Yaan jujunpʼéel religiónoʼobeʼ ku yaʼalikoʼobeʼ Miguel wa «san Migueleʼ» letiʼe kʼaabaʼ ku tsʼaʼabal tiʼ Jesús teʼ Biblia táanil tiʼ u taal way Luʼumeʼ yéetel ka suunaj teʼ kaʼanoʼ. a Le Bibliaoʼ ku yaʼalikeʼ Migueleʼ baʼateltʼaanaj yéetel Satanás yoʼolal u wíinklil Moisés, tsʼoʼoleʼ letiʼ xan áant juntúul ángel utiaʼal u yaʼalik tiʼ Daniel le baʼax tu yaʼalaj Diosoʼ (Daniel 10:13, 21; Judas 9). Migueleʼ ku defendertik u autoridad Jéeoba yéetel ku baʼateʼel tu contra u enemigoʼob Dios, le oʼolal jach maʼalob baʼax u kʼáat u yaʼal u kʼaabaʼoʼ: «¿Máax Jeʼex Dioseʼ?» (Daniel 12:1; Apocalipsis 2:7).

 Koʼox ilik baʼaxten k-aʼalikeʼ Jesúseʼ letiʼe arcángel Migueloʼ.

•   Migueleʼ letiʼe «arcángeloʼ» (Judas 9). Le tʼaan arcángeloʼ chéen kaʼatéen ku chíikpajal teʼ Bibliaoʼ yéetel u kʼáat u yaʼal «u nojchil le ángeloʼoboʼ». Le kaʼapʼéel tekstoʼoboʼ ku yeʼesikeʼ chéen juntúul arcángel yaan, leloʼ u kʼáat u yaʼaleʼ chéen tiʼ juntúul ángel ku yaʼalaʼal beyoʼ. Junpʼéel tiʼ le tekstoʼoboʼ ku yaʼalikeʼ Jesúseʼ «yaan u yéemel desde teʼ kaʼan táan u tʼaan yéetel autoridad jeʼex u tʼaan juntúul arcángeleʼ» (1 Tesalonicenses 4:16). Jeʼex u yaʼalik le tekstooʼ Jesúseʼ ku tʼaan jeʼex «juntúul arcángeleʼ», leloʼ ku yeʼesikeʼ Jesúseʼ letiʼe arcángel Migueloʼ.

•   Migueleʼ ku nuʼuktik junpʼéel ejército ángeloʼob. «Miguel yéetel u ángeloʼobeʼ baʼatelnajoʼob tu contra le nojoch kaanoʼ» wa Satanás (Apocalipsis 12:7). Migueleʼ jach yaan u autoridad teʼ kaʼanoʼ. Le Bibliaoʼ ku yaʼalikeʼ letiʼeʼ «juntúul tiʼ le príncipeʼob jach yaan u páajtaliloʼoboʼ» yéetel letiʼ «le nojoch príncipe[oʼ]» (Daniel 10:13, 21; 12:1). Le Nuevo Testamento tu beetaj David Auneoʼ ku yaʼalikeʼ Migueleʼ «u maas nojchil le ángeloʼoboʼ».

   A parte tiʼ Migueleʼ teʼ Bibliaoʼ chéen ku yaʼalaʼal u kʼaabaʼ uláakʼ juntúul máak yaan autoridad tiʼ yóokʼol le ángeloʼoboʼ. Le Bibliaoʼ ku yaʼalikeʼ yaan u chíikpajal «Yuumtsil Jesús desde teʼ kaʼan yéetel u muʼukʼaʼan ángeloʼob ichil junpʼéel kʼáakʼ táan u tóochʼbaloʼ» (2 Tesalonicenses 1:7, 8; Mateo 16:27). Tsʼoʼoleʼ 1 Pedro 3:21, 22, ku yaʼalikeʼ Jesúseʼ «bin teʼ kaʼanoʼ. Tsʼoʼoleʼ yáanal u kʼabeʼ tsʼaʼab ángeloʼob, autoridadoʼob bey xan páajtaliloʼob». Wa ka tsʼaʼabak kaʼach Jesús yéetel Miguel u nuʼukt le ángeloʼoboʼ maʼ xaaneʼ jeʼel kaʼach u yilkubaʼob bey enemigoʼobeʼ. Le oʼolal jeʼel u páajtal k-aʼalikeʼ Jesús yéetel Migueleʼ, juntúuliliʼob.

•   Migueleʼ yaan u líikʼil teʼ ‹kʼiinoʼob táan u sen muʼyaj máakoʼ› (Daniel 12:1). Tu libroil Danieleʼ suuk u meyaj le tʼaan «u líikʼil» utiaʼal u yúuchul tʼaan tiʼ juntúul rey yaan u beetik junpʼéel baʼal jach especial (Daniel 11:2-4, 21). Tiʼ Jesúseʼ ku yaʼalaʼal «U Tʼaan Dios». Tsʼoʼoleʼ ku yaʼalaʼal xan tiʼ «u Rey reyoʼob» tumen yaan u xuʼulsik u enemigoʼob Dios yéetel yaan u kanáantik u kaajal (Apocalipsis 19:11-16). Leloʼ yaan u beetik teʼ kʼiinoʼob táan «u sen muʼyaj máak jeʼex mix juntéen ilaʼak desde ka káaj yóokʼol kaab tak bejlaʼeʼ yéetel mix bikʼin kun kaʼa ilbil» (Mateo 24:21, 42).