Carlaeʼ ku yaʼalik: «De temprano mientras táan in líiʼskinbaeʼ kin wuʼuyik paax bey xan le táan in manejaroʼ. Le tiaʼanen tin wotochoʼ mientras táan in jeʼelel, táan in limpiar wa tak le táan in xookoʼ kin wuʼuyik paax. Deporsi jach jatsʼuts in wuʼuyik paax».

 Kux túun teech, ¿jach wa uts ta tʼaan a wuʼuyik paax jeʼex Carlaeʼ? Wa beyoʼ le xookaʼ yaan u yáantkech a disfrutart le paaxoʼ, a kanáantkaba utiaʼal maʼ u afectarkech yéetel a yéeyik tubeel baʼax paaxiloʼob kéen a wuʼuye.

•  Utsiloʼob ku taasik

•  Bix jeʼel u afectartik máakeʼ

•  Baʼax ku yaʼalik uláakʼ paalaloʼob

 Antes a jaantik junpʼéel janaleʼ kʼaʼabéet a chʼaʼik en cuenta bix beetaʼanil yéetel bukaʼaj ken a jaantiʼ, bey xan u yúuchul yéetel le paaxoʼ kʼaʼabéet a wilik bix beetaʼanil yéetel bukaʼaj ken a wuʼuyiʼ. Tuukulnen tiʼ lelaʼ:

•   Le paaxoʼ jeʼel u kiʼimakkúuntik a wóoleʼ.

   Markeʼ ku yaʼalik: «Cuando maʼ maʼalob binikten teʼ kʼiinoʼ kin wuʼuyik le paax maas jatsʼuts in wuʼuyikoʼ, leloʼ ku beetik in wuʼuyikinba maʼalobil».

•   Le paaxoʼ ku beetik a kʼaʼajsik le jatsʼuts súutukiloʼob a máansmoʼ.

   Sheilaeʼ ku yaʼalik: «Yaʼab kʼaayoʼobeʼ ku kʼaʼajsikten le jatsʼuts súutukiloʼob in máansmoʼ, le kéen in wuʼuyoʼobeʼ ku beetkoʼob u kiʼimaktal in wóol».

•   Le paaxoʼ ku muchʼik máak.

   Tammyeʼ ku yaʼalik: «Tu beetaj in wokʼol le u tsʼook kʼaay t-kʼayaj teʼ asamblea internacional beetaʼab tumen u testigoʼob Jéeobaoʼ. Kex maʼ junpʼéeliliʼ idioma k-tʼankeʼ, le kʼaayoʼ tu beetaj k-uʼuyik junmúuchʼ yaniloʼon».

•   Le paaxoʼ jeʼel u maas maʼalobkíintik u modos máakeʼ.

   Anaeʼ ku yaʼalik: «Utiaʼal a kanik a pax junpʼéel instrumentoeʼ kʼaʼabéet a practicar yéetel u yantaltech paciencia, tumen ku bisik tiempo u kaanbal máak».

 ¿A wojel wa? Le Salmosoʼ, letiʼe libro maas chowak yaan teʼ Bibliaoʼ yéetel ku taasik 150 kʼaayoʼob.

 Junpʼéel paax maʼ maʼalobeʼ bey jeʼex junpʼéel janal tsʼoʼok u kʼastaleʼ, jeʼel u beetiktech kʼaaseʼ. Tuukulnen tiʼ lelaʼ:

•   U maas yaʼabil tiʼ le kʼaayoʼoboʼ ku tʼaanoʼob tiʼ sexo.

   Hannaeʼ ku yaʼalik: «Le kʼaayoʼob yaan de moda bejlaʼoʼ chéen tiʼ sexo ku tʼaanoʼob, tsʼoʼok u pʼáatal maʼ kʼaas u yuʼubaʼaliʼ».

   Le Bibliaoʼ ku yaʼalik: «Ichileʼexeʼ maʼ unaj u yúuchul tʼaan tiʼ le núupkʼebanoʼ, tiʼ tuláakal u jejeláasil baʼaloʼob kʼaastak bey xan tiʼ u píitmáan u tsʼíiboltaʼal wa baʼax» (Efesios 5:3). Tuukulnen tiʼ lelaʼ: «Le paaxoʼob suuk in wuʼuyikoʼ, ¿ku yáantkenoʼob wa in beet le baʼax ku yaʼalik le tekstoaʼ?».

