Teʼ kʼiinoʼobaʼ yaʼab paaloʼobeʼ táan u xookoʼob desde tu yotochoʼob. ¿Kux túun teech bey wa xan a beetkoʼ? Wa beyoʼ le baʼaxoʼob ken k-aʼal teʼ xookaʼ jach jeʼel u yáantkecheʼ. a

•  Cinco baʼaloʼob jeʼel u yáantkecheʼ

•  Baʼax ku yaʼalik uláakʼ paalaloʼob

•   Tsʼíibt baʼax hora ken a beet a tarea. Ilawil a beetik a tareaʼob teʼ hora suuk a beetik kaʼach kéen xiʼikech teʼ xookoʼ. Tsʼíibt xan baʼax hora ken a wáant a papáʼob ta wotoch. Wa ku kʼaʼabéettaleʼ jeʼel u páajtal a kʼexik u yorail kéen a beet cada baʼaleʼ.

   Baʼax ku yaʼalik le Bibliaoʼ: «Beetaʼak tuláakal baʼal tu nuʼuk yéetel tu tsoolol» (1 Corintios 14:40).

   Katieeʼ ku yaʼalik: «Teʼ escuelaoʼ tsʼaʼan u yorail a beetik cada baʼal, kex táan a xook ta wotocheʼ ilawil a beetik xan beyoʼ».

   Tukult lelaʼ: ¿Baʼaxten maʼalob ka a tsʼíibt baʼax hora ken a beet cada baʼal yéetel a takʼik tuʼux jeʼel u páajtal a wilkeʼ?

•   Ilawil a beetik jeʼel bix ta tsʼíibtiloʼ. Yaan horaeʼ maʼ tun taaktal a beetik le baʼax ta tsʼíibtoʼ. Chéen baʼaleʼ ilawil a beetik, maʼ a pʼatik utiaʼal uláakʼ kʼiin.

   Baʼax ku yaʼalik le Bibliaoʼ: «Tsʼáa a wóoleʼex meyaj, maʼ a maʼakʼóoltaleʼex» (Romanos 12:11).

   Alexandraeʼ ku yaʼalik: «Yaan horaeʼ maʼ tu beetik máak le baʼaxoʼob u tsʼíibtmoʼ, chéen baʼaleʼ kéen tsʼoʼokkeʼ jeʼel túun ku kaxkubaoʼ tumen niikil u meyaj».

   Tukult lelaʼ: ¿Baʼaxten maʼalob ka a beet le baʼaxoʼob ta tsʼíibtaj teʼ hora ta waʼaloʼ?

•   Kaxt junpʼéel lugar utiaʼal a xook. Ilawil wa maʼalob le tuʼux kan antaloʼ yéetel natsʼ tuláakal baʼax kun kʼaʼabéettaltech. Chéen baʼaleʼ maʼ u tuʼubultecheʼ maʼ nakaʼaj weenliʼ nakaʼaj xook. Wa minaʼan junpʼéel cuarto utiaʼal a xookeʼ jeʼel u páajtal a natsʼik junpʼéel mesa teʼ kʼóobenoʼ wa teʼ tuʼux ka weenloʼ.

   Baʼax ku yaʼalik le Bibliaoʼ: «Le baʼax ku chʼaʼtuklik le máax sáakʼóoloʼ ku jóokʼol maʼalobil» (Proverbios 21:5).

   Elizabeteʼ ku yaʼalik: «Líiʼs tuláakal le baʼaxoʼob jeʼel u náaysik a wóoloʼ. Wa yaantech celular xaneʼ éems u volumenil, jaʼaliʼ bey jeʼel a xook tubeeloʼ».

   Tukult lelaʼ: ¿Baʼax jeʼel a beetik utiaʼal maʼ u yantal baʼax náaysik a wóol teʼ tuʼux ka xookoʼ?

•   Maʼ u náayal a wóol. Le táan a xookoʼ maʼ a beetik uláakʼ baʼal tumen wa maʼeʼ yaan u náayal a wóol, maʼ tun jóokʼol maʼalob le baʼax ka beetkoʼ yéetel maʼ tan séeb tsʼoʼokol.

   Baʼax ku yaʼalik le Bibliaoʼ: «Ilawil u meyajteʼex tubeel le tiempo yaanteʼexoʼ» (Efesios 5:16).

   Oliviaeʼ ku yaʼalik: «Jach ku náayal kaʼach in wóol yéetel le celularoʼ yéetel yaʼab tiempo kin peʼertik».

   Tukult lelaʼ: ¿Baʼax jeʼel u páajtal a beetik utiaʼal maʼ u náayal a wóol yaʼab tiempo le táan a xookoʼ?

•   Beet yaanal baʼal. Jáan jóokʼen xíimbal, natʼ a bicicleta wa beet ejercicio. Wa yaan uláakʼ baʼal jatsʼuts a wilkeʼ jeʼel xan u páajtal a beetkeʼ. Chéen baʼaleʼ jeʼex u yaʼalik junpʼéel libroeʼ «táanileʼ tsʼoʼoks a tarea» (School Power). Le libroaʼ ku yaʼalik xaneʼ wa tsʼoʼok a láaj beetik a tarea kéen a náays a wóoleʼ maas yaan u kiʼimaktal a wóol.

   Baʼax ku yaʼalik le Bibliaoʼ: «Maas maʼalob jun chan súutuk jeʼelel ke yaʼab meyaj, tumen leloʼ bey jeʼex ka u chʼaʼpacht máak le iikʼoʼ» (Eclesiastés 4:6).

   Tayloreʼ ku yaʼalik: «Maʼalob ka a beet junpʼéel baʼal uts ta wich. Teʼ escuelaoʼ ku kaʼansaʼalten kaʼach paax yéetel dibujar, maʼ in tsʼáa cuenta kaʼach wa jach ku yáantken lelaʼ».

   Tukult lelaʼ: ¿Yaan wa baʼax uts ta wich a beetik jeʼel u yáantkecheʼ?