Junpʼéel celulareʼ bey junpʼéel cuchillo jach jóoʼsaʼan u yejeʼ, jeʼel u yáantik máakeʼ pero jeʼel xan u loobiltik máak wa maʼ u kanáantik bix u meyajtiʼeʼ. ¿Bix jeʼel a wáantik a hijo utiaʼal ka meyajnaktiʼ tubeeleʼ? ¿Tak bukaʼaj tiempo ken a chaʼa u báaxtik u celular? a

•  Le baʼax kʼaʼabéet a wojéeltikoʼ

•  Baʼax jeʼel u páajtal a beetkeʼ

•  «Kanáant a paalal»

•   Kanáant bix u meyajtiʼob le celularoʼ. Jeʼex t-ilil teʼ xook «Le paalaloʼob yéetel le celularoʼoboʼ | Jaats 1: ¿Unaj wa in chaʼik u yantal u celular in hijo?», tiʼ junpʼéel celulareʼ jeʼel u páajtal u yilaʼal baʼaloʼob maʼalobtak bey xan baʼaloʼob kʼaastak ich Interneteʼ.

   Brendaeʼ ku yaʼalik: «Yaan kʼiineʼ jeʼel u tuʼubultoʼoneʼ le celularoʼ jeʼel u meyaj tiʼ le paalaloʼob utiaʼal u biskubaʼob yéetel máaxoʼob maʼ u kʼaj óoloʼobiʼ yéetel jeʼel tak u kʼaskúuntaʼal u tuukuloʼobeʼ».

•   Le paalaloʼoboʼ kʼaʼabéet u kaʼansaʼaloʼob. Le paalaloʼoboʼ úuch káajak u usartikoʼob le tecnologíaoʼ pero le taatatsiloʼoboʼ maʼ úuch káajak u kanik u usartoʼobiʼ. Kex le taatatsiloʼob maʼ u jach ojel u usartoʼob le tecnologíaoʼ, leloʼ maʼ u kʼáat u yaʼal wa maʼ tu páajtal u yáantik u paalaloʼob u usartoʼob tubeeliʼ.

   Maʼ xaaneʼ a hijoeʼ jach u yojel u usart u celular pero leloʼ maʼ u kʼáat u yaʼal wa yaan u usartik chéen utiaʼal baʼaloʼob maʼalobtakiʼ. Le paalaloʼoboʼ kex jach yaʼab baʼal u yojloʼobeʼ kʼaʼabéet u yáantaʼaloʼob tumen u taataʼob utiaʼal ka u kan u usartoʼob tubeel u celularoʼob.

   Setheʼ ku yaʼalik: «Wa ka tsʼáaik junpʼéel celular tiʼ a hijo pero maʼ ta tsoliktiʼ bix unaj u meyajtiʼ tubeeleʼ bey ka a tsʼáa junpʼéel coche u manejart kex a wojel maʼ u yojel manejareʼ».

•   Kʼaj óolt tubeel u celular a hijo. Kʼaj óolt máakalmáak le aplicaciónoʼob yaan tu celular a hijooʼ, beyoʼ jeʼel u páajtal a waʼaliktiʼ bix unaj u meyajtiʼ tubeeleʼ.

   ¿A wojel wa yaan aplicaciónoʼob ku meyaj utiaʼal a wilik tiʼ baʼax páginaʼob ku yokol a hijo ich Internet? ¿A kʼaj óol wa le aplicación ku kʼaabaʼtik control parentaloʼ? Yéetel le aplicaciónoʼ jeʼel u páajtal a controlartik baʼax ku sen beetik a hijo yéetel u celulareʼ.

   Yaan kʼiineʼ kex ka a desactivart jujunpʼéel páginaʼob utiaʼal maʼ u yokol a hijoeʼ maʼ tu funcionar jeʼex a tsʼáaikoʼ.

   Wa a kʼaj óol u teléfono a hijoeʼ yaan a wáantik utiaʼal u usart tubeel.

   Teksto jeʼel u yáantajeʼ: «Yoʼolal le baʼaxoʼob ku kanik máakoʼ ku bin u maas antal páajtalil tiʼ» (Proverbios 24:5).

•   Yéey bix kun meyajtiʼ. Chéen teech jeʼel u páajtal a chʼaʼtuklik bix kun meyaj tiʼ a hijo u celulareʼ.

   ¿Yaan wa a chaʼik u meyajtiʼ u celular tu yorail u janal, le kéen xiʼikeʼex a xíimbalteʼex a láakʼtsileʼex wa a amigoʼex?

   ¿Yaan wa a chaʼik u báaxtik u celular tak tu tsʼuʼ áakʼab?

   ¿Máakalmáak le aplicaciónoʼob ken a chaʼa u usartoʼ?

   ¿Bukaʼaj tiempo ken a chaʼa u usart u celular?

   ¿Sáamsamal wa ken a kʼaʼajstiʼ bix unaj u meyajtiʼ?

   Aʼaltiʼ baʼax ken a beet wa maʼ tu yuʼubik a tʼaan.

   Teksto jeʼel u yáantajeʼ: «Maʼ u pʼáatal maʼ tsolik u nuuk tiʼ juntúul xiʼipal» (Proverbios 23:13, nota).

•   Kʼaj óolt u contraseña u celular a hijo. Cada wa baʼax kʼiineʼ kʼáat u celular utiaʼal a wilik le baʼaxoʼob yaantiʼoʼ. Tiʼ máaxoʼob ku túuxtik mensaje, baʼax aplicaciónoʼob yaan tu celular, u fotoʼob yéetel tiʼ baʼax páginaʼob ku yokol Internet.

   Lorraineʼ ku yaʼalik: «T-aʼalaj tiʼ k-hija yaan k-xakʼaltik u celular pero maʼ t-aʼalajtiʼ baʼax kʼiin kéen k-beetiʼ, tsʼoʼoleʼ wa k-ilik maʼ táan u meyajtiʼ jeʼex t-aʼaliltiʼoʼ yaan u kʼexpajal jujunpʼéel baʼaloʼob».

   Le taatatsiloʼoboʼ yaan derecho tiʼob utiaʼal u yojéeltikoʼob bix u usartik u celular u paalaloʼob.

   Teksto jeʼel u yáantajeʼ: «Juntúul paaleʼ ku kʼaj óoltaʼal tu yoʼolal baʼax ku beetik, ku yojéeltaʼal wa maʼalob yéetel toj baʼax ku beetik» (Proverbios 20:11, nota).

•   Áant u beet baʼax maʼalob. Beet tuláakal le ku páajtal utiaʼal a wáantik a hijo u beet baʼax maʼaloboʼ, tumen wa ka beetkeʼ kex minaʼanech tu yiknaleʼ yaan u chʼaʼtuklik u beetik baʼax maʼalob. b

   Áant a hijo u kan u yeʼes jatsʼuts modos, jeʼex u yaʼalik u jaajil, u kanik u controlartuba yéetel u yeʼesik de ke responsable. Wa ku kanik u beet baʼax maʼalobeʼ yaan u meyajtiʼ tubeel u celularoʼ.

   Teksto jeʼel u yáantajeʼ: Le máaxoʼob yaan u naʼatoʼob wa yiijchajaʼan u tuukuloʼoboʼ «jeʼel u páajtal u kʼaj óoltikoʼob baʼax maʼalob bey xan baʼax maʼ maʼalobeʼ» (Hebreos 5:14).