Úuchjeakileʼ Dioseʼ tu chaʼaj u yantal maas tiʼ juntúul u yatan máak (Génesis 4:19; 16:1-4; 29:18-29). Chéen baʼaleʼ maʼ letiʼ aʼal ka beetaʼak beyoʼ tumen le ka tu beetaj Adáneʼ chéen juntúul u yatan tu tsʼáaj.

 Dioseʼ desde úuch u yaʼal chéen juntúul u yatan máak unaj u yantal. Ka máan kʼiineʼ Jesucristoeʼ tu kʼaʼajsaj le baʼax u yaʼalmaj u Taataoʼ (Juan 8:28). Juntéeneʼ le ka kʼáataʼabtiʼ junpʼéel baʼal yoʼolal le tsʼoʼokol beeloʼ, letiʼeʼ tu núukaj: «¿Maʼ wa ta xokeʼexeʼ le máax beet wíinik desde tu káajbaloʼ tu beetaj xiib yéetel koʼolel? Yéetel tu yaʼaleʼ ‹tu yoʼolal lelaʼ le xiiboʼ yaan u pʼatik u papá yéetel u maama utiaʼal u pʼáatal yéetel u yatan, yéetel tu kaʼatúulaloʼobeʼ yaan u suutoʼob junpʼéeliliʼ wíinklil›» (Mateo 19:4, 5).

 Ka máan kʼiineʼ Dioseʼ tu tsʼáaj tu tuukul juntúul u discípulo Jesús ka u tsʼíibt lelaʼ: «Cada xiibeʼ ka yanak u yatan, yéetel cada koʼoleleʼ ka yanak u yíicham» (1 Corintios 7:2). Le Biblia xanoʼ ku yaʼalikeʼ utiaʼal ka tsʼaʼabak wa baʼax meyajil tiʼ le xiib ichil u kaajal Diosoʼ chéen juntúul u yatan unaj u yantal (1 Timoteo 3:2, 12).