Le Bibliaoʼ maʼ tu jach tʼaan yoʼolal le cremación wa u tóokaʼal le máax tsʼoʼok u kíimiloʼ. Maʼ xan tu yaʼalik wa mukbil wa cremarbil unaj u beetaʼal le kimenoʼoboʼ.

 Le Bibliaoʼ ku yaʼalikeʼ le máaxoʼob meyajt Dios úuchjeakiloʼ tu mukoʼob u láakʼtsiloʼob kíimoʼoboʼ. Jeʼex Abraháneʼ hasta anchaj u manik junpʼéel lugar utiaʼal u mukik Sara, u yatan (Génesis 23:2-20; 49:29-32).

 Le Bibliaoʼ ku yaʼalik xaneʼ jujuntúul tiʼ le máaxoʼob meyajt Dios úuchjeakiloʼ tu tóokoʼob le máaxoʼob kíimoʼoboʼ. Jeʼex le ka kíim Saúl yéetel óoxtúul u hijoʼob bijaʼanoʼob teʼ baʼateloʼ maʼ páajchaj u muʼukloʼob jeʼex unajeʼ. Le ka tu yojéeltaj u soldadoiloʼob Israel baʼax úucheʼ bin u chʼaʼob u wíinkliloʼobeʼ ka tu tóokoʼob yéetel tu mukoʼob jeʼex unajeʼ (1 Samuel 31:8-13). Le Bibliaoʼ ku yeʼesikeʼ maʼalob le baʼax tu beetaj le soldadoʼobaʼ (2 Samuel 2:4-6).

 Baʼax ku creertaʼal: Dioseʼ maʼ tu páajtal u kaʼa kuxkíintik le máaxoʼob ku tóokaʼaloʼoboʼ.

 U jaajil: Dioseʼ jeʼel u páajtal u kaʼa kuxkíintik juntúul máak kex mukbil beetaʼabik, cremartaʼabi, buul kʼáaʼnáab wa jaantaʼab tumen baʼalcheʼ (Apocalipsis 20:13). Como tiʼ Dios yaan tuláakal páajtalileʼ chéen chʼaʼabil jeʼel u kaʼa beetik u wíinklil máakeʼ (1 Corintios 15:35, 38).