¿Tiʼ baʼax chíikaʼan le concienciaoʼ?

•   tiʼ junpʼéel mapa (wa junpʼéel GPS)

•   tiʼ junpʼéel néen

•   tiʼ juntúul amigo

•   tiʼ juntúul juez

 U jaajileʼ chíikaʼan tiʼ le cuatro baʼaloʼobaʼ. Teʼ xookaʼ yaan k-ilik baʼaxten bey k-aʼalikoʼ.

•  ¿Baʼax le concienciaoʼ?

•  ¿Baʼaxten unaj a kaʼansik a conciencia?

•  ¿Bix jeʼel a kaʼansik a concienciaeʼ?

•  Baʼax ku yaʼalik uláakʼ paalaloʼob

 Le concienciaoʼ ku yaʼaliktech baʼax uts yéetel baʼax kʼaas. Le Bibliaoʼ ku yaʼalikeʼ le concienciaoʼ bey jeʼex junpʼéel ley tsʼíibtaʼan tu puksiʼikʼal máakeʼ (Romanos 2:15). Wa a kaʼansmaj maʼalob a concienciaeʼ yaan u yáantkech utiaʼal a wilik wa maʼalob le baʼax ta beetoʼ bey xan wa maʼalob le baʼax a kʼáat a beetoʼ.

•   Le concienciaoʼ bey jeʼex junpʼéel mapa (wa junpʼéel GPS). Ku yáantkech utiaʼal maʼ a saʼatal.

•   Le concienciaoʼ bey jeʼex junpʼéel néeneʼ. Ku yeʼesiktech jach bix a modos.

•   Le concienciaoʼ bey jeʼex juntúul amigoeʼ. Ku tsoliktech u nuʼuk, le oʼolal unaj a beetik u cuentail.

•   Le concienciaoʼ bey jeʼex juntúul juezeʼ. Kéen a beet baʼax maʼ maʼalobeʼ ku takik a pool.

 Baʼax k-kanik: Le concienciaoʼ ku yáantkoʼon 1) utiaʼal k-beetik baʼax maʼalob yéetel 2) utiaʼal k-utskíintik le baʼaloʼob maʼ maʼalobtak k-beetkoʼ.

 Le Bibliaoʼ ku yaʼalik: «Maʼ u xuʼulul u yantalteʼex junpʼéel maʼalob conciencia» (1 Pedro 3:16). Wa maʼ a kaʼansmaj tubeeleʼ yaan u talamtal tech a beetik.

 Jennifereʼ ku yaʼalik: «Kaʼacheʼ maʼatech in waʼalik tiʼ in taataʼob tuʼux kin máan. Kin tuskoʼob, le oʼolal maʼ tranquilo in concienciaiʼ chéen baʼaleʼ ka tsʼoʼokeʼ suukchaj tiʼ».

 Tu tsʼookeʼ Jennifereʼ tu yaʼalaj tiʼ u taataʼob baʼax ku beetik, bey pʼáatik tranquilo u concienciaoʼ.

 Tukult lelaʼ: ¿Tiʼ baʼax súutukil kaʼach unaj u yuʼubik Jennifer u tʼaan u conciencia?

 Mattheweʼ ku yaʼalik: «Jach maʼ maʼalob u yuʼubikuba máak wa táan u beetik baʼax maʼalob chéen baʼaleʼ táan xan u beetik baʼax kʼaas. Kex chéen juntéen ka u chaʼa a conciencia a beetik baʼax maʼ maʼalobeʼ wa maʼ ta kanáantikeʼ yaan u maas kʼastal».

 Yaʼab máakoʼobeʼ maʼatech u chʼaʼikoʼob en cuenta baʼax ku yaʼalik u concienciaʼob. Tumen jeʼex u yaʼalik le Bibliaoʼ «tsʼoʼok u pʼáatal jach junpuliʼ maʼ u yojloʼob baʼax uts yéetel baʼax kʼaasiʼ» (Efesios 4:19).

 Tukult lelaʼ: ¿Ku bin wa maʼalobil tiʼ le máaxoʼob ku beetkoʼob baʼaloʼob kʼaastakoʼ? ¿Tiʼ baʼax problema jeʼel u yoksikubaʼobeʼ?

 Baʼax k-kanik: Utiaʼal u yantaltoʼon junpʼéel maʼalob concienciaeʼ kʼaʼabéet u yantaltoʼon naʼat utiaʼal k-ojéeltik ‹baʼax maʼalob bey xan baʼax maʼ maʼalobiʼ› (Hebreos 5:14).

 Kaʼans baʼax maʼalob tiʼ a conciencia, chéen baʼaleʼ beet xan baʼax ku yaʼaliktech. Yaʼab máakoʼobeʼ ku beetkoʼob le baʼax ku kaʼansaʼaltiʼob tumen:

•   u láakʼtsiloʼob

•   uláakʼ táankelmoʼob

•   le máaxoʼob jach famosoʼoboʼ

 Chéen baʼaleʼ le baʼaxoʼob ku kaʼansik le Bibliaoʼ maas maʼalobtak. Tumen le Bibliaoʼ «tiʼ Dios u taal» yéetel teʼeloʼ tiʼ ku yaʼaliktoʼon baʼax unaj k-beetik utiaʼal u bintoʼon maʼalob (2 Timoteo 3:16).

