¡Jeʼeleʼ! Le Bibliaoʼ ku yaʼalikeʼ Dioseʼ letiʼe «máax líiʼsik u yóol le máaxoʼob yaachajaʼan u yóoloʼoboʼ» (2 Corintios 7:6). Le Bibliaoʼ maʼ junpʼéel libro ku tʼaan tiʼ tsʼaakoʼobiʼ chéen baʼaleʼ tsʼoʼok u yáantik yaʼab máaxoʼob táan kaʼach u tuklik u kíimskubaʼob. Le baʼaxoʼob ku yaʼalikoʼ jeʼel u páajtal u yáantkech xaneʼ.

•  ¿Baʼax ku yaʼalik le Biblia ka k-beetoʼ?

•  ¿Ku tʼaan wa le Biblia tiʼ máaxoʼob taakchaj u kíimloʼoboʼ?

•  ¿Baʼax tekstoʼob jeʼel u yáantkech utiaʼal maʼ u seguer a tuklik a kíimskabaeʼ?

•  ¿Bix jeʼel k-áantik wa máax ku yaʼalik taak u kíimileʼ?

•  ¿Kux túun wa tsʼoʼok in yáax ilik in kíimskinba?

• ● Aʼal tiʼ wa máax bix a wuʼuyikaba.

   Le Bibliaoʼ ku yaʼalik: «Juntúul jach maʼalob amigoeʼ ku yeʼesik yaabilaj tiʼ tuláakal súutukil, tu kʼiinil táan u muʼyaj máakeʼ letiʼeʼ bey juntúul sukuʼuneʼ» (Proverbios 17:17).

   Baʼax u kʼáat u yaʼale: Wa yaan baʼax táan u sen beetik k-muʼyajeʼ kʼaʼabéet k-aʼalik.

   Wa maʼ ta waʼalik tiʼ mix máak bix a wuʼuyikabaeʼ yaan u jach aaltal le kuuch ka biskoʼ. Chéen baʼaleʼ wa ka tsikbaltikeʼ yaan u maas sáaltal a kuuch yéetel jeʼel u xuʼulul a chiʼichnaktaleʼ.

   Beet lelaʼ: Tsikbalt bejlaʼaʼ tiʼ juntúul a amigo wa tiʼ juntúul a láakʼtsil bix a wuʼuyikaba. a Jeʼel xan u páajtal a tsʼíibtik bix a wuʼuyikabaeʼ.

• ● Xeen yiknal doctor.

   Le Bibliaoʼ ku yaʼalik: «Le máaxoʼob toj u yóoloʼoboʼ maʼ kʼaʼabéettiʼob juntúul doctoriʼ, chéen baʼaleʼ le máaxoʼob kʼojaʼanoʼoboʼ kʼaʼabéettiʼob» (Mateo 9:12).

   Baʼax u kʼáat u yaʼale: Wa kʼojaʼanoʼoneʼ kʼaʼabéet k-bin yiknal doctor.

   Maʼ xaaneʼ le máax táan u tuklik u kíimskubaoʼ yaan junpʼéel kʼojaʼanil tiʼ tu tuukul. Le oʼolaleʼ maʼ unaj u suʼlaktal máak u kaxt áantajiʼ. Yaan tsʼaakoʼob jeʼel u yáantik máak wa yaan le kʼojaʼanil ti’a’.

   Beet lelaʼ: Ilawil a bin yiknal juntúul doctor ilik le kʼojaʼaniloʼob beyaʼ.

• ● Maʼ u tuʼubultech u yaabiltmech Dios.

   Le Bibliaoʼ ku yaʼalik: «¿Máasaʼ cinco mejen chʼíichʼoʼobeʼ suuk u koʼonoloʼob chéen tu yoʼolal kaʼapʼéel mejen taakʼin jach junpʼíit u tojoloʼob? Kex beyoʼ mix juntúul tiʼ letiʼob ku tuʼubsaʼaloʼob tumen Diosiʼ. [...] Maʼ a chʼaʼikeʼex saajkil, teʼexeʼ maas koʼoj a tojoleʼex ke yaʼab mejen chʼíichʼoʼob» (Lucas 12:6, 7).

   Baʼax u kʼáat u yaʼale: Dioseʼ u yaabiltmech.

   Maʼ xaaneʼ ka wuʼuyikaba chéen ta juunal, pero unaj a kʼaʼajsikeʼ Dioseʼ u yojel bix a wuʼuyikaba. Kex yaan kʼiin ka wuʼuyik maʼ taak u seguer a kuxtaleʼ Dioseʼ jach tu jaajil taak u yáantkech. Salmo 51:17, ku yaʼalik: «In Dios, techeʼ yaan a kʼamik junpʼéel puksiʼikʼal xeʼexetʼpajaʼan ku yuʼubik bey táan u peʼechʼleʼ». Jeʼex k-ilkoʼ Dioseʼ u yaabiltmech yéetel maʼ u kʼáat ka kíimkechiʼ.