•   Yaan paaxoʼobeʼ ku beetkoʼob u tristetal máak.

   Tammyeʼ ku yaʼalik: «Le paaxoʼob kin wuʼuyik de áakʼab mientras chilikbalenoʼ jach ku beetkoʼob in tristetal yéetel in chiʼichnaktal. Le paaxoʼob beyaʼ ku beetkoʼob in tuklik baʼaloʼob maʼ jach maʼalobtakiʼ».

   Le Bibliaoʼ ku yaʼalik: «Tiʼ tuláakal le baʼaxoʼob ka kanáantikoʼ, maas kanáant a puksiʼikʼal» (Proverbios 4:23).Tuukulnen tiʼ lelaʼ: «Le paaxoʼob kin wuʼuyikoʼ, ¿ku beetkoʼob wa in tuklik baʼaloʼob maʼ jach maʼalobtakiʼ?».

•   Yaan paaxoʼobeʼ ku beetkoʼob u séeb pʼuʼujul máak.

   Johneʼ ku yaʼalik: «Teneʼ in tuklikeʼ le paaxoʼob ku beetik u séeb pʼuʼujul máak yéetel u pʼektik u maasiloʼ jach peligrosoʼob. Tumen jeʼel tak u beetik u pʼektikuba máakeʼ. Tsʼoʼok in tsʼáaik cuentaeʼ in wuʼuyik paaxoʼob beyaʼ jach ku beetik in séeb pʼuʼujul. Tak in familiaeʼ bey u yaʼalikoʼobtenoʼ».

   Le Bibliaoʼ ku yaʼalik : «Kʼaʼabéet a tselkeʼex tiʼ teʼex tuláakal le baʼaloʼobaʼ: kʼuuxilil, pʼuʼujulil, kʼasaʼanil, poochʼilil bey xan kʼaakʼas tʼaanoʼob ku jóokʼol tu chiʼ máak» (Colosenses 3:8). Tuukulnen tiʼ lelaʼ: «¿Yaan wa paaxoʼob kin wuʼuyik ku beetik in séeb pʼuʼujul yéetel maʼ in chʼaʼik en cuenta bix u yuʼubikuba u maasil?».

 Kʼaʼajaktech lelaʼ: Yéey tubeel baʼax paaxil ken a wuʼuye. Juntúul x-chʼúupal ku kʼaabaʼtik Julieʼ bey u beetkoʼ, letiʼeʼ ku yaʼalik. «Mantatsʼ kin revisartik baʼax paaxiloʼob yaanten, wa kin wilik yaan maʼ maʼalobeʼ kin borrartik. Kex maʼ chéen chʼaʼabil in beetkeʼ in wojel letiʼe baʼax maas maʼaloboʼ».

 Juntúul x-chʼúupal ku kʼaabaʼtik Taraeʼ tsʼoʼok u káajal xan u beetik beyoʼ. Letiʼeʼ ku yaʼalik: «Yaan horaeʼ le kʼaayoʼob ku tsʼaʼabal teʼ radiooʼ jach séeb u pʼáatal tu tuukul máak, pero le kéen in jach uʼuy u letraileʼ kin wilkeʼ maʼ maʼalobiʼ. Le oʼolal kin jáan kʼexik u estacionil. Leloʼ bey jeʼex ka a pul ich basura junpʼéel pastel jach táant u káajal a jaantikeʼ. Wa desde bejlaʼa kin wilik in rechazartik junpʼéel kʼaay ku tʼaan tiʼ sexoeʼ jeʼel u yáantken utiaʼal in wilik maʼ u yantalten relaciones sexuales antes tiʼ u tsʼoʼokol in beeleʼ. Kin beetik lelaʼ tumen maʼ in kʼáat ka xiʼikten kʼaasil tu yoʼolal le paax kin wuʼuyikoʼ».