¿Baʼax ku yaʼalik le Biblia yoʼolal u vengarkuba máakoʼ?

PAX ICH

Baʼax ku yaʼalik le Bibliaoʼ

Kex yaan kʼiin ku tuklik máak yaan baʼax oʼolal u vengarkubaeʼ wa ku beetik máakeʼ táan u bin tu contra le baʼax ku yaʼalik le Bibliaaʼ: «Maʼ a waʼalik: ‹Yaan in beetiktiʼ jach jeʼex úuchik u beetik tiʼ tenoʼ, yaan in sutiktiʼ u jeel le baʼax tu beetoʼ›» (Proverbios 24:29). Teʼ Bibliaoʼ yaʼab consejoʼob yaan jeʼel u yáantik máak utiaʼal maʼ u tsʼíiboltik u vengarkubaeʼ.

Teʼ xookaʼ yaan k-tʼaan tiʼ lelaʼ:

¿Baʼaxten maʼ uts u vengarkuba máakiʼ?

Kéen aʼalaʼaktoʼon wa kéen beetaʼaktoʼon baʼax ku beetik u yaatal k-óoleʼ u suukileʼ k-tuklik: «Yaan in vengarkinba». Chéen baʼaleʼ u tuukul máak beyoʼ ku bin tu contra le baʼax ku yaʼalik le Bibliaoʼ. Koʼox ilik baʼaxten.

Jéeobaeʼ a maʼ maʼalob u yilik ka u vengartuba máakiʼ, letiʼeʼ ku yaʼalik: «‹Teen kin vengartik le baʼax ku beetkoʼoboʼ, teen ken in tsʼáa baʼax ku náajmatikoʼob›, ku yaʼalik Jéeoba» (Romanos 12:19). Kex yaan hora ku beetaʼal baʼaloʼob maʼ justo tiʼ máakeʼ le Bibliaoʼ ku yaʼalikeʼ tu lugar u vengarkubaeʼ maas maʼalob ka u kaxt jeetsʼelil yéetel le máax beetik kʼaas tiʼoʼ (Romanos 12:18). Pero ¿kux túun wa kex taak k-utskíintik le problemaoʼ le uláakʼ máax táakaʼanoʼ maʼ tu yóotik ka utschajak? ¿Kux túun wa maʼ t-kʼab yaan k-utskíintik le problemaoʼ? Le Bibliaoʼ ku kʼaʼajsiktoʼoneʼ Dios ken u beet justicia (Salmo 42:10, 11).

¿Bix u castigartik Dios le máaxoʼob ku beetkoʼob baʼaloʼob kʼaastakoʼ?

Tak teʼ kʼiinoʼobaʼ Dioseʼ ku chaʼik tiʼ le autoridadoʼob ka u castigartoʼob le máaxoʼob kʼasaʼanoʼoboʼ (Romanos 13:1-4). Pero kéen káajak u gobernar u Reino Dios way Luʼumeʼ yaan u beetik u boʼotaʼal tumen le kʼasaʼan máakoʼob tuláakal le baʼaloʼob kʼaastak tu beetoʼoboʼ. Tsʼoʼoleʼ mix máak kun kaʼa sufrir (Isaías 11:4).

¿Baʼax unaj u beetik máak utiaʼal maʼ u tsʼíiboltik u vengarkuba?

U kanik u controlartuba (Proverbios 17:27). Le máaxoʼob pʼujaʼanoʼoboʼ u suukileʼ maʼ tu tuklikoʼob tubeel baʼax ku beetkoʼob wa baʼax ku yaʼalikoʼob, le oʼolal yaan horaeʼ ku arrepentiroʼob. Chéen baʼaleʼ le máaxoʼob ku tuklikoʼob tubeel baʼax ku yaʼalikoʼob wa baʼax ku beetkoʼobeʼ ku chʼaʼtuklikoʼob u beetkoʼob baʼax maʼalob (Proverbios 29:11).
U tuklik baʼaxten anchaj le problemaoʼ (Proverbios 18:13). Wa tsʼoʼok u beetaʼaltech junpʼéel baʼax maʼ justoeʼ tukle: «¿Baʼaxten tu beetaj? ¿Yaan wa baʼax ku yúuchultiʼ? ¿Kux túun wa maʼ u yóoliliʼ úuchik u beetkiʼ?». Yaan kʼiineʼ jeʼel k-tuklikeʼ u yóoliliʼ úuchik u beetiktoʼon u kʼasaʼanileʼ pero yaan horaeʼ maʼ beyiʼiʼ.

¿Baʼaxoʼob ku tuklaʼal yoʼolal u vengarkuba máak?

Baʼax ku yaʼalik máak: Si le Bibliaoʼ ku yaʼalikeʼ maʼ kʼaas ka u vengartuba máakiʼ, ¿maʼ wa ku yaʼalikeʼ wa yaan máax «tu puchʼaj u yich wa máaxeʼ unaj xan u puʼuchʼul u yich»? (Levítico 24:20).

U jaajil: Le ka aʼalaʼab tiʼ le israelitaʼob wa yaan ‹máax ku puchʼik u yich wa máaxeʼ unaj xan u puʼuchʼul u yicheʼ› maʼ táan kaʼach u yaʼalaʼaltiʼob ka u vengartubaʼobiʼ. Baʼaxeʼ aʼalaʼab utiaʼal maʼ u píitmáan u kʼab le sacerdoteʼob kéen u castigartoʼob wa máaxoʼ (Deuteronomio 19:15-21). b

Baʼax ku yaʼalik máak: Como le Biblia ku yaʼalik maʼ unaj u vengarkuba máakoʼ pues maʼ tu páajtal k-defendertikba.

U jaajil: Tiʼ le máaxoʼob ku beetaʼal injusticiaʼoboʼ yaan u derechoil tiʼob u kaxtikoʼob u yáantaj le autoridadoʼob utiaʼal u defenderkubaʼoboʼ. Pero kex ka u beet máakeʼ unaj u kʼaʼajsikeʼ le Bibliaoʼ ku yaʼalikeʼ maʼ unaj u baʼateltʼaaniʼ (Proverbios 17:14).

a Le Bibliaoʼ ku yaʼalikeʼ u kʼaabaʼ Dioseʼ Jéeoba.

b Wa a kʼáat a wojéelt u maasil yoʼolal lelaʼ ilawil le xook «Le ley tsʼaʼab úuchjeakiloʼ, ¿ku yaʼalik wa ka u vengartuba máak?».