Yaʼab máakoʼobeʼ ku múul kajtaloʼob antes tiʼ u tsʼoʼokol u beeloʼob. Ku beetkoʼob bin beyoʼ utiaʼal u yilkoʼob wa jeʼel u kanik u bisubaʼobeʼ. Pero ¿maʼalob wa ka múul kajlak máak antes u tsʼoʼokol u beel?

Teʼ xookaʼ yaan a wilik lelaʼ:

•  ¿Baʼax ku yaʼalik le Biblia yoʼolal le u múul kajtal máakoʼ?

•  ¿Ku yáantaj wa utiaʼal a prepararkaba utiaʼal u tsʼoʼokol a beel?

•  ¿Ku yáantaj wa utiaʼal maʼ a sen xupik taakʼin?

•  ¿Ku yáantaj wa utiaʼal a yéeyik tubeel a núup?

•  ¿Baʼax maas maʼalob ka a beete?

•   Le Bibliaoʼ ku yaʼalikeʼ: «Náachkuntabaʼex tiʼ le núupkʼebanoʼ» (1 Tesalonicenses 4:3;1 Corintios 6:18). Lelaʼ ku yeʼesikeʼ maʼ maʼalob ka yanak relaciones sexuales tiʼ máaxoʼob maʼ tsʼokaʼan u beeloʼobiʼ, kex múul kajakbaloʼob yéetel ku yaʼalikoʼob yaan u tsʼoʼokol u beeloʼob kéen máanak kʼiin. a Le principioʼob yanoʼob teʼ Bibliaoʼ ku kanáantkoʼob máak tiʼ baʼaloʼob jeʼex u pʼáatal embarazadail juntúul koʼolel antes tiʼ u tsʼoʼokol u beel bey xan tiʼ uláakʼ problemasoʼob.

•   Jéeoba beet u yantal le tsʼoʼokol beeloʼ. Letiʼeʼ tu yaʼalaj: «Le xiiboʼ yaan u pʼatik u papá yéetel u maama utiaʼal u pʼáatal yéetel u yatan, tu kaʼatúulaloʼob túuneʼ yaan u suutoʼob junpʼéeliliʼ wíinklil» (Génesis 2:24). Le tsʼoʼokol beeloʼ junpʼéel compromiso, le oʼolal ku yáantaj utiaʼal ka yanak yaabilaj yéetel jeetsʼelil ichil le familiaoʼ.

 Yaʼab máaxoʼob aʼalikeʼ le u múul kajtal máakoʼ ku yáantaj. Tumen ku tuklikoʼobeʼ, mientras maas yaʼab tiempo ku máanskoʼob yéetel wa máaxeʼ maas jeʼel u kʼaj óoltikoʼobeʼ. Chéen baʼaleʼ, u jaajileʼ baʼax jeʼel u yáantik máak utiaʼal ka xiʼik utsil tiʼeʼ letiʼe u tsʼoʼokol u beeloʼ, tumen beyoʼ tu kaʼatúulaloʼob ken u yuʼuboʼob u beetmoʼob junpʼéel compromiso.

 ¿Bix jeʼel u paklan áantkubaʼobeʼ? Utiaʼal u aktáantkoʼob jeʼel baʼaxak problemaileʼ tu kaʼatúulaloʼob kʼaʼabéet tu jaajil u yóoloʼob u comprometermubaʼob yéetel u múul meyajoʼob. Tumen wa ku múul kajtaloʼob chéen utiaʼal u yilkoʼob «wa jeʼel u funcionareʼ» maʼ kun bin utsil tiʼob.

 U jaajil: Le máaxoʼob ku chʼaʼtuklikoʼob u múul kajtaloʼoboʼ, maʼ táan u prepararkubaʼob utiaʼal u tsʼoʼokol u beeloʼobiʼ, baʼaxeʼ táan u prepararkubaʼob utiaʼal u pʼatkubaʼob.

 Teksto jeʼel u yáantajeʼ: «Jeʼel baʼaxak ka u pakʼ máakeʼ le xan ken u joche» (Gálatas 6:7).

 Yaʼab máaxoʼob aʼalikeʼ ku yáantaj. Junpʼéel encuesta beetaʼab tu luʼumil Estados Unidos tumen le Pew Research Centeroʼ, tu yaʼaleʼ cuatro tiʼ cada diez máakoʼobeʼ tu chʼaʼtukloʼob u múul kajtaloʼob utiaʼal u ahorrarkoʼob taakʼin. Chéen baʼaleʼ, ka máan kʼiineʼ tu yiloʼobeʼ maʼ tu páajtal u tsʼoʼokol u beeloʼob tumen minaʼan taakʼin tiʼob.

