Jeʼeleʼ. Dioseʼ taak u yáantik le máaxoʼob kʼojaʼanoʼoboʼ. Le Bibliaoʼ ku yaʼalikeʼ kéen kʼojaʼanchajak máakeʼ «maʼ kun pʼatbil tumen Jéeoba» (Salmo 41:3). Koʼox ilik óoxpʼéel baʼaloʼob jeʼel u páajtal k-beetik wa yaantoʼon junpʼéel kʼojaʼanil minaʼan tsʼaakil tiʼeʼ:

1.   K-kʼáatik tiʼ Dios ka u yáantoʼon. «Le jeetsʼelil maʼ tu páajtal u naʼataʼal tumen wíinik ku tsʼáaik Diosoʼ» jeʼel u yáantkoʼon utiaʼal maʼ k-sen chiʼichnaktaleʼ yéetel jeʼel u yáantkoʼon k-aktáant le baʼax táan u yúuchultoʼonoʼ (Filipenses 4:6, 7).

2.   Maʼ u lúubul k-óol. Le Bibliaoʼ ku yaʼalik: «Junpʼéel puksiʼikʼal kiʼimak u yóoleʼ bey junpʼéel tsʼaakeʼ, pero le máax yaachajaʼan u yóoloʼ ku pʼáatal minaʼan u muukʼ» (Proverbios 17:22). U kiʼimaktal u yóol máakeʼ jeʼel u yáantaj utiaʼal maʼ u sen tuukul yéetel maʼ u maas kʼojaʼantaleʼ.

3.   K-tuukul tiʼ baʼaxoʼob ken u beet Dios. Le baʼaxoʼob ku yaʼalik Diosoʼ jeʼel u yáantkoʼon utiaʼal u kiʼimaktal k-óol kex kʼojaʼanoʼoneʼ (Romanos 12:12). Le Bibliaoʼ ku yaʼalikeʼ yaan u kʼuchul u kʼiinil mix máak ken u yaʼal: «Kʼojaʼanen» (Isaías 33:24). Dioseʼ yaan u luʼsik tuláakal le kʼojaʼaniloʼob maʼ béeyak u luʼsaʼal tumen le científicoʼoboʼ. Tsʼoʼoleʼ ku yaʼalik xaneʼ mix máak kun chʼíijil, le Bibliaoʼ ku yaʼalik: «Pʼáatak maas maʼalob u wíinklil ke tu táankelmil, pʼáatak jeʼex kaʼach tu paalileʼ» (Job 33:25).

 Nota: U testigoʼob Jéeobaeʼ ku confiaroʼob tiʼ Dios chéen baʼaleʼ wa ku kʼojaʼantaloʼobeʼ ku binoʼob yiknal doctor (Marcos 2:17). Kex beyoʼ maʼatech k-aʼalik tiʼ mix máak baʼax tratamientoil unaj u kʼamik, leloʼ cada juntúul máak chʼaʼtuklik.