•  Baʼax unaj a chʼaʼik en cuenta

•  Baʼax jeʼel u páajtal a beetkeʼ

•  Baʼax ku yaʼalik uláakʼ paalaloʼob

 Wa ka wuʼuyik u tʼaan a taataʼobeʼ yaan u confiaroʼob tiʼ teech. A wuʼuyik u tʼaan a taataʼobeʼ bey jeʼex ka a boʼot junpʼéel pʼaaxeʼ. Wa ka boʼol jach tu kʼiinileʼ jeʼel u tsʼaʼabaltech uláakʼ a pʼaaxeʼ. Bey túun xanoʼ wa ka wuʼuyik u tʼaan a taataʼobeʼ jeʼel u chaʼikoʼob a beetik uláakʼ baʼaloʼobeʼ. Chéen baʼaleʼ wa maʼ ta wuʼuyik tʼaaneʼ maʼ a tuklik wa yaan u séeb tsʼaʼabaltech permiso tumen a taataʼob.

 Jeʼel u bisik tiempo u confiaroʼob tiʼ techeʼ. Utiaʼal u chaʼabal a beetik u maasil baʼaloʼobeʼ kʼaʼabéet a weʼesik tiʼ a taataʼob ka wuʼuyik u tʼaanoʼob.

 JUNPʼÉEL BAʼAX UCHAʼAN. Craig, juntúul xiʼipaleʼ ku yaʼalik: «Tin paalileʼ jach in wojel baʼax u kʼáat in taataʼob ka in beete. Le oʼolaleʼ kin beetik bey kin wuʼuyik u tʼaanoʼobeʼ, baʼaleʼ u jaajileʼ kin beetik chéen baʼax in kʼáat. Yoʼolal leloʼ xuʼul u confiaroʼob tiʼ teen. Kʼuch in naʼateʼ maʼ tu páajtal a tuus utiaʼal ka tsʼaʼabaktech u maasil permiso. Baʼaxeʼ utiaʼal u confiar a taataʼob tiʼ techeʼ kʼaʼabéet u yilkoʼob a tsʼaamaj a wóol a wuʼuy u tʼaanoʼob».

 Aʼal u jaajil kex ka muʼyajnakech. Yaan horaeʼ tuláakloʼon k-beetik baʼaloʼob maʼ maʼalobtakiʼ. Baʼaleʼ wa ka tuus bey xan wa maʼ ta láaj aʼalik jach baʼax úucheʼ yaan a beetik u xuʼulul u confiar a taataʼob tiʼ teech. Wa mantatsʼ ka waʼalik u jaajileʼ a taataʼobeʼ yaan u yilkoʼob tsʼoʼok u kʼantal a tuukul, beyoʼ yaan u confiaroʼob tiʼ teech.

 Annaeʼ ku yaʼalik: «Wa ka tuuseʼ mix máak kun confiar tiʼ teech, baʼaleʼ wa mantatsʼ ka waʼalik u jaajileʼ yaan u confiar u maasil tiʼ teech kex ka tʼóochpajkech yaan kʼiin».

 Le Bibliaoʼ ku yaʼalik: «K-kʼáat k-beet tuláakal baʼal tu nuʼuk bey xan yéetel x-maʼ tuusil» (Hebreos 13:18).

•   Tukult lelaʼ: Kéen kʼáataʼaktech tumen a taataʼob tuʼux ka bin yéetel baʼax ken a beeteʼ, ¿ka waʼaliktiʼob wa u jaajil? Wa kéen kʼáataʼaktech tuʼux binech yéetel baʼax ta beeteʼ, ¿ka tuskoʼob wa utiaʼal maʼ u yojéeltikoʼob baʼax ta beetaj?

 Beet baʼax ku yaʼalaʼaltech. Uʼuy u tʼaan a taataʼob yéetel beet le meyajoʼob tsʼaʼantech ta wotochoʼ. Ilawil a beetik tuláakal baʼal jeʼex u yaʼalaʼaltechoʼ. Beet a tareaʼob. Suunen teʼ hora ku yaʼalaʼaltechoʼ.

 Ryaneʼ ku yaʼalik: «Wa a taataʼob ku yaʼalikoʼobtech ka suunakech láas nueve áakʼabeʼ, suunen tu yorail. Wa ka suut láas diez y mediaeʼ maʼ a tuklik wa yaan u chaʼabal a jóokʼol tuláakʼ kʼiin».

 Le Bibliaoʼ ku yaʼalik: «Tumen cada juntúuleʼ yaan u bisik u kuuch» (Gálatas 6:5).

•   Tukult lelaʼ: ¿Suuk wa a suut teʼ hora ku yaʼalaʼaltechoʼ, a beetik le meyajoʼob tsʼaʼantech ta wotochoʼ yéetel a beetik baʼax ku yaʼalaʼaltech kex yaan hora maʼ uts ta tʼaaniʼ?

 Eʼes paciencia. Wa ku xuʼulul u confiar a taataʼob tiʼ techeʼ, kʼaʼabéet u yantaltech paciencia tak ken kaʼa confiarnakoʼob tiʼ baʼax ka beetik.

 Racheleʼ ku yaʼalik: «Jeʼex u bin kaʼach in maas nojochtaleʼ kin chiʼichnaktal tumen in taataʼobeʼ maʼ tu tsʼáaikoʼobten permiso utiaʼal in beetik uláakʼ baʼaloʼob. Baʼaleʼ maʼ in naʼat kaʼacheʼ kex táan in nojochtaleʼ maʼ u kʼáat u yaʼal wa tsʼoʼok u kʼantal in tuukuliʼ. Tin waʼalaj tiʼ in taataʼob ka u chaʼob in weʼesik jeʼel u páajtal u confiaroʼob tiʼ teneʼ. Kex tu bisaj tiempoeʼ béeychaj in beetik. Tin kaneʼ maʼ chéen tumen tsʼoʼok in nojochtal jeʼel u confiar u maasil tiʼ teneʼ, baʼaxeʼ kʼaʼabéet in weʼesik yéetel baʼaxoʼob kin beetik».

 Le Bibliaoʼ ku yaʼalik: «Seguernak a weʼeskeʼex máaxeʼexiʼ» (2 Corintios 13:5).

•   Tukult lelaʼ: Wa a kʼáat ka confiarnak a taataʼob tiʼ teech tu kaʼatéeneʼ, ¿baʼax jeʼel a beetkeʼ?

 BEET LELAʼ: Ilawil a suut tu yorail ta wotoch, a beetik le meyajoʼob ku yaʼalaʼaltech tumen a taataʼoboʼ wa uláakʼ baʼax ku yaʼalaʼaltech. Aʼal tiʼ a taataʼob máakalmáak ken a beetiʼ yéetel kʼáattiʼob baʼax ku páaʼtkoʼob ka a beet utiaʼal u confiaroʼob tiʼ teech. Tsʼoʼoleʼ ilawil a beetik le baʼax ku yaʼalik le Bibliaaʼ: «Unaj a pitkeʼex le úuchben modos yanchajteʼex tu yoʼolal le baʼaxoʼob ka beetkeʼex kaʼachoʼ» (Efesios 4:​22). Kéen máanak kʼiineʼ a taataʼobeʼ yaan u yilkoʼob bix a tsʼáaik a wóol a wuʼuy u tʼaanoʼob.