 Uláakʼ problema ku aktáantik le máaxoʼob chéen ku múul kajtaloʼoboʼ maases letiʼe koʼolel sufrirkoʼ. Tumen wa ku yantal u paalaloʼobeʼ u suukileʼ wa ku pʼatkubaʼobeʼ tiʼ le koʼolel ku pʼáatal le paalaloʼoboʼ.

 U jaajil: Maas yaʼab problemas jeʼel u yantaltech wa ka múul kajtal yéetel wa máaxeʼ ke le utsiloʼob ken a kʼamoʼ.

 Teksto jeʼel u yáantajeʼ: «Teneʼ Jéeobaen, teen a Dios, teen le máax kaʼansikech utiaʼal u bintech utsiloʼ» (Isaías 48:17).

 Yaʼab máaxoʼob aʼalikeʼ ku yáantaj. Chéen baʼaleʼ junpʼéel libroeʼ ku yaʼalik: «Le máaxoʼob ku múul kajtaloʼob antes u tsʼoʼokol u beeloʼoboʼ kéen máanak kʼiineʼ ku difíciltal u pʼatkubaʼob». ¿Baʼaxten? Tumen kex ku tsʼáaikoʼob cuenta maʼ igual bix u tuukuloʼobeʼ maʼ tu pʼatkubaʼob tumen yaʼab baʼaloʼob tsʼoʼok u múul antaltiʼob, jeʼex u yalakʼ baʼalcheʼoboʼ, u múul boʼotkoʼob renta wa tumen ku yantal u paalaloʼob. Le baʼaxoʼob ku yúuchlaʼ kʼaj óolaʼan bey «u suuktal máak yéetel wa máax» (inercia de la convivencia). b Le librooʼ ku seguer u yaʼalik: «Yaʼab tiʼ le máaxoʼob ku aktáantkoʼob le talamiloʼobaʼ kex maʼ kiʼimak u yóoloʼobeʼ maas fácil u yilik u tsʼoʼokol u beeloʼob ke u pʼatkubaʼob, chéen tumen tsʼoʼok u suuktaloʼob» (Fighting for Your Marriage (Luche por salvar su matrimonio)).

 U jaajil: A múul kajtal antes tiʼ u tsʼoʼokol u beeleʼ maʼ tu yáantaj utiaʼal a chʼaʼik junpʼéel maʼalob desición, tumen maʼ xaaneʼ kex táan u binteʼex kʼaasileʼ chan difícil ken a wilil a pʼatkabaʼex.

 Teksto jeʼel u yáantajeʼ: «Le máax yaan u naʼatoʼ ku taʼakikuba kéen u yil junpʼéel peligro, pero le máax maʼ jach yaan u naʼatoʼ ku seguertik u beel, le oʼolal ku yilik u consecuenciail» (Proverbios 22:3).

 Yaan baʼax jeʼel u béeytal a beetik utiaʼal maʼ a muʼyajtik le problemas ku taasik u múul kajtal máakoʼ, bey xan utiaʼal a yéeyik tubeel yéetel máax kun tsʼoʼokol a beel. ¿Baʼax jeʼel a beetkeʼ? Chʼaʼ en cuenta le baʼax ku yaʼalik le Biblia yoʼolal le tsʼoʼokol beeloʼ. Yéetel táanil tiʼ u tsʼoʼokol a beel yéetel wa máaxeʼ ilawil a jach kʼaj óoltik tubeel. Maas maʼalob ka a wil u jatsʼuts modos bey xan wa igual le baʼax ka creerkeʼexoʼ, maʼ a wilik chéen u jaʼtsil.

 Le consejoʼob ku tsʼáaik le Bibliaoʼ jeʼel u yáantkech utiaʼal ka xiʼiktech utsil kéen tsʼoʼokok a beeleʼ. c Le consejoʼobaʼ jeʼel u yáantkechoʼob utiaʼal . . .

•   maʼ a tusik a núup.

•   a beetkaba juntúul maʼalob atantsil wa íichamtsil.

•   a wilik wa maʼalob u modos le máax yéetel ka biskabaoʼ.

 Utiaʼal a kanik u maasileʼ, ilawil le jaats ku kʼaabaʼtik «Tsʼokaʼan u beeloʼob yéetel taatatsiloʼob» yaan teʼ sitio jw.org.

 Teksto jeʼel u yáantajeʼ: «Tuláakal Tsʼíibeʼ tiʼ Dios u taal tumen letiʼ tsʼáa tu tuukul le máakoʼob utiaʼal ka u tsʼíibtoʼoboʼ. Le oʼolal le baʼax ku yaʼalikoʼ maʼalob utiaʼal kaʼansaj» (2 Timoteo 3:16).