   Beet lelaʼ: Kaxt teʼ Biblia baʼaxoʼob eʼesik u yaabiltmech Diosoʼ. Teʼ capítulo 24 tiʼ le Libro Acerquémonos a Jehová yaan a wilik jujunpʼéeloʼobiʼ.

• ● Orarnen tiʼ Dios.

   Le Bibliaoʼ ku yaʼalik: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7).

   Baʼax u kʼáat u yaʼale: Dioseʼ u kʼáat ka a tsikbalttiʼ jach bix a wuʼuyikaba.

   Dioseʼ jeʼel u yáantkech utiaʼal u kaʼa kiʼimaktal a wóoleʼ (Filipenses 4:6, 7, 13). Letiʼeʼ bey u yáantik le máaxoʼob taak u natsʼkubaʼob tu yiknaloʼ (Salmo 55:22).

   Beet lelaʼ: Orarnen bejlaʼeʼ, kéen a beeteʼ aʼal u kʼaabaʼ Jéeoba Dios yéetel aʼaltiʼ bix a wuʼuyikaba (Salmo 83:18). Aʼaltiʼ ka u yáantech utiaʼal maʼ u seguer u yaatal a wóol.

• ● Tuukulnen tiʼ le jatsʼuts baʼaxoʼob ken u beet Diosoʼ.

   Le Bibliaoʼ ku yaʼalik: «Le baʼax k-páaʼtikoʼ bey junpʼéel ancla utiaʼal k-kuxtaleʼ, tumen jach jeetsʼel yanil yéetel maʼ tu kʼexpajal» (Hebreos 6:19).

   Baʼax u kʼáat u yaʼale: Jeʼex junpʼéel kʼaʼamkach iikʼ ku suʼusutik junpʼéel barcoeʼ, le bix k-uʼuyikbaoʼ jeʼel u suʼusutkoʼon yéetel u pʼáatal maʼ t-kaxtik baʼax ku yúuchultoʼoneʼ. Chéen baʼaleʼ le baʼaloʼob jatsʼutstak ku yaʼalik le Bibliaoʼ jeʼel u yáantkoʼon utiaʼal u jéetsʼel k-tuukuleʼ.

   Ichil lelaʼ tiaʼan u luʼsaʼal tuláakal le baʼaxoʼob beetik k-muʼyajoʼ (Apocalipsis 21:4).

   Beet lelaʼ: Xok uláakʼ baʼaloʼob jatsʼutstak ken u beet Dios teʼ xook 5 tiʼ le folleto U maʼalob péektsiloʼob Dios

• ● Beet baʼaxoʼob jatsʼuts a wilik.

   Le Bibliaoʼ ku yaʼalik: «Junpʼéel puksiʼikʼal kiʼimak u yóoleʼ bey junpʼéel tsʼaakeʼ» (Proverbios 17:22).

   Baʼax u kʼáat u yaʼale: U beetik máak baʼax uts tu yicheʼ ku yáantik utiaʼal maʼ u sen tuukul.

   Beet lelaʼ: Jeʼel u páajtal a wuʼuyik paaxeʼ, a xokik wa baʼax uts ta wich wa a beetik uláakʼ baʼal jeʼel u líiʼsik a wóoleʼ. Jeʼel xan u kiʼimaktal a wóol wa ka wáantik u maasil kex maʼ jach nojoch baʼal ka a beet tu yoʼolaloʼobiʼ (Hechos 20:35).

• ● Kanáantaba.

   Le Bibliaoʼ ku yaʼalik: «U beetik ejercicio máakeʼ» ku taasik utsil (1 Timoteo 4:8).

   Baʼax u kʼáat u yaʼale: A beetik ejercicio, a janal yéetel a wenel maʼalobeʼ jeʼel u beetiktech utseʼ.

   Beet lelaʼ: Jóoʼs tiempo utiaʼal a chich xíimbal sáamsamal kex chéen quince minutos.

• ● Unaj a kʼaʼajsikeʼ jeʼel u kʼexpajal bix u yuʼubikuba máakeʼ.

   Le Bibliaoʼ ku yaʼalik: «Maʼ a wojleʼex baʼax kun úuchul yéetel a kuxtaleʼex tu kʼiinil sáamaliʼ» (Santiago 4:14).

