«Dioseʼ, tu yoʼolal le u páajtalil táan u meyaj ichiloʼonoʼ, jeʼel u páajtal u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ. Letiʼ unaj u alabartaʼal» (Efesios 3:20, 21, Túumben Luʼum).

 «Beoraaʼ nojbeʼenil tiʼ [Dios], máax yaan páajtalil tiʼ utiaʼal u beetik u maas yaʼabil tiʼ le baʼax k-kʼáatikoʼ wa k-tuklikoʼ tu yoʼolal u páajtalil ku meyaj tiʼ toʼon. ¡Nojbeʼenil utiaʼal [Dios]!» (Efesios 3:20, 21, Quiliʼich Biblia ich Maya).

 Yéetel le baʼax tu yaʼalaj Pablooʼ tu yeʼeseʼ letiʼeʼ jach ku creertikeʼ Dioseʼ jeʼel u páajtal u núukik u oración le máaxoʼob adorarkoʼ. Ku tsʼáaik xan tiʼob le baʼaxoʼob ku kʼáatkoʼoboʼ, tak le baʼaxoʼob yaan hora ku tuklik máak maʼ tu béeytaloʼ.

 «Tu yoʼolal le u páajtalil táan u meyaj ichiloʼonoʼ». Pabloeʼ tu yaʼalaj teʼ versículo 21 lelaʼ: «Letiʼ unaj u alabartaʼal tu yoʼolal le múuchʼuliloʼ bey xan tu yoʼolal Cristo Jesús utiaʼal kʼiinoʼob minaʼan u xuul». Le tekstoaʼ ku yeʼesiktoʼoneʼ le ka tu yaʼalaj Pablo: «Tu yoʼolal le u páajtali[oʼ]» táan u tʼaan tiʼ Jéeoba a. K-ilik túuneʼ Dioseʼ jeʼel u tsʼáaiktoʼon u páajtalil wa jeʼel u yáantkoʼon k-beet baʼax uts tu tʼaaneʼ (Filipenses 4:13).

 Teʼ versículo 20, le apóstol Pablooʼ jach claro u yeʼesik junpʼéel baʼax jach jatsʼuts yéetel especial tiʼ Jéeoba: le poder yaantiʼ utiaʼal u yáantik le máaxoʼob meyajtikoʼ. Junpʼéel libroeʼ ku yaʼalikeʼ le tʼaan «le u páajtalil[o]», u kʼáat u yaʼal lelaʼ: «Maʼ táan u tsʼáaik naʼatbil wa maʼ xaan ka u beetiʼ, baʼaxeʼ jach seguro jeʼel u beetkeʼ. Le tʼaanoʼob jeʼeloʼ ku yeʼesik de ke letiʼeʼ yaantiʼ u poderil utiaʼal u beetik jeʼel baʼaxakeʼ». Yaan horaeʼ juntúul utsul amigoeʼ taak u yáantik u amigo, chéen baʼaleʼ yaan horaeʼ maʼ tu béeytal. Pero Jéeobaeʼ maʼ beyiʼ, letiʼeʼ jeʼel u páajtal u yáantik le máaxoʼob meyajtikoʼ yéetel jeʼel u tsʼáaiktiʼob le baʼaxoʼob ku kʼáatkoʼoboʼ tumen letiʼeʼ juntúul Dios minaʼan u xuul u poder mix u autoridad (Isaías 40:26).

 «Jeʼel u páajtal u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ». Jéeobaeʼ jeʼel u páajtal u tsʼáaik le baʼaxoʼob kʼaʼabéet tiʼ le máaxoʼob meyajtikoʼ, yaan hora xaneʼ hasta jeʼel u píitmáan u beetik wa baʼax tu yoʼolaloʼobeʼ. Letiʼeʼ jeʼel u tsʼáaiktiʼob tak le baʼaxoʼob maʼ tu páaʼtkoʼob ka tsʼaʼabaktiʼoboʼ.

 Le tʼaan «jeʼel u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal t-tuukuloʼ» ku maas clarokíintik u káajbal le versículoaʼ. Tumen le kéen u yaʼal «jeʼel u píitmáan u beetik tuláakal le baʼaxoʼob k-kʼáatkoʼ wa tuláakal le baʼaxoʼob ku taal» tu tuukul le máaxoʼob meyajtikoʼ teʼeloʼ Pabloeʼ u kʼáat ka naʼataʼakeʼ Dioseʼ jach u kʼáat u yáantoʼon. Tsʼoʼoleʼ jeʼel tak u tsʼáaiktoʼon le baʼaxoʼob maʼ táan k-páaʼtik kaʼachoʼ. Le Quiliʼich Biblia ich Mayaoʼ bey u traducirtik le versículo 20: «Beoraaʼ nojbeʼenil tiʼ [Dios], máax yaan páajtalil tiʼ utiaʼal u beetik u maas yaʼabil tiʼ le baʼax k-kʼáatikoʼ wa k-tuklikoʼ». Yaan horaeʼ le máaxoʼob meyajtik Jéeobaoʼ ku aktáantkoʼob nojoch problemas ichil u kuxtaloʼob. Hasta yaan horaeʼ maʼ u yojloʼob baʼaxoʼob jeʼel u kʼáatkoʼob ich oracióneʼ. Pero como Jéeoba jach yaan u naʼateʼ u yojel baʼax kʼaʼabéettiʼob. Letiʼeʼ yaan u yáantkoʼob teʼ kʼiin ku tuklik maas maʼaloboʼ (Job 42:2; Jeremías 32:17). Mientras maʼ utsak le problemaoʼ letiʼeʼ jeʼel u tsʼáaiktiʼob u muukʼil utiaʼal u aktáantkoʼobeʼ, hasta yaan horaeʼ ku beetik u kiʼimaktal u yóoloʼob kex maʼ chéen chʼaʼabil baʼax ku aktáantkoʼobiʼ (Santiago 1: 2, 3).

 U libroil Efesioseʼ junpʼéel carta tu tsʼíibtaj apóstol Pablo tiʼ le cristianoʼob kajaʼanoʼob tu kaajil Éfesooʼ (Asia Menor), bejlaʼeʼ tiaʼan Turquíaeʼ. Teʼ cartaoʼ Pabloeʼ tu tsʼíibtaj le oración tu beetaj yoʼolal le sukuʼunoʼob kajaʼanoʼob Éfesooʼ (Efesios 3:14-21). Letiʼeʼ orarnaj tu yoʼolaloʼob, beyoʼ letiʼob bey xan tuláakal le máaxoʼob meyajtik Diosoʼ ka u yeʼesoʼob le yaabilaj tu yeʼesaj Jesúsoʼ yéetel ka u beetoʼob le baʼaxoʼob tu kaʼansoʼ. Tu tsʼoʼokbal le oraciónoʼ Pabloeʼ tu alabartaj Jéeoba yéetel tu yaʼalaj le tʼaanoʼob ku chíikpajal teʼ Efesios 3:20, 21.

 Utiaʼal a wilik tiʼ uláakʼ baʼaxoʼob ku tʼaan u libroil Efesioseʼ chaʼant le videoaʼ.