¿Jeʼel wa u yáantken le baʼax ku yaʼalik le Bibliaoʼ?
Baʼax ku yaʼalik le Bibliaoʼ
Jeʼel u yáantik máakeʼ (Romanos 15:4). Ilawil jujunpʼéel tekstoʼob yaan teʼ Biblia tsʼoʼok u yáantik le máaxoʼob táan u aktáantik jejeláas baʼaloʼob ichil u kuxtaloʼoboʼ.
Teʼ xookaʼ yaan k-ilik jujunpʼéel baʼaxoʼob ku aktáantik máak.
Problemaʼob
Salmo 23:4: «Kex ka máanken tuʼux jach táaj éeʼjochʼeʼeneʼ, maʼ saajken u yúuchulten loobiʼ tumen tiaʼanech tin wiknaleʼ».
Baʼax u kʼáat u yaʼale: Wa ka orar tiʼ Dios yéetel ka confiar tiʼ baʼax ku yaʼalik le Bibliaoʼ jeʼel u yáantkech utiaʼal maʼ a sajaktal a aktáant jeʼel baʼalak problemaileʼ.
Filipenses 4:13: «Yaanten u muukʼil utiaʼal in beetik tuláakal baʼal, tu yoʼolal le máax tsʼáaikten u páajtalil in beetkoʼ».
Baʼax u kʼáat u yaʼale: Dioseʼ jeʼel u tsʼáaiktech u muukʼil utiaʼal a aktáantik jeʼel baʼaxak problemaileʼ.
U kíimil máax u yaabiltmaj máak
Eclesiastés 9:10: «Tumen teʼ Muknal tuʼux ka binoʼ minaʼan meyajiʼ, minaʼan tuukuliʼ, minaʼan kaanbaliʼ yéetel minaʼan naʼatiʼ».
Baʼax u kʼáat u yaʼale: Le máaxoʼob tsʼoʼok u kíimloʼoboʼ maʼ táan u muʼyajoʼobiʼ yéetel mix baʼal u yojloʼob, le oʼolal maʼ tu páajtal u beetkoʼobtoʼon loob.
Hechos 24:15: ‹Yaan u kaʼa kuxkíintaʼal le kimenoʼoboʼ›.
Baʼax u kʼáat u yaʼale: Dioseʼ jeʼel u páajtal u kaʼa kuxkíintik k-láakʼtsiloʼob yéetel k-amigoʼob tsʼoʼok u kíimloʼoboʼ.
U sen culparkuba máak
Salmo 86:5: «Jéeoba a Dios, techeʼ jach ka weʼesik a wutsil, listoech utiaʼal perdonar. Jach a yaabiltmaj tuláakal le máaxoʼob meyajtikechoʼ».
Baʼax u kʼáat u yaʼale: Dioseʼ ku perdonartik le máax jach tu jaajil u yóol arrepentido yoʼolal baʼax tsʼoʼok u beetik yéetel u chʼaʼtukultmaj maʼ u kaʼa lúubul tiʼ baʼax kʼaas.
Salmo 103:12: «Jeʼex bukaʼaj náachil yanil lakʼin tiʼ chikʼinoʼ, letiʼe bukaʼaj xan tsʼoʼok u náachkuntik tiʼ toʼon le baʼaxoʼob maʼ maʼalob k-beetmoʼ».
Baʼax u kʼáat u yaʼale: Le kéen u perdonartoʼon Dioseʼ bey ka u náachkunt le baʼax maʼ maʼalob t-beetoʼ tumen ku tuʼubsik. Letiʼeʼ maʼ mantatsʼ tu kʼaʼajsik utiaʼal u beetik u yaatal k-óoliʼ.
U jach lúubul u yóol máak
Salmo 31:7: «Tsʼoʼok a wilik baʼax ku yúuchulten, jach a wojel baʼax kin muʼyajtik».
Baʼax u kʼáat u yaʼale: Dioseʼ jach u yojel baʼax ka sufrirtik. Kex u maasil maʼ tu naʼatkechoʼobeʼ letiʼeʼ jach ku naʼatik bix a wuʼuyikaba.
Salmo 34:18: «Jéeobaeʼ naatsʼ yanil tiʼ le máaxoʼob ku muʼyajoʼoboʼ, ku yáantik le máaxoʼob yaachajaʼan u yóoloʼoboʼ».
Baʼax u kʼáat u yaʼale: Dioseʼ ku yaʼalikeʼ yaan u yáantkech kéen lúubuk a wóol, letiʼeʼ jeʼel u yáantkech a aguantart jeʼel baʼaxak ka u beet a sufrireʼ.
Kʼojaʼaniloʼob
Salmo 41:3: «Kéen kʼojaʼanchajkeʼ maʼ kun pʼatbil tumen Jéeoba».
Baʼax u kʼáat u yaʼale: Wa yaantech junpʼéel kʼojaʼanileʼ Dioseʼ jeʼel u yáantkech utiaʼal ka yanaktech jeetsʼelileʼ, ka yanaktech u muukʼil a aguantartik yéetel jeʼel xan u tsʼáaiktech naʼat utiaʼal a chʼaʼik maʼalob decisiónoʼobeʼ.
