Le máaxoʼob yaan u amigoʼoboʼ kiʼimak u yóoloʼob. Maʼ tu yuʼubikoʼob wa tu juunaloʼob yanoʼob tumen u yojloʼob yaan u yáantaʼaloʼob kéen kʼaʼabéetchajak (Proverbios 27:17).

 Pero le Bibliaoʼ ku yaʼaliktoʼoneʼ unaj k-yéeyik tubeel k-amigoʼob yéetel ku yaʼaliktoʼon baʼax jeʼel u yúuchultoʼon wa maʼ t-yéeyikoʼob tubeeleʼ (Proverbios 13:20; 1 Corintios 15:33). Wa k-bisikba yéetel máaxoʼob maʼ tu beetkoʼob baʼax maʼalobeʼ jeʼel xan k-beetik baʼax kʼaaseʼ.

Teʼ xookaʼ yaan k-ilik le jaatsoʼobaʼ:

•  ¿Bix juntúul maʼalob amigo?

•  ¿Máaxoʼob ku chʼaʼchiʼitaʼal teʼ Biblia tu bisubaʼob maʼaloboʼ?

•  ¿Jeʼel wa u páajtal u yilkoʼon Dios bey u amigoʼoneʼ?

•  Tekstoʼob ku tʼaanoʼob tiʼ bix juntúul maʼalob amigo

 Le Bibliaoʼ ku yaʼalikeʼ le maʼalob amigoʼoboʼ maʼ junpʼéeliliʼ baʼal uts tu yichoʼobiʼ, baʼaxeʼ yaan uláakʼ baʼaloʼob ku páaʼtaʼal ka yanak tiʼob. Por ejemploeʼ Salmo 119:63, ku yaʼalik: «Kin biskinba yéetel tuláakal le máaxoʼob adorarkechoʼ, a bey xan yéetel le máaxoʼob ku beetkoʼob le baʼaxoʼob ka waʼalikoʼ». Le máax tsʼíibt le Salmoaʼ ku yaʼalikeʼ u amigoʼobeʼ letiʼe máaxoʼob ku beetkoʼob baʼax ku yaʼalik Diosoʼ.

 Le Bibliaoʼ ku yaʼalik xan uláakʼ modos unaj u yeʼesik juntúul maʼalob amigo. Por ejemploeʼ:

•   «Juntúul jach maʼalob amigoeʼ ku yeʼesik yaabilaj tiʼ tuláakal súutukil, tu kʼiinil táan u muʼyaj máakeʼ letiʼeʼ bey juntúul sukuʼuneʼ» (Proverbios 17:17).

•   «Yaan máaxoʼob jeʼel tak u beetkoʼob loob tiʼ u amigoʼobeʼ, pero yaan juntúul amigo maas nojoch u yaabilaj ke jach u sukuʼun máak» (Proverbios 18:24).

 Jeʼex k-ilkoʼ le Bibliaoʼ ku yaʼalikeʼ juntúul jach maʼalob amigoeʼ ku yáantaj kéen kʼaʼabéetchajak, ku yeʼesik yaabilaj, uts yéetel maʼ tsʼuʼutiʼ. Ku yáantkoʼon xan tiʼ tuláakal súutukil yéetel wa yaan baʼax maʼ maʼalob k-beetkeʼ maʼ tu chʼaʼik saajkil u yaʼaltoʼon (Proverbios 27:6, 9).

 Teʼ Bibliaoʼ ku chʼaʼchiʼitaʼal jujuntúul máaxoʼob jach maʼalob úuchik u biskubaʼob kex jelaʼan bix líiʼsaʼaniloʼob, maʼ junpʼéeliliʼ tuʼux u taaloʼobiʼ, maʼ igual u edadoʼobiʼ wa maʼ igual le autoridad yaantiʼoboʼ. Koʼox ilik óoxpʼéel ejemploʼob:

•   Rut yéetel Noemí. Ruteʼ u yilib kaʼach Noemí, letiʼeʼ maas paal kaʼach tu tséel u suegra. Tsʼoʼoleʼ maʼ junpʼéeliliʼ tuʼux u taaloʼobiʼ, kex beyoʼ jach maʼalob úuchik u biskubaʼob yéetel jach tu yaabiltubaʼob (Rut 1:16).

•   David yéetel Jonatán. Ku tuklaʼaleʼ Jonatáneʼ 30 años maas nojchil tiʼ David. Kex beyoʼ le Bibliaoʼ ku yaʼalikeʼ tu bisubaʼob jach maʼalob (1 Samuel 18:1).

•   Jesús yéetel u apóstoloʼob. Tiʼ Jesúseʼ maas yaan kaʼach autoridad ke u apóstoloʼob, le oʼolal letiʼobeʼ ku yaʼalikoʼob kaʼach tiʼ: «J-Kaʼansaj» yéetel «Yuumtsil» (Juan 13:13). Kex beyoʼ Jesúseʼ tu yiloʼob bey u amigoʼobeʼ yéetel jach maʼalob u biskuba kaʼach yéetel le máaxoʼob ku kʼamkoʼob le baʼax tu kaʼansoʼ. Letiʼeʼ tu yaʼalaj: «Kin waʼalikteʼex in amigoʼex, tumen tuláakal le baʼaxoʼob tsʼoʼok u yaʼalikten in Taataoʼ teneʼ tsʼoʼok xan in tsʼáaik a wojéelteʼex» (Juan 15:14, 15).

 Jeʼeleʼ, tuláakal máak jeʼel u páajtal u biskuba yéetel Dioseʼ. Le Bibliaoʼ ku yaʼalikeʼ letiʼeʼ «jach ku biskuba maʼalob yéetel le máaxoʼob toj u kuxtaloʼoboʼ» (Proverbios 3:32). Lelaʼ u kʼáat u yaʼaleʼ Dioseʼ chéen ku biskuba yéetel le utsul máakoʼoboʼ wa yéetel le máaxoʼob beetik baʼax uts tu tʼaanoʼ. Teʼ Bibliaoʼ ku yaʼalaʼaleʼ Abraháneʼ kuxlaj jeʼex u yaʼalik Dioseʼ, le oʼolal Dioseʼ tu yilaj bey u amigoeʼ (2 Crónicas 20:7; Isaías 41:8; Santiago 2:23).