Maʼ xaaneʼ yaan máax uts ta wich yéetel tsʼoʼok u káajal a biskaba tu yéetel utiaʼal a wilkeʼex wa jeʼel u páajtal u tsʼoʼokol a beeleʼexeʼ. Chéen baʼaleʼ yaan baʼaxoʼob unaj a chʼaʼik en cuenta kéen káajak a biskaba yéetel wa máax.

Teʼ xookaʼ yaan a wilik:

•  Aʼal u jaajil kéen tsikbalnakech

•  Maʼ igual bix a tuukuleʼexiʼ

•  Yaan a estresar

 Mientras maas yaʼab tiempo ka máansik yéetel le máax táan a biskabaoʼ ka maas kʼaj óoltik. Yaan horaeʼ yaan a wojéeltik yaʼab baʼaxoʼob tu yoʼolal chéen ikil a wilik baʼaxoʼob ku beetik.

 Chéen baʼaleʼ deporsi yaan baʼaloʼob kʼaʼabéet a múul tsikbaltikeʼex. Pero le kéen a beeteʼexeʼ aʼaleʼex u jaajil. Maʼ a tuus chéen tumen saajkech ka u pʼatech.

 Baʼaloʼob kʼaʼabéet a múul tsikbaltikeʼex:

•   Taakʼin. ¿Yaan wa a pʼaax? ¿Difícil wa a wilik a kanáantik a taakʼin? Wa ku tsʼoʼokol a beeleʼexeʼ, ¿bix kun meyajteʼex le taakʼinoʼ?

•   Toj óolal. ¿Kʼojaʼanech wa? ¿Tsʼoʼok wa u yáax tsaʼayaltech junpʼéel pakʼbeʼen kʼojaʼanil?

•   Metas. ¿Baʼax metasil yaantech? ¿Igual wa a metas yéetel le máax táan a biskabaoʼ? Kéen tsʼoʼokok a beeleʼexeʼ, ¿láayliʼ wa jeʼel u kiʼimaktal a wóol kex maʼ tu páajtal a chukpachtik a metaseʼ?

•   Familia. ¿Yaan wa máax táan a mantenertik ichil a familia? ¿Kux túun kéen máanak kʼiin? ¿Taak wa u yantal a paalal? Wa beyoʼ, ¿jaytúul?

 Kéen tʼaanakech tiʼ le baʼaloʼobaʼ jach aʼal u jaajil, maʼ a tuus. Maʼ a waʼalik wa baʼax chéen utiaʼal a lúubul utsil tiʼ a novio wa tiʼ a novia (Hebreos 13:18).

 Tukult lelaʼ: ¿Baʼaxoʼob jach kʼaʼabéet a wojéeltik yoʼolal a novio wa a novia? ¿Yaan wa baʼax kʼaʼabéet u yojéeltik ta woʼolal? Wa ka chʼaʼtuklikeʼex u tsʼoʼokol a beeleʼexeʼ, ¿jeʼel wa u yáantkeʼex le a waʼalikeʼex u jaajil desde beoraaʼ?

 Teksto jeʼel u yáantajeʼ: «Cada juntúuleʼ u yaʼal u jaajil tiʼ u yéet máakil» (Efesios 4:25).

 Ariana, junpʼéel año tsʼoʼokok u beeleʼ, ku yaʼalik: «Maʼ xaaneʼ le x-chʼúupaloʼ jeʼel u tuklikeʼ ich seis meseseʼ jeʼel u comprometerkubaʼobeʼ, pero le xiʼipaloʼ maʼ xaaneʼ táan u tuklikeʼ hasta ichil junpʼéel año. Wa ka úuchuk beyoʼ le x-chʼúupaloʼ jeʼel u yaatal u yóoleʼ tumen ku tuklik kaʼacheʼ séeb kun tsʼoʼokol u beeloʼob, le oʼolaleʼ jach kʼaʼabéet u tsikbaltikoʼob le baʼaloʼob beyaʼ».

 Mix máak igual u tuukul. Le bix líiʼsaʼanil máak yéetel le tuʼux u taaloʼ jeʼel u beetik maʼ u tuukul jeʼex techeʼ, le oʼolaleʼ maʼ a páaʼtik ka yanakteʼex junpʼéeliliʼ tuukul.

