Le «nojoch muʼyajiloʼ» letiʼe tiempo tuʼux kun sen yaatal u kuxtal máakoʼ, tsʼoʼoleʼ lelaʼ mix juntéen ilaʼak u yúuchul. Le profecíaʼob yaan teʼ Bibliaoʼ ku yaʼalikeʼ yaan u yúuchul teʼ tu tsʼook kʼiinoʼoboʼ (2 Timoteo 3:1; Daniel 12:4). Marcos 13:19, ku yaʼalik: «Teʼ kʼiinoʼob jeʼeloʼ yaan u sen muʼyaj máak. Desde ka beetaʼab tuláakal baʼal tumen Dios tak bejlaʼeʼ mix juntéen ilaʼak junpʼéel baʼal beyoʼ yéetel mix bikʼin kun kaʼa ilbil» (Daniel 12:1; Mateo 24:21, 22).

¿Baʼax kun úuchul le táan le nojoch muʼyajiloʼ?

•   Yaan u xuʼulsaʼal le religiónoʼob maʼatech u kaʼanskoʼob u jaajiloʼ. Chéen kéen jáan xuʼulsaʼakoʼob (Apocalipsis 17:1, 5; 18:9, 10, 21). Le kéen xuʼulsaʼakoʼob tumen le gobiernoʼob, jeʼex kun aʼalbiltiʼob tumen le Naciones Unidasoʼ, u jaajileʼ chéen táan u cumplirkoʼob le baʼax u yaʼalmaj Diosoʼ (Apocalipsis 17:3, 15-18). a

•   Yaan u atacartaʼal le religión kaʼansik u jaajiloʼ. U libroil Ezequieleʼ ku yaʼalikeʼ junmúuchʼ luʼumoʼob ku yaʼalaʼaltiʼ «Gog ku taal tiʼ u luʼumil Magogueʼ» yaan u atacartik le religión kaʼansik u jaajiloʼ. Chéen baʼaleʼ Dioseʼ maʼ ten u chaʼa u xuʼulsaʼal tiʼ u kaajal (Ezequiel 38:1, 2, 9-12, 18-23).

•   Yaan u juzgartaʼal le máakoʼoboʼ. Jesúseʼ yaan u juzgartik le máakoʼoboʼ yéetel yaan u jatskoʼob jeʼex u beetik le j-kanan taman ken u jats le tamanoʼob tiʼ le chivoʼoboʼ (Mateo 25:31-33). Jesúseʼ maʼ ten u xuʼuls le máaxoʼob tu apoyartoʼob u sukuʼunoʼoboʼ wa le máaxoʼob kun áantik gobernar teʼ kaʼanoʼ (Mateo 25:34-46).

•   Yaan u muʼuchʼul le máaxoʼob kun áantik Jesús gobernaroʼ. Tuláakal le máaxoʼob chúukpaj u yóoloʼob tiʼ Dios yéetel yéeyaʼanoʼob utiaʼal u gobernaroʼob teʼ kaʼan yéetel Cristooʼ yaan u kaʼa kuxkíintaʼaloʼob utiaʼal u yantaloʼob teʼ kaʼanoʼ (Mateo 24:31; 1 Corintios 15:50-53; 1 Tesalonicenses 4:15-17).

•   Yaan u taal le Armagedónoʼ. Teʼ Bibliaoʼ ku yaʼalaʼal Armagedón tiʼ «le baʼateʼel kun antal tu kʼiinil le Dios jach táaj yaan u poderoʼ», wa kʼaj óolaʼan xan «u kʼiinil Jéeoba» (Apocalipsis 16:14, 16; Isaías 13:9; 2 Pedro 3:12). Le máaxoʼob maʼ kʼaʼamoʼob tumen Cristooʼ yaan u xuʼulsaʼaloʼob tu kʼiinil le Armagedónoʼ (Sofonías 1:18; 2 Tesalonicenses 1:6-10). Yaan xan u xuʼulsaʼal tuláakal le gobiernoʼoboʼ. Teʼ Bibliaoʼ le gobiernoʼoboʼ ku keʼetel yéetel juntúul tsʼíitsʼik baʼalcheʼ siete u pooloʼob (Apocalipsis 19:19-21).

¿Baʼax kun úuchul kéen tsʼoʼokok le nojoch muʼyajiloʼ?

•   Satanás yéetel le demonioʼoboʼ yaan u kʼaʼalaloʼob. Juntúul ángel jach táaj yaan u podereʼ yaan u píikchʼintik Satanás yéetel u demonioʼob tiʼ junpʼéel jool jach taam (Apocalipsis 20:1-3). Tiʼ kun pʼáatloʼobiʼ yéetel yaan u luʼsaʼal u poderoʼob. Beyoʼ maʼ ken u beetoʼob baʼax kʼaas (Apocalipsis 20:7).

•   Ku káajal le Mil Añosoʼ. Ichil le mil añosaʼ yaan u káajal u gobernar u Reino Dios yéetel yaan u béeykuntik tuláakal le jatsʼuts promesaʼob tsʼíibtaʼan teʼ Bibliaoʼ (Apocalipsis 5:9, 10; 20:4, 6). Way Luʼumeʼ yaan u pʼáatal kuxaʼanil yaʼabkach máakoʼob le kéen tsʼoʼokok le nojoch muʼyajiloʼ yéetel yaan u yilkoʼob bix kun káajal u gobernar u Reino Dios (Apocalipsis 7:9, 14; Salmo 37:9-11).