 Koʼoneʼex ilik jujunpʼéel ejemploʼob.

 LE BIBLIAOʼ KU YAʼALIK: «K-kʼáat k-beet tuláakal baʼal tu nuʼuk» (Hebreos 13:18).

•   Le tekstoaʼ, ¿bix u yáantkech le kéen taakak a beetik trampa ta examen, a tusik a taataʼob wa a wookol?

•   Wa a conciencia ku péeksikech a beet baʼax maʼalobeʼ, ¿bix jeʼel u yáantkech bejlaʼaʼ yéetel teʼ kʼiinoʼob ku taaloʼoboʼ?

 LE BIBLIAOʼ KU YAʼALIK: «Púutsʼeneʼex tiʼ le núupkʼebanoʼ» (1 Corintios 6:18).

•    Le tekstoaʼ, ¿bix u yáantkech utiaʼal maʼ a chaʼantik pornografía yéetel utiaʼal maʼ u yantal baʼax a wil yéetel wa máax antes u tsʼoʼokol a beel?

•   Wa a conciencia ku yaʼaliktech ka púutsʼkech tiʼ le núupkʼebanoʼ, ¿jeʼel wa ta tʼaan u yáantech teʼ kʼiinoʼobaʼ yéetel maas táanileʼ?

 LE BIBLIAOʼ KU YAʼALIK: «Eʼes a wutsileʼex ta baatsileʼex, paklan chʼaʼ óotsiltabaʼex yéetel paklan perdonartabaʼex tu jaajil a wóoleʼex» (Efesios 4:32).

•    Le tekstoaʼ, ¿bix jeʼel u yáantkech wa yaan kʼiin maʼ ta tsʼáaikaba de acuerdo yéetel a sukuʼunoʼob wa yéetel a amigoʼob?

•   Wa a conciencia ku péeksikech utiaʼal a perdonar yéetel a chʼaʼik óotsilileʼ, ¿baʼax utsiloʼob jeʼel u taasiktech bejlaʼaʼ yéetel teʼ kʼiinoʼob ku taaloʼoboʼ?

 LE BIBLIAOʼ KU YAʼALIK: «Jéeobaeʼ [...] u pʼekmaj le máaxoʼob uts tu tʼaan u beetkoʼob looboʼ» (Salmo 11:5).

•    Le tekstoaʼ, ¿bix jeʼel u yáantkech kéen a wil baʼax videojuegoil wa baʼax películail ken a chaʼanteʼ?

•   Wa a conciencia ku yaʼaliktech maʼ a chaʼantik baʼaloʼob tuʼux ku beetaʼal loobeʼ, ¿bix a tuklik jeʼel u yáantkech bejlaʼaʼ yéetel teʼ kʼiinoʼob ku taaloʼoboʼ?

 BAʼAX UCHAʼAN: Jeremyeʼ ku tsikbaltik baʼax úuchtiʼ: «Yaan tiʼ in amigoʼob kaʼacheʼ suuk u báaxtikoʼob videojuegoʼob tuʼux ku kíimsaʼal máak, teen xaneʼ láayliʼ bey in beetik kaʼachoʼ. Chéen baʼaleʼ in papáeʼ tu yaʼalajten maʼ in báaxtik le videojuegos beyaʼ. Le beetkeʼ kin bin tu yotoch in amigoʼob utiaʼal in báaxal tu yéeteloʼob, kéen suunaken tin wotocheʼ maʼ tin waʼalik mix baʼal. In papáeʼ ku kʼáatikten baʼax ku yúuchulten pero teneʼ kin waʼaliktiʼ mix baʼal. Juntéenjeakeʼ tin xokaj Salmo 11:5, ka tsʼoʼokeʼ joʼopʼ u yaatal in wóol yoʼolal le baʼax kin beetkoʼ yéetel tin tsʼáaj cuentaeʼ unaj u xuʼulul in báaxtik le videojuegosoʼ. Ka túun tin pʼataj. Yoʼolal leloʼ juntúul in amigoeʼ xuʼul u báaxtik xan le clase videojuegosoʼ».

 Tukult lelaʼ: ¿Baʼax kʼiin ka káaj u avisartaʼal Jeremy tumen u conciencia? ¿Tiʼ baʼax súutukil tu yuʼubaj u tʼaan u conciencia? ¿Baʼax jeʼel a kanik tiʼ le baʼax úuch tiʼ Jeremiyoʼ?

 Baʼax k-kanik: Le concienciaoʼ ku yeʼesik jach máaxech yéetel baʼaxoʼob a tsʼaamaj táanil ichil a kuxtal. ¿Kux túun a conciencia baʼax ku yeʼesik ta woʼolal?