U Reino Dioseʼ yaan u gobernar way Luʼumeʼ yéetel yaan u jeelintik tuláakal le gobiernoʼob yanoʼoboʼ (Daniel 2:44; Apocalipsis 16:14). Kéen úuchkeʼ, le Reinooʼ yaan u beetik lelaʼ:

•   Yaan u xuʼulsik le máaxoʼob beetik baʼax kʼaasoʼ. «Le kʼasaʼan máakoʼoboʼ yaan u luʼsaʼaloʼob way luʼumeʼ» (Proverbios 2:22).

•   Maʼ tun antal guerraʼob. Yaan u «beetik u xuʼulul u yantal baʼateʼel tiʼ tuláakal yóokʼol kaab» (Salmo 46:9).

•   Yaan u yantal kiʼimak óolal yéetel mix máak kun sajaktal. «Cada juntúuleʼ yaan u kutal yáanal u boʼoy u pakʼal uva yéetel yáanal u boʼoy u pakʼal higo, mix máak kun beetik u sajaktaloʼob» (Miqueas 4:4).

•   Yaan u yantal junpʼéel paraíso way Luʼumeʼ. «Le desierto yéetel le luʼum jach tikinoʼ yaan u jach kiʼimaktal u yóoloʼob, le táax luʼum tuʼux mix baʼal yanoʼ yaan xan u kiʼimaktal u yóol yéetel yaan u loolankil» (Isaías 35:1).

•   Le meyaj ken k-beetoʼ yaan u taasik kiʼimak óolal. «Le máaxoʼob in yéeymoʼ jach yaan u kiʼimaktal u yóoloʼob yéetel u yich u meyajoʼob. Letiʼobeʼ maʼ chéen kunel ken u tsʼáa u yóoloʼob meyajiʼ» (Isaías 65:21-23).

•   Mix máak kun kʼojaʼantal. «Mix juntúul u kajnáalil le luʼum ken u yaʼal: ‹Kʼojaʼanen›» (Isaías 33:24).

•   Mix máak kun chʼíijil. «Pʼáatak maas maʼalob u wíinklil ke tu táankelmil, pʼáatak jeʼex kaʼach tu paalileʼ» (Job 33:25).

•   Yaan u kaʼa kuxkíintaʼal le kimenoʼoboʼ. «Tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan (u tʼaan Jesús) yéetel yaan u jóokʼloʼob» (Juan 5:28, 29).