan tres años tiʼeʼ mantatsʼ ku kʼáatik wa baʼax yéetel yaabilaj. Letiʼeʼ suuk xan u tsʼáaik u graciasil tumen letiʼe baʼax tu kanaj tiʼ u taataʼoboʼ. Yéetel le baʼax ku beetkoʼoboʼ táan u kaʼanskoʼob tiʼ u hijo u tsʼáa gracias».

•   Kaʼanseʼextiʼob baʼax unaj u beetkoʼob. Kéen siʼibik wa baʼax tiʼ a paalaleʼ jeʼel u páajtal a wáantkoʼob u beetoʼob junpʼéel tarjeta utiaʼal u tsʼáaikoʼob u graciasileʼ. Jeʼel u páajtal xan a waʼaliktiʼob ka u yáantechoʼob yéetel le meyajoʼob ka beetik ta wotochoʼ. Wa ka beetik beyoʼ yaan u yilkoʼob bukaʼaj meyaj ku beetaʼal ichil u yotoch máak yéetel yaan u kankoʼob u tsʼáaʼob u graciasil.

   Teksto jeʼel u yáantajeʼ: «Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax» (Hechos 20:35).

   Beverlyeʼ ku yaʼalik: «Yaan kaʼatúul k-paalal, letiʼobeʼ jach ku yáantajoʼob utiaʼal u yilaʼal baʼax kun jaantbil, ku cocinaroʼob yéetel ku beetkoʼob uláakʼ baʼaloʼob kʼaʼabéetoʼob ichil le najoʼ. Beyoʼ ku yilkoʼob tuláakal le meyaj k-beetik tu yoʼolaloʼoboʼ yéetel ku tsʼáaikoʼob u graciasil».

•   Kaʼanseʼextiʼob maʼ u creerkubaʼob. U kaʼansaʼal le paalaloʼob u tsʼáaʼob graciasoʼ bey jeʼex ka tsʼaʼabak junkúul chan pakʼal tiʼ maʼalob luʼumeʼ. Le paalaloʼob ku kaʼansaʼaloʼob u tsʼáaʼob graciasoʼ ku kankoʼob maʼ tuláakal baʼax jeʼel u páajtal u beetkoʼob tu juunaloʼobeʼ, le oʼolal le kéen áantaʼakoʼobeʼ jach ku tsʼáaikoʼob u graciasil.

   Teksto jeʼel u yáantajeʼ: «Yéetel kabal óolaleʼ ileʼex u maasil bey maas importanteʼob ke teʼexeʼ. Tsʼoʼoleʼ maʼ a kaxtikeʼex chéen a wutsileʼex, baʼaxeʼ kaxteʼex u yutsil u maasil» (Filipenses 2:3, 4).

   Tamaraeʼ ku yaʼalik: «Yaan kʼiineʼ kéen cenarnakoʼoneʼ k-báaxtik junpʼéel báaxal. Cada juntúul tiʼ toʼoneʼ unaj u tsʼáaik u graciasil yoʼolal junpʼéel wa baʼax. Leloʼ ku yáantkoʼon utiaʼal maʼ k-kaxtik chéen k-utsil, baʼaxeʼ ka k-tsʼáa u graciasil tiʼ u maasil yoʼolal baʼax ku beetkoʼob t-oʼolaloʼ».

 Beet lelaʼ: Suukchajak a tsʼáaik u graciasil tiʼ a paalal bey xan tiʼ u maasil yoʼolal baʼax ku beetkoʼob ta woʼolal. Wa teech ka beetik beyoʼ a paalaleʼ yaan xan u kankoʼob u tsʼáaʼob u graciasil.