•   Techeʼ suuk a jáajan chʼaʼtuklik a beetik baʼaloʼob, pero a núupeʼ suuk u planeartik tuláakal baʼax ku beetik.

•   Techeʼ jach tranquilaech yéetel casi maʼatech a tʼaan, chéen baʼaleʼ a núupeʼ séeb u tsikbal yéetel ojéelaʼan jatsʼuts u yilik u divertirkuba.

 Tiʼ le modos ku yeʼesik a núupoʼ, ¿yaan wa junpʼéel maʼ jatsʼuts a wilkiʼ? Wa ka tratartik a kʼexik u modos a núupeʼ jeʼel u yantal problemas ichileʼexeʼ. Le Bibliaoʼ ku yaʼalik: «Le máax maʼ tu xuʼulul u tʼaan tiʼ junpʼéel baʼaleʼ ku náachkuntik tak le jach amigoʼoboʼ» (Proverbios 17:9).

 Tu lugar a sen discutir yéetel a núup yoʼolal u modoseʼ maas maʼalob ka a wil u ventajasil.

Teʼ xookaʼ yaan k-ilik:

•  Ilawil u ventajasil le modos yaantiʼoʼ

•  Baʼax ku yaʼalik uláakʼ máaxoʼob tsʼokaʼan u beeloʼob

•  Utiaʼal a múul tsikbaltikeʼex

 Kex yaan junpʼéel modo maʼ jatsʼuts a wilik tiʼ a núupeʼ, maʼ xaaneʼ maʼ tsʼáa cuenta wa yaan u ventajasiliʼ. Koʼoneʼex ilik óoxpʼéel ejemplo ku yeʼesik leloʼ:

 «In wíichameʼ jach ku xáantal táan u líiʼskuba wa xaan utiaʼal u beetik uláakʼ baʼaloʼob, chéen baʼaleʼ jach ku yeʼesik paciencia tiʼ teen bey xan tiʼ u maasil. Yaan horaeʼ kéen in wil xaan u beetik wa baʼaxeʼ ku molestarken, chéen baʼaleʼ kin kʼaʼajsikeʼ leloʼ junpʼéel tiʼ le baʼaxoʼob beet u tsʼoʼokol in beel tu yéeteloʼ» (Chelsea).

 «In wataneʼ suuk u planeartik jach tuláakal baʼax ku beetik, tumen beyoʼ ku yuʼubikuba segura, chéen baʼaleʼ yaan kʼiineʼ leloʼ jach ku desesperarken. Pero tsʼoʼok in wilkeʼ leloʼ yaan u ventajasil tumen beyoʼ preparadoʼon utiaʼal jeʼel baʼalak ka úuchkeʼ» (Christopher).

 «Yaan horaeʼ jach kin desesperar tumen kin tuklikeʼ in wíichameʼ chéen táan u yilik baʼaxoʼob ku yúuchul. Chéen baʼaleʼ kin kʼaʼajsik xaneʼ junpʼéel tiʼ le baʼaxoʼob beet u tsʼoʼokol in beel tu yéeteloʼ letiʼe in wilik bix u pʼáatal tranquiloil kéen úuchuk wa baʼaxoʼ. Leloʼ jach jatsʼuts in wilik tumen kex difícil le baʼax ku yúuchloʼ letiʼeʼ maʼatech u estresar» (Danielle).

 Chelsea, Christopher yéetel Danielleeʼ tu tsʼáajoʼob cuentaeʼ tiʼ le modos maʼ jatsʼutstak ku yilkoʼob tiʼ u núupoʼoboʼ tiʼ xan u taal le uláakʼ jatsʼuts modosoʼob ku yeʼesik u núupoʼob tiʼ uláakʼ súutukiloʼoboʼ. Wa ka waʼalik tiʼ a núup ka xuʼuluk u yeʼesik junpʼéel modos maʼ uts ta tʼaaneʼ yaan xan u xuʼulul u yeʼesik le uláakʼ modosoʼob jatsʼuts a wilkoʼ. Lelaʼ bey jeʼex ka a luʼs u táan u yich junpʼéel monedaeʼ, yaan u pʼaatal minaʼan u biilal.

 Chéen baʼaleʼ yaan jujunpʼéel modos ku yeʼesik máakeʼ junpuliʼ maʼ maʼalobtakiʼ, por ejemploeʼ le Bibliaoʼ ku yaʼalikeʼ: «Juntúul máax séeb u tsʼíikileʼ ku léeksik baʼateloʼob» (Proverbios 29:22). Wa bey k-modooʼ unaj k-ilik beetik le baʼax ku yaʼalik le Bibliaaʼ: ‹Tseleʼex tiʼ teʼex tuláakal u jejeláasil kʼaakʼas kʼuuxilil, pʼujaʼanil, tsʼíikilil, awat tʼaan yéetel poochʼil› a (Efesios 4:31).

 ¿Kux túun wa chéen teech maʼ jatsʼuts a wilik wa baʼax ku beetkiʼ? Le Bibliaoʼ ku yaʼalik: «Seguernak a muʼyajtikabaʼex ta baatsileʼex [...] kex wa yaan baʼax oʼolal u tʼaan máak tu contra uláakʼ» (Colosenses 3:13).

 Tsʼoʼoleʼ ilawil u ventajasil le modos maʼ uts ta tʼaan ku yeʼesik a núupoʼ, maʼ xaaneʼ hasta yaan a kʼaʼajsikeʼ letiʼe modos jatsʼutschaj a wilik tiʼoʼ. Joseph, juntúul máax tsʼokaʼan u beeleʼ, ku yaʼalik: «A chʼíikil a wil chéen le modos maʼ uts ta wich tiʼ a núupoʼ bey jeʼex ka chʼíikikech a wil chéen le yej yaan tu puntasil junpʼéel diamanteoʼ, wa ka beetik beyoʼ maʼ ten a tsʼáa cuenta bukaʼaj jatsʼutsil le diamanteoʼ».

 Cada juntúuleʼ tuukulnak tiʼ le preguntaʼobaʼ, tsʼoʼoleʼ ilawil a múul tsikbaltikeʼex.

•   ¿Yaan wa junpʼéel modo tiʼ a núup táan u beetik u yantalteʼex problemas? Wa yaneʼ, ¿máakalmáakiʼ?

•   ¿Jach wa tu jaajil grave wa chéen teech maʼ uts ta tʼaaniʼ?

•   ¿Yaan wa u ventajasil le modos yaantiʼoʼ? Wa beyoʼ, ¿máakalmáakoʼobiʼ yéetel baʼaxten jatsʼuts a wilik?