¿Máaxoʼob kun binoʼob kaʼan?
Baʼax ku yaʼalik le Bibliaoʼ
Dioseʼ tsʼoʼok u yéeyik u jaats máakoʼob utiaʼal ka kuxlakoʼob teʼ kaʼanoʼ (1 Pedro 1:3, 4). Letiʼobeʼ kʼaʼabéet u seguer u kuxtaloʼob jeʼex uts tu tʼaan Dioseʼ yéetel kʼaʼabéet u seguer u muʼukʼaʼankúuntik u fejoʼob, tumen wa maʼ tu beetkoʼobeʼ maʼ ken u kʼamoʼob le kuxtal teʼ kaʼanoʼ (Efesios 5:5; Filipenses 3:12-14).
¿Baʼax ken u beetoʼob teʼ kaʼanoʼ?
Le máaxoʼob yéeyaʼanoʼoboʼ yaan u beetik u reyiloʼob yéetel u sacerdoteiloʼob, tsʼoʼoleʼ yaan u múul meyajoʼob yéetel Jesús ich 1,000 años (Apocalipsis 5:9, 10; 20:6). Letiʼobeʼ yaan u gobernaroʼob ichil u túumben gobierno Dios yaan teʼ kaʼanoʼ (tiʼ le gobiernooʼ teʼ Bibliaoʼ ku yaʼalaʼaltiʼ «túumben kaʼan») yéetel yaan u gobernaroʼob tu yóokʼol le máaxoʼob kajaʼanoʼob way Luʼumeʼ (tiʼ le máakoʼob kun kajtaloʼob way Luʼumeʼ teʼ Bibliaoʼ ku yaʼalaʼaltiʼob «túumben luʼum»). Letiʼobeʼ yaan u yáantajoʼob utiaʼal ka kuxlakoʼon ich kiʼimak óolal jeʼex u tukultmil Dios desde ka tu beetaj wíinikeʼ (Isaías 65:17; 2 Pedro 3:13).
¿Jaytúul máakoʼob kun binoʼob kaʼan?
Le Bibliaoʼ ku yaʼalikeʼ chéen 144,000 máakoʼob kun binoʼob kaʼan (Apocalipsis 7:4). Tiʼ junpʼéel náayeʼ le apóstol Juanoʼ tu yilaj «le Taman [Jesucristo le tsʼoʼok u kaʼa kuxkíintaʼaloʼ] waʼalakbal teʼ Montaña Siónoʼ, tu yéeteleʼ yaan 144,000 máakoʼob[iʼ]» (Apocalipsis 14:1-3; Juan 1:29; 1 Pedro 1:19). Le Montaña Siónoʼ ku yeʼesik le páajtalil tsʼoʼok u tsʼaʼabal tiʼ Jesucristooʼ bey xan tiʼ le 144,000 máakoʼob kun gobernaroʼob tu yéetel teʼ kaʼanoʼ (Salmo 2:6; Hebreos 12:22).
Le máaxoʼob «tʼanaʼanoʼob» yéetel «yéeyaʼanoʼob» utiaʼal gobernar yéetel Cristo teʼ kaʼanoʼ kʼaj óolaʼanoʼob xan bey «u chan múuchʼ taman[oʼobeʼ]» (Apocalipsis 17:14; Lucas 12:32). Leloʼ ku yeʼesikeʼ le máaxoʼob kun binoʼob kaʼanoʼ junpʼíitoʼob tu tséel le bukaʼaj máaxoʼob meyajtik Diosoʼ (Juan 10:16).
Baʼaloʼob maʼ jaajtak ku kaʼansaʼal
Baʼax ku creertaʼal: Tuláakal le máaxoʼob utsoʼoboʼ yaan u binoʼob kaʼan.
U jaajil: Tuláakal le utsul máakoʼoboʼ yaan u pʼáatloʼob kajtal way Luʼumeʼ tumen bey u prometermil Diosoʼ (Salmo 37:11, 29, 34).
Jesúseʼ tu yaʼalaj: «Mix máak naʼakak teʼ kaʼanoʼ» (Juan 3:13). Yéetel le tʼaanoʼobaʼ Jesúseʼ tu yeʼeseʼ le máaxoʼob kíimoʼob antes tiʼ letiʼ jeʼex Abrahán, Moisés, Job yéetel Davideʼ maʼ binoʼob kaʼaniʼ (Hechos 2:29, 34). Letiʼobeʼ jach tu creertoʼob yaan u kaʼa kuxkíintaʼaloʼob utiaʼal u kajtaloʼob way Luʼumeʼ (Job 14:13-15).
Teʼ Bibliaoʼ le kéen u yaʼal «le yáax máakoʼob ku kaʼa kuxkíintaʼaloʼoboʼ» táan u tʼaan tiʼ le kun kuxtaloʼob teʼ kaʼanoʼ (Apocalipsis 20:6). Le baʼax ku yaʼalikaʼ ku yeʼesikeʼ yaan uláakʼ máakoʼob kun kaʼa kuxkíintbiloʼob pero letiʼobeʼ way Luʼum kun kuxtaloʼobeʼ.
Le Bibliaoʼ ku kaʼansikeʼ yáanal u Reino Dioseʼ «maʼ tun yantal kíimil» (Apocalipsis 21:3, 4). Le baʼax ku yaʼalik le tekstoaʼ way Luʼum kun úuchleʼ tumen teʼ kaʼanoʼ minaʼan kíimiliʼ.
Baʼax ku creertaʼal: Cada máak kun yéeyik tuʼux kun kajtal, teʼ kaʼanoʼ wa teʼ Luʼumaʼ.