Isaías 33:24: «Mix juntúul u kajnáalil le luʼum ken u yaʼal: ‹Kʼojaʼanen›».
Baʼax u kʼáat u yaʼale: Dioseʼ ku yaʼalikeʼ yaan u kʼuchul u kʼiinileʼ tiʼ mix máak kun yantal mix junpʼéel kʼojaʼanil.
U sen estresar máak
Salmo 94:19: «Le ka jach chiʼichnakchajeneʼ ta líiʼsaj in wóol, ta tranquilizarten».
Baʼax u kʼáat u yaʼale: Wa jach estresadoʼoneʼ jeʼel u páajtal k-kʼáatik u yáantaj Dioseʼ. Letiʼeʼ jeʼel u yáantkoʼon utiaʼal ka yanaktoʼon jeetsʼelileʼ.
1 Pedro 5:7: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex».
Baʼax u kʼáat u yaʼale: Dioseʼ maʼ chéen táan u yilik u sufrir máakiʼ, letiʼeʼ u kʼáat ka k-aʼaltiʼ baʼax beetik k-sufrir.
Guerraʼob
Salmo 46:9: «Ku beetik u xuʼulul u yantal baʼateʼel [wa guerraʼob] tiʼ tuláakal yóokʼol kaab».
Baʼax u kʼáat u yaʼale: Maʼ kun xáantaleʼ u Reino Dioseʼ yaan u láaj luʼsik le guerraʼoboʼ.
Salmo 37:11, 29: «Le utsul máakoʼoboʼ yaan u pʼáatloʼob way luʼumeʼ, jach yaan u kiʼimaktal u yóoloʼob tumen mix baʼal kun beetik u chiʼichnaktaloʼob. [...] Le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ».
Baʼax u kʼáat u yaʼale: Le utsul máakoʼoboʼ yaan u kajtaloʼob ich jeetsʼelil way Luʼum utiaʼal mantatsʼeʼ.
U sen tuklik máak baʼax ku taal u kʼiin
Jeremías 29:11: «Teneʼ in wojel baʼax ken in beet ta woʼolaleʼex, maʼ ken in taas kʼaas ta wóokʼoleʼex, baʼaxeʼ yaan in beetik u yantalteʼex jeetsʼelil utiaʼal ka xiʼikteʼex maʼalobil yéetel utiaʼal ka béeychajak le baʼax ka páaʼtkeʼexoʼ».
Baʼax u kʼáat u yaʼale: Dioseʼ ku yaʼalikeʼ le máaxoʼob meyajtikoʼ u yojloʼobeʼ jatsʼuts baʼax ku taal u kʼiinil u yúuchul.
Apocalipsis 21:4: «Letiʼeʼ yaan u choʼik tuláakal u jaʼil u yichoʼob, maʼ tun yantal kíimil, mix okʼol, mix kʼiʼinamil yéetel mix máak kun muʼyaj. Le baʼaloʼob suuk u yúuchul kaʼachoʼ tsʼoʼok u máanoʼob».
Baʼax u kʼáat u yaʼale: Dioseʼ ku yaʼalikeʼ yaan u láaj xuʼulsik tiʼ le baʼaloʼob kʼaastak ku yúuchul bejlaʼoʼ.
a U kʼaabaʼ Dioseʼ Jéeoba (Salmo 83:18). Ilawil le xook «¿Máax Jéeoba?».
Maʼ xaaneʼ jeʼel u yutstal xan ta wicheʼ
LE MÁAX KU KANANOʼ
Chaʼa u yáantkech le Dios u yaabiltmechoʼ
Le Bibliaoʼ ku yáantkoʼon k-creert u promesaʼob Dios.
BAʼALOʼOB KU NÚUKAʼAL TEʼ BIBLIAOʼ
Jeʼel u yantaltech esperanzaeʼ
Le promesaʼob tsʼíibtaʼan teʼ Bibliaoʼ ku tsʼáaiktoʼon esperanza teʼ kʼiinoʼobaʼ bey xan teʼ kʼiinoʼob ku taaloʼoboʼ.
ULÁAKʼ BAʼALOʼOB
Yaj u muʼyaj máak kéen kíimik wa máax tiʼ
Kéen kíimik juntúul máax k-yaabiltmeʼ k-tuklikeʼ mix máak naʼatik bix k-uʼuyikba. Dioseʼ ku naʼatkoʼon yéetel u kʼáat u yáantoʼon.
LE MÁAX KU KANANOʼ
Kéen talamchajak le kuxtaloʼ
Kex táan a muʼyajeʼ, yaan baʼax oʼolal u seguer a kuxtal.
BAʼALOʼOB UNAJ A KANIK
¿Baʼaxten ku chaʼik Dios u yantal muʼyajil?
Yaʼab máakeʼ u kʼáat u yojéelt baʼaxten jach yaan pʼektajil yéetel muʼyajil way yóokʼol kaabeʼ. Le Bibliaoʼ ku yaʼalik baʼaxten yéetel ku yaʼalik baʼax ken u beet Dios.
U KAʼANSAJ LE BIBLIAOʼ
Kʼáat ka tsʼaʼabaktech xook
Kʼáat ka tsʼaʼabaktech xook yéetel le Bibliaoʼ, ilawil bix jeʼel a beetik le baʼax ka kanikoʼ.