   Baʼax u kʼáat u yaʼale: Le baʼaxoʼob k-muʼyajtikoʼ jeʼel u yutstal kéen máanak kʼiineʼ, tak le k-tuklik minaʼan utskíinajil tiʼoboʼ.

   Kex yaj le baʼax ku yúuchultechoʼ ilawil maʼ u lúubul a wóol (2 Corintios 4:8). Le baʼax ka aktáantikoʼ jeʼel u kʼexpajal kéen máanak kʼiineʼ, pero wa ku kíimskuba máakeʼ tsʼoʼok tiʼ beyoʼ.

   Beet lelaʼ: Xok teʼ Biblia u tsikbalil le máaxoʼob taakchaj u kíimloʼob tumen jach yaachajaʼan u yóoloʼoboʼ. Ilawil baʼax áantoʼob utiaʼal ka u kʼex u tuukuloʼob. Koʼox tʼaan tiʼ jujuntúuloʼobiʼ.

 Jaaj. Le Bibliaoʼ ku yaʼalikeʼ anchaj máaxoʼob bey tuukulnajoʼoboʼ. Chéen baʼaleʼ Dioseʼ maʼ tu kʼeyoʼobiʼ, baʼaxeʼ tu yáantoʼob. Dios xaneʼ láayliʼ taak u yáantkecheʼ.

Elías

•  ● ¿Máax le máakaʼ? Letiʼeʼ juntúul profeta kaʼachi, kex beyoʼ yaan kʼiineʼ lúub u yóol. Santiago 5:17 ku yaʼalikeʼ «Elías kaʼacheʼ juntúul máak jeʼex toʼoneʼ».

•  ● ¿Baʼaxten taakchaj u kíimil? Elías kaʼacheʼ tu yuʼububa tu juunal, sajakchaji yéetel tu tuklaj mix baʼal u biilal. Le oʼolal tu yaʼalaj: «Jéeoba, luʼs in kuxtaliʼ» (1 Reyes 19:4).

•  ● ¿Baʼax áante? Elíaseʼ tu yaʼalaj tiʼ Dios bix u yuʼubikuba. ¿Bix líiʼsaʼabik u yóol? Jéeobaeʼ tu yeʼesajtiʼ u yaabiltmaj yéetel jeʼel u páajtal u yáantikeʼ. Tu yaʼalaj xan tiʼ yaan u biilal tu táan yéetel tsʼaʼab juntúul máax áantik.

•  ▸ Kan u maasil tiʼ Elías: 1 Reyes 19:2-18.

Job

•  ● ¿Máax le máakaʼ? Letiʼeʼ juntúul máak ayikʼal, yaʼab u paalal yéetel tu yuʼubaj u tʼaan Dios.

•  ● ¿Baʼaxten taakchaj u kíimil? Jobeʼ chéen ka téek kʼexpaj u kuxtal. Pʼáat minaʼan mix baʼal tiʼ, kíim u paalal yéetel tsaʼay junpʼéel kʼaakʼas kʼojaʼanil tiʼ. Tsʼoʼoleʼ aʼalaʼabtiʼeʼ táan u muʼyaj yoʼolal baʼax u beetmaj. Jach náakʼ tiʼ tuláakal baʼax ku yúuchultiʼeʼ ka tu yaʼalaj: «Maʼ in kʼáat ka seguernak in kuxtaliʼ» (Job 7:16).

•  ● ¿Baʼax áante? Jobeʼ orarnaj tiʼ Dios yéetel áantaʼab tumen uláakʼ máaxoʼob (Job 10:1-3). Áantaʼab xan tumen Eliú, juntúul u amigo, utiaʼal ka u kʼex u tuukul. Chéen baʼaleʼ le baʼax maas áantoʼ letiʼe úuchik u kʼamik u yáantaj Diosoʼ.

•  ▸ Kan u maasil tiʼ Job: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Máax le máakaʼ? Letiʼeʼ juntúul profeta kaʼachi yéetel tu nuʼuktaj u yúuchben kaajil Israel.

•  ● ¿Baʼaxten taakchaj u kíimil? Moiséseʼ jach kaʼani tumen yaʼab meyaj yaan kaʼach tiʼ, tsʼoʼoleʼ mantatsʼ táan u yaʼalaʼal baʼal tiʼ. Le oʼolal tu yaʼalaj tiʼ Dios: «Beet uts a xuʼulsikten beoraaʼ» (Números 11:11, 15).

•  ● ¿Baʼax áante? Moiséseʼ tu yaʼalaj tiʼ Dios bix u yuʼubikuba. Dios túuneʼ tu beetaj u sáaltal u kuuch le oʼolal tu tsʼáaj máaxoʼob áantik.

•  ▸ Kan u maasil tiʼ Moisés: Números 11:4-6, 10-17.