 Tukult lelaʼ: Wa yaan tiʼ baʼaloʼob maʼ igual a tuukuleʼex yéetel maʼ tu bin tu contra baʼax ku yaʼalik le Bibliaoʼ, ¿jeʼel wa a wóotik a kʼex a tuukuleʼex utiaʼal u yantal jeetsʼelileʼ?

 Teksto jeʼel u yáantajeʼ: «Tuláakal máak unaj u yojéeltik bukaʼaj utsil a puksiʼikʼaleʼex» (Filipenses 4:5).

 Matthew, cinco años tsʼoʼokok u beeleʼ, ku yaʼalik: «Kex jach a yaabiltmabaʼexeʼ deporsi yaan u yantal tiʼ baʼaloʼob maʼ de acuerdoʼexiʼ. Pero le baʼax maas importanteoʼ letiʼe a weʼeskeʼex jatsʼuts modos teʼ súutukiloʼob maʼ de acuerdoʼexoʼ».

 Kéen káajak a biskaba yéetel wa máaxeʼ yaan a máansik yaʼab tiempo tu yéetel, leloʼ jeʼel u beetik a estresareʼ. ¿Baʼax jeʼel u yáantkecheʼ?

 Tsʼáa u pʼiis le tiempo ka máansik yéetel a novio wa a noviaoʼ, beyoʼ yaan u béeytal a beetik uláakʼ baʼaloʼob kʼaʼanaʼantak yéetel yaan xan u páajtal a máansik tiempo yéetel a amigoʼob. Alana, cinco años tsʼoʼokok u beeleʼ, ku yaʼalik: «Maʼ a tuʼubsik a amigoʼob chéen tumen tsʼoʼok u káajal a biskaba yéetel wa máax. Tumen tak ka tsʼoʼokok a beeleʼ láayliʼ yaan u kʼaʼabéettaltechoʼobeʼ».

 Maʼ u tuʼubultecheʼ kéen tsʼoʼokok a beeleʼ yaan a tsʼáaik u pʼiis tuláakal baʼax ka beetik. Le oʼolaleʼ maʼalob ka a kan a usart tubeel le tiempo desde beora táan a biskabaʼexeʼ.

 Tukult lelaʼ: ¿Ka exigirtik wa tiʼ le máax yéetel ka biskaba ka u máans yaʼab tiempo ta wéeteloʼ? ¿Ka wuʼuyik wa yaʼab baʼax ku exigirtiktech? Utiaʼal maʼ a estresareʼexeʼ, ¿baʼax jeʼel a beetkeʼex utiaʼal a tsʼáaikeʼex u pʼiis le tiempo ka múul máanskeʼexoʼ?

 Teksto jeʼel u yáantajeʼ: «Tuláakal baʼal yaan u súutukil, yaan u súutukil utiaʼal u beetaʼal tuláakal baʼal way yóokʼol kaabeʼ» (Eclesiastés 3:1).

 Daniel, dos años tsʼoʼokok u beeleʼ, ku yaʼalik: «Wa chéen ka máanskeʼex tiempo utiaʼal a náaysik a wóoleʼexeʼ le kéen tsʼoʼokok a beeleʼexeʼ yaan u yantalteʼex problemas. Le beetkeʼ maʼalob ka a múul beeteʼex uláakʼ baʼaloʼob jeʼex a bineʼex maan, a beetkeʼex jujunpʼéel meyajoʼob ichil a wotocheʼex yéetel a múul adorarkeʼex Jéeoba. Beyoʼ kéen tsʼoʼokok a beeleʼexeʼ yaan u binteʼex maʼalobil».

 Maʼ u tuʼubultecheʼ le tiempo ka máansik yéetel le máax táan a biskabaoʼ yaan u yáantkech utiaʼal a wilik wa yaan u tsʼoʼokol a beel tu yéetel wa maʼ. U yóox jaats le xookaʼ yaan u yáantkech a wil baʼaxoʼob kʼaʼabéet a chʼaʼik en cuenta utiaʼal a chʼaʼik le decisiónoʼ.