Cada añoeʼ ku yokjaʼ yaʼab paalaloʼob líiʼsaʼanoʼob ichil u familiaʼob u testigoʼob Jéeoba. ¿Kux túun teech táan wa a tuklik a wokjaʼ? Wa beyoʼ maʼalob ka a wil a naʼatik baʼax u kʼáat u yaʼal u kʼubik u kuxtal máak tiʼ Dios yéetel u yokjaʼ.

•  ¿Baʼax ku yeʼesik le okjaʼoʼ?

•  ¿Bix u kʼubik u kuxtal máak tiʼ Dios?

•  ¿Baʼaxten kʼaʼabéet u yokjaʼ máak?

•  Baʼax ku yaʼalik uláakʼ paalaloʼob

•  Baʼax ku yaʼalaʼal, baʼax unaj u beetaʼal

 Le Bibliaoʼ ku yaʼalikeʼ le kéen okjaʼanak máakeʼ kʼaʼabéet u láaj tʼuʼubul u wíinklil ichil le jaʼoʼ, maʼ chéen ku wiʼiwitsʼaʼal jaʼ tu pooliʼ. Tumen le u láaj tʼuʼubul u wíinklil máak ichil le jaʼoʼ yaan baʼax ku yeʼesik.

•   Le kéen tʼuʼubuk tuláakal a wíinklil ichil le jaʼoʼ ka weʼesik tu táan u maasileʼ de ke beoraaʼ maʼ ken a beet chéen baʼax uts ta tʼaan.

•   Le kéen jóokʼkech ichil le jaʼoʼ ka weʼesik táan a káajsik junpʼéel túumben kuxtal utiaʼal a beetik baʼax u kʼáat Dios.

 Le kéen okjaʼanakecheʼ ka weʼesik tu táan u maasil de ke ka creertik chéen tiʼ Jéeoba yaan u derechoil u yaʼalik baʼax maʼalob yéetel baʼax kʼaas. Tsʼoʼoleʼ ka weʼesik xan tiʼ u maasileʼ yaan a tsʼáaik a wóol a beet chéen baʼax u kʼáat Jéeoba.

 Tukult lelaʼ: ¿Baʼax péeksikech a chʼaʼtukult a wokjaʼ? Xok 1 Juan 4:19 yéetel Apocalipsis 4:11.

 Antes a wokjaʼeʼ kʼaʼabéet a kʼubik a kuxtal tiʼ Jéeoba. Pero ¿bix túun jeʼel a beetkeʼ?

 Utiaʼal a kʼubik a kuxtal tiʼ Jéeobaeʼ unaj a beetik junpʼéel oración tuʼux ka waʼaliktiʼeʼ mantatsʼ ken a beet baʼax u kʼáat kex jeʼel baʼaxak ka úuchkeʼ.

 Le kéen okjaʼanakecheʼ ka weʼesik tiʼ u maasil tsʼoʼok a prometertik tiʼ Jéeoba a beetik baʼax uts tu tʼaan. Lelaʼ bey jeʼex ka a waʼal tiʼ u maasil de ke tsʼoʼok a chʼaʼtuklik a pʼatik a kuxtal tu kʼab Jéeobaeʼ, a kuxtal bejlaʼeʼ u tiaʼal letiʼ (Mateo 16:24).

 Tukult lelaʼ: ¿Baʼaxten maas jeʼel u bintech utsil le kéen a pʼat a kuxtal tu kʼab Jéeobaeʼ? Xok Isaías 48:17, 18 yéetel Hebreos 11:6.

 Jesúseʼ tu yaʼalaj tiʼ u discípuloʼob unaj u yokjaʼob. Deporsi unaj u beetkoʼob wa u kʼáat u meyajtoʼob Dios (Mateo 28:19, 20). Teʼ kʼiinoʼob xanaʼ tuláakal máax u kʼáat u meyajt Dioseʼ unaj u yokjaʼ. Tsʼoʼoleʼ le Bibliaoʼ ku yaʼalikeʼ kʼaʼabéet u yokjaʼ máak utiaʼal u salvarkuba (1 Pedro 3:21).

 Pero maʼ u tuʼubultecheʼ wa ka wokjaʼeʼ kʼaʼabéet a beetik tumen a yaabiltmaj Jéeoba yéetel a kʼáat xan a bisaba tu yéetel. Maʼalob ka tuukulnakech jeʼex le salmista ka tu yaʼalaj: «¿Bix jeʼel in boʼotik tiʼ Jéeoba tuláakal le baʼaxoʼob tsʼoʼok u beetik tin woʼolaloʼ?». Letiʼeʼ tu yaʼalaj xan: «Yaan in chʼaʼchiʼitik u kʼaabaʼ Jéeoba. Yaan in beetik tuláakal baʼax in prometermaj tiʼ Jéeoba» (Salmo 116:12-14).

 Tukult lelaʼ: ¿Baʼaxoʼob tsʼoʼok u sen beetik Jéeoba ta woʼolal yéetel bix jeʼel a boʼotiktiʼeʼ? Xok Deuteronomio 10:12, 13 yéetel Romanos 12:1.