Maestro’ob jach estricto’ob, a presionartaʼal tumen a wéet xooko’ob, exámenoʼob jach difíciltakoʼob yéetel yaʼabkach tareaʼob. Yoʼolal lelaʼ k-naʼatik bix a wuʼuyikaba wa maʼ taak a bin escuela. Juntúul x-chʼúupal ku kʼaabaʼtik Racheleʼ a ku yaʼalik:

 «Jeʼel in wóotik bin jeʼel tuʼuxakeʼ menos escuela. ¡Maas jeʼel in wóotik bin playaeʼ, in wantal yéetel in amigoʼob wa tak in wáantik in papáʼob u beetoʼob le janaloʼ wa le limpiezaoʼ!».

 Maʼ xaaneʼ wa ka wuʼuyikaba jeʼex Racheleʼ jeʼel a tuklikeʼ a bin xookeʼ bey jeʼex ka kʼaʼalkech cárceleʼ yéetel yaan a jóokʼol hasta le kéen a graduartabao’. Baʼaleʼ ¿baʼax jeʼel u yáantkech utiaʼal maʼ a wilik le escuela bey junpʼéel cárceloʼ?

 ¿A wojel wa? Wa mantatsʼ ka máansik ta tuukul baʼaxten ka bin escuelaeʼ yaan a maas disfrutartik yéetel yaan a tsʼáaik a wóoliʼ. Yaan a wilkeʼ le baʼaxoʼob ka kanik escuelaoʼ jach yaʼab utsiloʼob ken u taastech kéen máanak kʼiin.

 Utiaʼal u maas jatsʼutstal a wilik a bin xookeʼ tuukulnen tiʼ le utsiloʼob ken u taastechoʼ.

 Le xookoʼ ku prepararkech. Wa ka tsʼáaik a wóol xookeʼ le kéen nojochchajkecheʼ maas fácil ken a beet jeʼel baʼalak meyajileʼ yéetel maas fácil xan ken a wutskíint le problemas kun antal ichil a kuxtaloʼ. Wa yaan kʼiin maʼ taak a bin xookeʼ tukulte: «¿Yaan wa utsiloʼob ken u taasten wa kin tsʼáaik in wóoliʼ?».

 Teksto jeʼel u yáantajeʼ: «Kanáant le naʼatoʼ bey xan le maʼalob tuukul yaantechoʼ» (Proverbios 3:21).

 Yaʼab baʼaloʼob ken a kane. Tuláakal le baʼaxoʼob ka beetik utiaʼal a xookoʼ jeʼel u yáantkech utiaʼal ka meyajnaktech tubeel a tiempoeʼ yéetel a beetkaba responsableil. Lelaʼ yaan u yáantkech a beet junpʼéel maʼalob meyaj kéen nojochchajkech. Tukle: «In bin escuelaeʼ, ¿bix u yáantken utiaʼal in beetkinba responsableil yéetel in beetik junpʼéel maʼalob meyaj? ¿Yaan wa tiʼ baʼax jeʼel u páajtal in mejorareʼ?».

 Teksto jeʼel u yáantajeʼ: «Jeʼel baʼaxak meyajileʼ ku taasik utsil» (Proverbios 14:23).

 Yaan a kanik a bisaba maʼalob yéetel u maasil. A biskaba yéetel u maasileʼ jeʼel u yáantkech utiaʼal a kanik a tsʼáaba tu lugar u maasileʼ yéetel a respetarkoʼob. Joshuaeʼ ku yaʼalik: «A kanik a bisaba yéetel u maasileʼ jach importante jeʼex a xokik historia yéetel cienciaeʼ. Tumen leloʼ yaan u yáantkech ichil a kuxtal». Tukulte: «Le escuelaoʼ, ¿bix tsʼoʼok u yáantken utiaʼal in biskinba maʼalob yéetel u maasil, tak yéetel le máaxoʼob yaanal baʼal ku creerkoʼob wa yaanal tuʼux u taaloʼoboʼ?».

 Teksto jeʼel u yáantajeʼ: «Ilawileʼex ka yanakteʼex jeetsʼelil yéetel tuláakal máak» (Hebreos 12:14).

 Yaan u yáantkech kéen máanak kʼiin. Le xookoʼ jeʼel u yáantkech a wil baʼax meyajil a kʼáat a beeteʼ yéetel a tsʼáaik a wóol a maas kane. Brookeeʼ ku yaʼalik: «Maʼ xaaneʼ desde beoraeʼ jeʼel u páajtal a tsʼáaik a wóol a kan junpʼéel meyaj uts ta wicheʼ. Teneʼ bey tin beetiloʼ. Beyoʼ le kéen a graduartabaeʼ tsʼoʼok a jach kanik a beet le meyajoʼ». Tukulte: «¿Baʼax meyajil ken in beet kéen in graduartinba? ¿Baʼax unaj in xokik utiaʼal in kanik in beet le meyajoʼ?».

 Teksto jeʼel u yáantajeʼ: «Ilawil wa maʼalob tuʼux ka jetsʼik a wook» (Proverbios 4:26, Quiliʼich Biblia ich Maya).