Le kéen a jeʼekʼabt le Bibliaoʼ, ¿máasaʼ chéen letraʼob ka wilkiʼ? Maʼ xaaneʼ le oʼolal maʼ tu jáan taaktal a xokik. Junpʼéel baʼax jeʼel u yáantkecheʼ letiʼe ka a tukult le Bibliaoʼ bey jeʼex junpʼéel mesa chuup yéetel yaʼab baʼaloʼob utiaʼal jaantbileʼ, teech yéeyik baʼax taak a jaantik yéetel bukaʼaj ken a jaantiʼ.

 Utiaʼal a jóoʼsik u yutsil u xookil le Biblia ku keʼetel yéetel junpʼéel «kiʼikiʼ janaloʼ» kʼaʼabéet a concentrarkaba tiʼ baʼax ku yaʼalik. Le xookaʼ yaan u yáantkech a wil bix jeʼel a beetkeʼ.

Teʼ xookaʼ yaan a kanik:

•  ¿Baʼaxten kʼaʼabéet a concentrarkaba tiʼ baʼax ku yaʼalik le Bibliaoʼ?

•  ¿Baʼax jeʼel u yáantkech a jóoʼs u yutsil u xookil le Bibliaoʼ?

•  Baʼax ku yaʼalik uláakʼ paalaloʼob

 Wa chéen jáajan xook ka beetkeʼ maʼ yaʼab baʼax jeʼel a kanikeʼ, pero wa ka concentrarkabaeʼ maas yaʼab utsil jeʼel a kʼamkeʼ. Lelaʼ bey jeʼex u beetaʼal junpʼéel té utiaʼal u yukʼ máakeʼ, utiaʼal u chaʼik u gustoeʼ unaj u xáantal ichil le choko jaʼoʼ.

 Bey xan u yúuchul le kéen a xok le Bibliaoʼ, según bukaʼaj tiempo ka dedicartik tiʼeʼ bey xan ken u yáantilech ichil a kuxtaloʼ. Le kéen xooknakecheʼ suukchajak a tuukul tiʼ le baʼax ka xokikoʼ beyoʼ táan a beetik jeʼex le máax tsʼíibt le Salmo 119. Letiʼeʼ tu yaʼalaj yoʼolal u Tʼaan Dios: «Bul kʼiin táan in tuukul tiʼ letiʼob» (Salmo 119:97).

 Lelaʼ maʼ u kʼáat u yaʼal wa bul kʼiin ken a xok le Bibliaoʼ mix wa bul kʼiin kan tuukul tiʼ baʼax ku yaʼalik. Baʼax kʼaʼabéeteʼ letiʼe a beetik jeʼex le salmistaoʼ, letiʼeʼ úuchik u jóoʼsik u súutukil u xokik u Tʼaan Dioseʼ le áant utiaʼal u chʼaʼik maʼalob decisiónoʼob (Salmo 119:98-100).

 Melanieeʼ ku yaʼalik: «Juntéeneʼ in maamaeʼ tu yaʼalajten: ‹Yaantech bul semana utiaʼal a beetik jeʼel baʼaxak a kʼáateʼ. ¿Maʼ wa túun tu béeytal a jóoʼsik u chan súutukil utiaʼal tsʼáa tiʼ Jéeobaiʼ? Leloʼ letiʼe baʼax kʼaʼabéet a beetkoʼ›».

 U suuktal a tuukul tiʼ le baʼax ku yaʼalik le Bibliaoʼ jeʼel u yáantkech a chʼaʼa maʼalob decisiónoʼobeʼ, por ejemploeʼ jeʼel u yáantkech a yéey maʼalob a amigoʼobeʼ bey xan kéen probartaʼakech.

•   Beet junpʼéel programa. Juntúul x-chʼúupal ku kʼaabaʼtik Juliaeʼ ku yaʼalik: «Beet junpʼéel programa utiaʼal a xokik le Bibliaoʼ. Tsʼíibt baʼax ken a xoke, tuʼuxiʼ yéetel baʼax kʼiin».

•   Kaxt junpʼéel lugar tranquilo. Juntúul x-chʼúupal ku kʼaabaʼtik Giannaeʼ ku yaʼalik: «Maʼalob ka a kaxt junpʼéel lugar tranquilo utiaʼal a xook, tsʼoʼoleʼ aʼal xan tiʼ a familia maʼ u interrumpirkechoʼob».

   Wa suuk a xook tiʼ celular wa tiʼ tableteʼ tup u notificaciónesil. Maas maʼalob xan wa ka meyajnaktech le Biblia imprimirtaʼanoʼ. Tsʼoʼok u yilaʼaleʼ wa ku xokik máak junpʼéel libro imprimirtaʼaneʼ maas ku naʼatik baʼax ku xokik.

   Juntúul x-chʼúupal ku kʼaabaʼtik Elenaeʼ ku yaʼalik: «Kéen xooknaken tin celular wa tin tableteʼ séebaʼan in distraer tumen láalaj hora ku kʼuchul notificaciónes tiʼ, ku yaʼalikten taʼaytak u descargar wa ku pʼáatal minaʼan Internet tiʼ... Le oʼolal maas maʼalob in wilik in xook tiʼ junpʼéel libro imprimirtaʼan tumen chéen kʼaʼabéet sáasil le tuʼux kin xookoʼ».

•   Orarnen. Kʼáat tiʼ Jéeoba ka u yáantech utiaʼal ka a naʼat, ka a kʼaʼajs yéetel ka a jóoʼs u yutsil le baʼax ken a xokoʼ (Santiago 1:5).

   Utiaʼal a weʼesik táan a beetik le baʼax ta kʼáataj tiʼ Jéeoba ich oraciónoʼ ilawil a maas xakʼaltik le baʼax táan a xokikoʼ. Por ejemplo, wa táan a xook teʼ JW Library bey xan wa táan a xokik le Biblia ich Internetoʼ jeʼel u páajtal a wojéeltik u maasileʼ, chéen tsʼáankʼabt yóokʼol le teksto táan a xokikoʼ.

•   Tuukulnen tiʼ lelaʼ. «¿Baʼax ku kaʼansikten yoʼolal Jéeoba le baʼax kin xokikaʼ? ¿Ku tʼaan wa tiʼ junpʼéel u jatsʼuts modos jeʼel xan u páajtal in weʼesikeʼ?» (Efesios 5:1). «¿Baʼax kin kanik tiʼ le baʼax táan in xokikaʼ? ¿Bix jeʼel in tsʼáaik ichil in kuxtaleʼ?» (Salmo 119:105). «¿Bix jeʼel u meyajten utiaʼal in wáantik u maasileʼ?» (Romanos 1:11).

   Le baʼax kin xokikaʼ, ¿baʼax ku kaʼansikten yoʼolal le derecho yaan tiʼ Jéeoba utiaʼal u gobernar yéetel u santificartaʼal u kʼaabaʼoʼ? Le preguntaaʼ jach importante tumen tuláakal le Bibliaoʼ, desde Génesis tak Apocalipsiseʼ, ku tʼaan tiʼ bix ken u santificartil u kʼaabaʼ Jéeoba yéetel bix ken u yeʼesil chéen tiʼ letiʼ yaan u derechoil u gobernar.