«Yaan yéetel le in nojoch utsil kin weʼesiktechoʼ, tumen in podereʼ ku maas chíikpajal le kéen pʼáatak minaʼan a muukʼ» (2 Corintios 12:9, Túumben Luʼum).

 «Chéen in siibal utsil kʼaʼabéet tiʼ teech, tumen in páajtalileʼ ku yeʼeskuba [maas] maʼalob wa juntúul máak minaʼan u muukʼ» (2 Corintios 12:9, Quiliʼich Biblia ich Maya).

 Dioseʼ tu yaʼaleʼ yaan u tsʼáaik tiʼ apóstol Pablo le muukʼ kʼaʼabéet utiaʼal ka páajchajak u aktáantik jeʼel baʼaxak problemaileʼ.

 «Yaan yéetel le in nojoch utsil kin weʼesiktechoʼ». Le baʼax tu núukaj Dios tiʼ Pablooʼ jeʼel xan u béeytal u traducirtaʼal beyaʼ: «Chéen in wutsil kʼaʼabéet tiʼ teech». Leloʼ u kʼáat u yaʼaleʼ utiaʼal ka béeyak u aktáantik Pablo jeʼel baʼaxak problemaileʼ chéen kʼaʼabéettiʼ le utsil ku yeʼesik Diosoʼ. Le tʼaan «nojoch utsil» wa «utsiloʼ» táan u tʼaan tiʼ junpʼéel regalo wa siibal ku tsʼáaiktoʼon Dios kex maʼ t-merecertik. Le baʼaxoʼob tu tsʼíibtaj Pablooʼ ku yeʼesik bix eʼesaʼabik utsil tiʼ tumen Dios. Pablo kaʼacheʼ ku chʼaʼpachtik le máaxoʼob meyajtik Diosoʼ, pero kex beyoʼ Dioseʼ tu yáantaj utiaʼal ka u kʼex u tuukul yéetel utiaʼal ka u yáant xan u maasil máakoʼob utiaʼal ka u meyajtoʼob Dios (1 Corintios 15:9, 10; 1 Timoteo 1:12-14). Pabloeʼ jach tu jaajil u yojleʼ yaan u yáantaʼal tumen Dios utiaʼal ka páajchajak u aktáantik jeʼel baʼaxakeʼ.

 «In podereʼ ku maas chíikpajal le kéen pʼáatak minaʼan a muukʼ». Yuumtsil Jéeobaeʼ a tu kʼaʼajsaj tiʼ Pabloeʼ u podereʼ maas ku chíikpajal le kéen u yáant juntúul kʼeban wíinik (2 Corintios 4:7; 12:8). Juntúul kʼeban máakeʼ maʼ tu páajtal u beetik yaʼab baʼaloʼob chéen tu juunal. Wa k-reconocertik maʼ tu páajtal k-beetik tuláakal baʼal t-juunal yéetel k-kaxtik u yáantaj Dioseʼ bey ken k-chaʼa u yeʼesik u poder Dios ichil k-kuxtaloʼ (Efesios 3:16; Filipenses 4:13).

 Kex teʼ año 55 tsʼoʼokok u taal Jesúsoʼ Pabloeʼ tu tsʼíibtaj junpʼéel carta tiʼ le cristianoʼob yanoʼob Corintooʼ. Tu tsʼoʼokbal le cartaoʼ letiʼeʼ tu defendertaj le autoridad tsʼaʼantiʼ bey apóstoloʼ. Bey úuchik u beetkoʼ tumen jujuntúul máakoʼob ku yaʼalikoʼob jach u yojloʼob kaʼansajeʼ joʼopʼ u yaʼalikoʼob baʼal tiʼ Pablo, maʼ xaaneʼ joʼopʼ u criticarkoʼob yoʼolal bix u yilaʼal yéetel yoʼolal bix u tʼaan (2 Corintios 10:7-10; 11:5, 6, 13; 12:11).

 Utiaʼal u defenderkubaeʼ Pabloeʼ tu yaʼaleʼ wa maʼ yoʼolal u poder Dioseʼ bejlaʼa maʼ tu páajtal u tsʼoʼoksik le meyaj kʼubéentaʼantiʼoʼ mix u aguantartik tuláakal le problemas anchajtiʼoʼ (2 Corintios 6:4; 11:23-27; 12:12). Teʼ capítulo 12, Pabloeʼ tu yaʼaleʼ le baʼax ku muʼyajtikoʼ bey jeʼex «junpʼéel kʼiʼix» yaan tu bakʼeleʼ. Leloʼ jach tu beetaj u sen muʼyaj (2 Corintios 12:7). Kex maʼ tu yaʼalaj jach baʼax le táan u muʼyajtikoʼ Pabloeʼ u yojleʼ yéetel u yáantaj Jéeobaeʼ yaan u páajtal u aguantartik.

 Le máaxoʼob meyajtik Dios xan teʼ kʼiinoʼobaʼ láayliʼ ku aktáantkoʼob jejeláas problemas yéetel ku chʼaʼpachtaʼaloʼobeʼ. Chéen baʼaleʼ ku líikʼil u yóoloʼob kéen u kʼaʼajsoʼobeʼ ku páajtal u aktáantkoʼob jeʼel baʼaxak yéetel u poder Dioseʼ. Jeʼex Pabloeʼ letiʼobeʼ ku yaʼalikoʼob: «Tumen kéen pʼáatak minaʼan in muukʼeʼ maas muʼukʼaʼan in wuʼuyikinba» (2 Corintios 12:10).

 Utiaʼal a wilik tiʼ uláakʼ baʼaxoʼob ku tʼaan 2 tiʼ Corintioseʼ chaʼant le videoaʼ.