¿Ku núukik wa Dios le oraciónoʼob k-beetkoʼ?

PAX ICH

Baʼax ku yaʼalik le Bibliaoʼ

Jaaj, ku núukik. Yaan tekstoʼob tiʼ le Biblia bey u yeʼesikoʼ. Tsʼoʼoleʼ le baʼaxoʼob uchaʼan ichil u kuxtal jujuntúul máakoʼoboʼ ku yeʼesik Dioseʼ ku núukik le oraciónoʼoboʼ. Le Bibliaoʼ ku yaʼalik: «Ku tsʼáaik tiʼ le máaxoʼob meyajtik le baʼax ku kʼáatkoʼoboʼ, ku salvarkoʼob le kéen u yuʼub táan u kʼáatkoʼob áantaj» (Salmo 145:19). Chéen baʼaleʼ utiaʼal u núukik Dios k-oraciónoʼobeʼ yaan baʼaxoʼob ku páaʼtik ka k-beete.

Bix u kʼáat Dios ka orarnakoʼon

Maʼ unaj k-orar tiʼ Jesúsiʼ, tiʼ Maríaiʼ, tiʼ le santoʼoboʼ, le ángeloʼoboʼ wa tiʼ le imagenoʼoboʼ, chéen unaj k-orar tiʼ Dios. Le Bibliaoʼ ku yaʼalikeʼ Jéeoba Dioseʼ letiʼe máax «uʼuyik le oraciónoʼoboʼ» (Salmo 65:2).
Maʼ unaj k-kʼáatik baʼaloʼob ku bin tu contra u voluntad Diosiʼ (1 Juan 5:14).
Unaj k-orar tu kʼaabaʼ Jesús, beyoʼ k-reconocertik le autoridad yaantiʼoʼ. Jesúseʼ tu yaʼalaj: «Mix máak ku náatsʼal tu yiknal le Taata wa maʼ tin woʼolaloʼ» (Juan 14:6).
Unaj k-creertik yaan u tsʼaʼabaltoʼon le baʼax k-kʼáatik ich oraciónoʼ. Tsʼoʼoleʼ wa k-uʼuyik ku bineltiktoʼon fejeʼ unaj k-kʼáatik tiʼ Dios (Mateo 21:22; Lucas 17:5).
Orarnen yéetel u jaajil a wóol yéetel reconocert kʼeban máakech. Le Bibliaoʼ ku yaʼalik: «Kex Jéeoba tiaʼan teʼ kaʼanoʼ ku biskuba yéetel le máax humildeoʼ» (Salmo 138:6).
Maʼ u xuʼulul a orar. Jesúseʼ tu yaʼalaj: «Maʼ u xuʼulul a kʼáatkeʼex baʼax kʼaʼabéetteʼex, tumen yaan u tsʼaʼabalteʼex» (Lucas 11:9).

Jujunpʼéel baʼaloʼob maʼ tu chʼaʼik en cuenta Dios

Tuʼux u taal máak. Le Bibliaoʼ ku yaʼalik: «Dioseʼ mix máak jelaʼan u paktik, baʼaxeʼ tiʼ tuláakal kaajeʼ ku kʼamik jeʼel máaxak ku beetik baʼax maʼalobeʼ yéetel jeʼel máaxak u chʼaʼamaj saajkilil tiʼeʼ» (Hechos 10:34, 35).
Bix unaj u yantal máak. Jeʼel u páajtal u orar máak tiʼ Dios kex kulukbal, kex xolokbal wa kex waʼalakbaleʼ (1 Crónicas 17:16; Nehemías 8:6; Daniel 6:10; Marcos 11:25).
Wa k-orar kʼaʼam wa chaambelil. Le Bibliaoʼ ku yaʼalikeʼ Dioseʼ ku núukik tak le oraciónoʼob k-beetik ichil k-puksiʼikʼaloʼ (Nehemías 2:1-6).
Kex chichan wa nojoch le problema yaantoʼonoʼ. Le Bibliaoʼ ku yaʼalik: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7).