«Letiʼeʼ tsʼoʼok u beetik tuláakal baʼal kiʼichkelem yéetel jach tu kʼiinil. Tsʼoʼok xan u tsʼáaik tu puksiʼikʼal wíinik le kuxtal minaʼan u xuuloʼ. Kex beyoʼ wíinikeʼ mix bikʼin u yojéeltik tuláakal le baʼaxoʼob tsʼoʼok u beetik u jaajil Dios desde tu káajbal tak tu tsʼoʼokbaloʼ» (Eclesiastés 3:11, Túumben Luʼum).

 «Jach tu súutukil tu beetaj baʼal, tu láaj beetaj kiʼichkelem; tu tsʼáaj xan tiʼ wíinik u tuukulil minaʼan xuʼulul, kex maʼ tu naʼatik wíinik tuláakal u nojchil baʼax tu beetaj Dios mix xan baʼax bíin u beete» (Eclesiastés 3:11, Quiliʼich Biblia ich Maya).

 «Letiʼeʼ tsʼoʼok u beetik tuláakal baʼal kiʼichkelem yéetel jach tu kʼiinil». Le tʼaan «kiʼichkelem» ich hebreooʼ maʼ chéen ku meyaj utiaʼal u yúuchul tʼaan tiʼ junpʼéel baʼax «jatsʼutsiʼ», baʼaxeʼ ku meyaj xan utiaʼal u tsʼaʼabal naʼatbil junpʼéel baʼal «maʼalob beetaʼanik» wa «tu nuʼuk» (Eclesiastés 3:11, ilawil le notaoʼ). Ichil le jatsʼuts baʼaloʼob u beetmaj Diosoʼ táakaʼan tuláakal le baʼaloʼob u beetmoʼ bey xan le baʼaxoʼob ku meyajtiʼ utiaʼal u béeykuntik u promesaʼoboʼ (Daniel 2:21; 2 Pedro 3:8; Apocalipsis 4:11).

 «Tsʼoʼok xan u tsʼáaik tu puksiʼikʼal wíinik le kuxtal minaʼan u xuuloʼ». Dioseʼ tu beetaj wíinik utiaʼal ka kuxlak minaʼan u xuul (Salmo 37:29). Le oʼolal mix máak taak u kíimil, chéen baʼaleʼ Adán yéetel Evaeʼ maʼ tu yuʼuboʼob u tʼaan Diosiʼ ka kíimoʼob, le oʼolal xan u paalaloʼobeʼ kʼebanoʼob yéetel ku kíimloʼob (Génesis 3:17-19; Romanos 5:12). Dioseʼ u prometermaj yaan u tsʼáaik «baʼax ku tsʼíiboltik tuláakal baʼal kuxaʼan», ichil leloʼ táakaʼan u tsʼáaiktiʼob le kuxtal minaʼan u xuuloʼ (Salmo 145:16). Le Bibliaoʼ ku tsolik baʼaxoʼob tsʼoʼok u beetik Jéeoba utiaʼal ka béeychajak u yantal esperanza tiʼ máak utiaʼal u kuxtal minaʼan u xuul (Romanos 6:23).

 «Kex beyoʼ wíinikeʼ mix bikʼin u yojéeltik tuláakal le baʼaxoʼob tsʼoʼok u beetik u jaajil Dios desde tu káajbal tak tu tsʼoʼokbaloʼ». U naʼat wíinikeʼ maʼ bey jeʼex u naʼat Dioseʼ, le oʼolal le Bibliaoʼ ku yaʼalik: «¡Maʼ tu páajtal u chʼaʼnuʼuktaʼal le baʼaxoʼob ku tuklik u beetkoʼ mix u xakʼaltaʼal u beeloʼob!» (Romanos 11:33). Kex beyoʼ Dioseʼ ku tsʼáaik u yojéelt wíinik baʼax ku tuklik u beetik, maases tiʼ le máaxoʼob taak u beetkoʼob baʼax ku yaʼalikoʼ (Amós 3:7).

 U libroil Eclesiastéseʼ tsʼíibtaʼab tumen rey Salomón. Le reyaʼ jach kʼaj óoltaʼab tu luʼumil Israel yoʼolal le naʼat tsʼaʼabtiʼ tumen Diosoʼ. U libroil Eclesiastéseʼ ku tsʼáaik maʼalob consejoʼob tiʼ máak, ku yaʼalik baʼax maʼalob ka u beete yéetel baʼaxoʼob chéen kuneloʼob (Eclesiastés 1:2, 3; 2:1, 17; 7:1; 12:1, 13). Teʼ capítulo 3, Salomóneʼ ku tʼaan tiʼ le baʼaxoʼob suuk u beetaʼaloʼ, ichil le baʼaloʼobaʼ táakaʼan meyajoʼob suuk u beetik máak yéetel uláakʼ baʼaloʼobiʼ (Eclesiastés 3:1-8, 10). Dioseʼ ku tsʼáaik u páajtalil tiʼ máak u chʼaʼtuklik baʼax ken u beete yéetel tiʼ baʼax súutukil ken u beete (Deuteronomio 30:19, 20; Josué 24:15). Salomóneʼ ku yaʼalikeʼ «tuláakal baʼal yaan u súutukil», le oʼolal le máaxoʼob beetik baʼax ku yaʼalik Dios utiaʼal u béeytal u propósitooʼ ku kiʼimaktal u yóoloʼob, «leloʼ letiʼe baʼax ku síik Dios tiʼ máakoʼ» (Eclesiastés 3:1, 12, 13).

 Utiaʼal a wilik tiʼ baʼax ku tʼaan u libroil Eclesiastéseʼ chaʼant le videoaʼ.