Le Bibliaoʼ ku yaʼalik baʼax unaj u beetik máak utiaʼal u xuʼulul u jach yaatal u yóol (Salmo 32:1-5). Wa ta beetaj junpʼéel baʼax maʼ maʼalob yéetel ka arrepentireʼ Dioseʼ yaan u perdonarkech yéetel yaan u yáantkech utiaʼal ka xuʼuluk u sen yaatal a wóol (Salmo 86:5). Le Bibliaoʼ ku yaʼalikeʼ maʼ kʼaas ka yaachajak u yóol máak yaan kʼiiniʼ tumen ku yáantaj utiaʼal u yutskíintik baʼax maʼ maʼalob tu beetiʼ (Salmo 51:17; Proverbios 14:9). Chéen baʼaleʼ le Bibliaoʼ ku yaʼalik xaneʼ kʼaʼabéet u kanáantik máak maʼ u jach lúubul u yóol, maʼ u tuklik wa mix bikʼin ken u kaʼa utskíint u kuxtal bey xan wa mix baʼal u biilal tu táan Dios. Le tuukul beyaʼ jeʼel u beetik u jach tristetal máakeʼ yéetel jeʼel u beetik u sen yaatal u yóol u puksiʼikʼaleʼ (2 Corintios 2:7).

•  ¿Baʼax jeʼel u beetik u yaatal a wóoleʼ?

•  ¿Baʼax unaj a beetik utiaʼal maʼ u jach yaatal a wóol?

•  Tekstoʼob ku tʼaanoʼob tiʼ u arrepentir yéetel u perdonartaʼal máak

 Yaʼab baʼax jeʼel u beetik u yaatal a wóoleʼ. Maʼ xaaneʼ yaan baʼax maʼ maʼalob ta waʼalaj wa ta beetaj tiʼ juntúul máax a yaabiltmaj, maʼ xaan xaneʼ yaan baʼax tsʼoʼok u xáantal táan a tuklik a beetik pero maʼ béeyak tak beoraeʼ. Yaan horaeʼ jeʼel u yuʼubik máak tiʼ letiʼ yanchaj u culpail junpʼéel baʼax maʼ letiʼ beetiʼ. Por ejemploeʼ wa yaan máax u kʼáat ka jóokʼok maʼalobil tuláakal baʼaleʼ jeʼel u lúubul u yóol wa maʼ tu jóokʼol jeʼex u tuklikoʼ. Le Bibliaoʼ ku yaʼalikeʼ maʼ unaj u taaskuba máak jach justoiʼ wa u tuklik jach maʼalob kun jóokʼol tuláakal baʼax ku beetik (Eclesiastés 7:16).

 Maʼ a tuklik wa minaʼan utskíinajil tiʼ le baʼax úuchoʼ. Beet tuláakal le ku páajtal utiaʼal a wutskíintik. ¿Baʼax jeʼel u páajtal a beetkeʼ?

•   Reconocert yaan baʼax maʼ maʼalob ta beetiʼ. Orarnen tiʼ Jéeoba a yéetel kʼáat perdón tiʼ (Salmo 38:18; Lucas 11:4). Jéeobaeʼ yaan u yuʼubik a oración yéetel yaan u perdonarkech wa maʼ ta kaʼa lúubul tiʼ le baʼax maʼ maʼalob ta beetoʼ (2 Crónicas 33:13; Salmo 34:18). Jéeobaeʼ ‹chúukaʼan u yóol tiʼ máak yéetel toj baʼax ku beetik›, le oʼolal kéen u yil jach tu jaajil táan a tsʼáaik a wóol a beet baʼax maʼalobeʼ yaan u perdonarkech (1 Juan 1:9; Proverbios 28:13).

   Wa yaan baʼax maʼ maʼalob ta beetaj tiʼ wa máaxeʼ kʼáat perdón tiʼ, beyoʼ yaan a reconocertik yaan baʼax maʼ maʼalob ta beetajtiʼiʼ. Kex maʼ fácileʼ maʼ a sajaktal a kʼáat perdón, beyoʼ ka weʼesik humildeech. Wa ka kʼáatik ka perdonartaʼakecheʼ yaan a wuʼuyikaba tranquiloil yéetel yaan a biskaba maʼalob tu yéetel (Mateo 3:8; 5:23, 24).

•   Unaj a tuukul tiʼ le baʼax ku yaʼalik le Biblia yoʼolal bix u chʼaʼik óotsilil Diosoʼ. Utiaʼal a wilik junpʼéel ejemploeʼ xok 1 Juan 3:19, 20. Teʼeloʼ ku yaʼalikeʼ yaan kʼiineʼ ‹k-puksiʼikʼaleʼ ku takik k-pool›, kéen úuchuk lelaʼ jeʼel u tuklik máak mix baʼal u biilaleʼ yéetel maʼ yaabiltaʼan tumen Diosiʼ. Le teksto xanoʼ ku yaʼalikeʼ «Dioseʼ maas nojoch tiʼ k-puksiʼikʼal», lelaʼ u kʼáat u yaʼaleʼ Dioseʼ u kʼaj óoloʼon tubeel, u yojel bix k-uʼuyikba, tsʼoʼoleʼ u yojel yéetel baʼax k-luchar. U yojel xan kʼeban máakoʼon yéetel yaan horaeʼ k-beetik baʼax maʼ maʼalobiʼ (Salmo 51:5). b Le oʼolal letiʼeʼ ku kʼamik le máaxoʼob ku arrepentiroʼob tu jaajil u yóoloʼoboʼ (Salmo 32:5).

•   Maʼ a kaʼa kʼaʼajsik le baʼax úuchoʼ. Le Bibliaoʼ ku tsikbaltik bix úuchik u kʼexik u kuxtal yaʼab xiiboʼob yéetel koʼoleloʼob ku beetkoʼob baʼaloʼob maʼ maʼalobtak kaʼachiʼ. Juntúul tiʼ letiʼobeʼ Saulo de Tarso, ka máan kʼiineʼ kʼaj óoltaʼab bey apóstol Pabloeʼ. Letiʼ kaʼacheʼ tiaʼan ichil u religión le fariseoʼoboʼ, le oʼolal tu chʼaʼpachtaj u discípuloʼob Jesús (Hechos 8:3; 9:1, 2, 11). Le ka tu tsʼáaj cuenta ku bin tu contra Dios yéetel tu contra Jesús le baʼax ku beetkoʼ xuʼul u beetik. Ka máan kʼiineʼ kʼuch u beetuba u discípulo Jesús yéetel maʼ tu kaʼa kʼaʼajsaj le baʼaxoʼob úuchoʼ. Letiʼeʼ tu tsʼáaj cuenta perdonartaʼab tumen Jéeoba, le oʼolal jach tu tsʼáaj u yóol u tsikbalt u Tʼaan Dios tiʼ u maasil yéetel tu yilaj u náajaltik le kuxtal minaʼan u xuuloʼ (Filipenses 3:13, 14).

 Jeremías 31:34: «Teneʼ yaan in perdonartik le baʼax maʼ maʼalob u beetmoʼoboʼ yéetel maʼ ken in kaʼa kʼaʼajs u kʼebanoʼob».

 Baʼax u kʼáat u yaʼale: Dioseʼ jach tu jaajil ku perdonartik máak, maʼ tu chʼinik tu yich máak baʼax kʼaas u beetmaj.