U jaajil: Dios yéeyik tiʼ máax ku tsʼáaik «le premiooʼ» wa le kuxtal teʼ kaʼanoʼ (Filipenses 3:14). Le clase kuxtalaʼ chéen Dios jeʼel u páajtal u yaʼalik tiʼ máax ken u tsʼáaeʼ (Mateo 20:20-23).
Baʼax ku creertaʼal: Le u kuxtal máak minaʼan u xuul way Luʼumeʼ chéen utiaʼal le máaxoʼob maʼ tu merecerkoʼob u kuxtaloʼob teʼ kaʼanoʼ.
U jaajil: Tiʼ le máaxoʼob kun kajtaloʼob minaʼan u xuul way Luʼumeʼ Dioseʼ ku yaʼaliktiʼob «in kaajal», «le máaxoʼob in yéeymoʼ» yéetel «le chʼiʼibal bendecirtaʼan tumen Jéeobaoʼ» (Isaías 65:21-23). Letiʼob kun béeykuntik le baʼax u tukultmaj Dios desde le ka tu beetaj wíinikoʼ: u kuxtal máak minaʼan u xuul tiʼ junpʼéel jatsʼuts Paraíso (Génesis 1:28; Salmo 115:16; Isaías 45:18).
Baʼax ku creertaʼal: Le 144,000 máakoʼob ku yaʼalaʼal tu libroil Apocalipsisoʼ maʼ chéen letiʼob kun binoʼob kaʼaniʼ.
U jaajil: Kex tu libroil Apocalipsis ku chʼaʼchiʼitaʼal números simbólicoseʼ pero yaan horaeʼ le número ku chíikpajloʼ jach letiʼe bukaʼaj taak u yaʼalikoʼ. Junpʼéel ejemploeʼ letiʼe «doce kʼaabaʼob yaan tiʼ u doce apóstoloʼob le Tamanoʼ» (Apocalipsis 21:14). Koʼoneʼex ilik uláakʼ ejemploʼob eʼesik de ke le 144,000 jach exacto.
Apocalipsis 7:4, ku yaʼalikeʼ le «jaytúul le sellartaʼaboʼoboʼ [wa le máaxoʼob yéeyaʼaboʼob utiaʼal u kajtaloʼob teʼ kaʼanoʼ] ciento cuarenta y cuatro mil u túulaloʼob», tsʼoʼoleʼ ku yaʼalik xaneʼ ilaʼab «yaʼabkach máakoʼob mix máak ku páajtal u xokik». Le «yaʼabkach máakoʼob[aʼ]» salvartaʼaboʼob xan (Apocalipsis 7:9, 10). Wa le número 144,000 chéen simbólico yéetel láayliʼ táan u tʼaan tiʼ le yaʼabkach máakoʼoboʼ bejlaʼa maʼ tu chíikpajal u jelaʼanil tiʼ le kaʼa jaats máakoʼob ku yúuchul tʼaan teʼ Bibliaoʼ. a
Tsʼoʼoleʼ le 144,000 máakoʼoboʼ «maʼanoʼob ichil le wíinikoʼob utiaʼal ka kʼuʼubkoʼob tiʼ Dios yéetel tiʼ le Taman bey jeʼex le yáax ich ku tsʼáaik le paakʼaloʼoboʼ» (Apocalipsis 14:4). Le kéen u yaʼal «maʼanoʼob [...] jeʼex le yáax ich ku tsʼáaik le paakʼaloʼoboʼ» ku tsʼáaik naʼatbileʼ chéen u chan jaats tiʼ le bukaʼaj máaxoʼob meyajtik Dios kun binoʼob kaʼanoʼ. Letiʼobeʼ yaan u gobernaroʼob yéetel Cristo tu yóokʼol le yaʼabkach máakoʼob kun pʼáatloʼob kajtal way Luʼumeʼ (Apocalipsis 5:10).
a Le profesor Robert Thomasoʼ ka tʼaanaj yoʼolal le 144,000 ku yaʼalaʼal teʼ Apocalipsis 7:4, tu yaʼalaj: «Le baʼax ku yaʼalik le tekstoaʼ ku yeʼesik jach jaytúuloʼob, pero maʼ bey u yúuchul yéetel le yaʼabkach máakoʼob ku yaʼalaʼal teʼ capítulo 7 versículo 9. Wa jach tu jaajil chéen simbólico le númerooʼ u kʼáat túun u yaʼaleʼ mix junpʼéel tiʼ le númeroʼob ku chíikpajal tu libroil Apocalipsis jaajoʼ» (Revelation 1-7: An Exegetical Commentary [Comentario exegético de Apocalipsis 1-7], página 474).
Maʼ xaaneʼ jeʼel u yutstal xan ta wicheʼ
BAʼALOʼOB UNAJ A KANIK
¿Baʼax u Reino Dios?
Ka taal Jesús way Luʼumeʼ maases kaʼansajnaj yoʼolal u Reino Dios. Úuch joʼopʼok u kʼáataʼal ka taalak u Reino Dios.
TEKSTOʼOB KU MAAS TSOʼOLOL
Apocalipsis 21:1 | «Junpʼéel túumben kaʼan yéetel junpʼéel túumben luʼum»
¿Yaan wa uláakʼ tekstoʼob eʼesik baʼax u kʼáat u yaʼal le versículoaʼ?
U KAʼANSAJ LE BIBLIAOʼ
Kʼáat ka tsʼaʼabaktech xook
Kʼáat ka tsʼaʼabaktech xook yéetel le Bibliaoʼ, ilawil bix jeʼel a beetik le baʼax ka kanikoʼ.