«Respetart a papá yéetel a maama utiaʼal ka kuxlakech yaʼab años teʼ luʼum ken u tsʼáatech Jéeobaoʼ» a (Éxodo 20:12, Túumben Luʼum).

 «Tsik a taata, tsik xan a maama, utiaʼal ka chowakchajak u kʼiiniloʼob a kuxtal yóokʼol le luʼum ku tsʼáaiktech Yuumtsil a [Diosoʼ]» (Éxodo 20:12, Quiliʼich Biblia ich Maya).

 Dioseʼ tu yaʼalaj tiʼ le israelitaʼob ka u respetart u taataʼoboʼ. Tsʼoʼoleʼ utiaʼal u beetkoʼob yéetel kiʼimak oʼolaleʼ tu yaʼalaj xan tiʼob baʼax utsiloʼob ken u taastiʼob wa ku beetkoʼob. Le baʼax aʼalaʼab tiʼ le israelitaʼob ka u beetoʼobaʼ tiaʼan kaʼach ichil le ley tsʼaʼab tiʼ Moisésoʼ. Bejlaʼeʼ toʼoneʼ maʼatech k-nuʼuktikba yéetel le Leyaʼ, chéen baʼaleʼ le baʼax tu yaʼalaj Diosoʼ maʼ kʼexpajkiʼ. Le oʼolal tuláakal le máaxoʼob meyajtik Diosoʼ kʼaʼabéet u respetarkoʼob u taataʼob (Colosenses 3:20).

 Kex jeʼel bukaʼaj años ka yanak tiʼ le paalaloʼoboʼ unaj u respetarkoʼob yéetel yuʼubikoʼob u tʼaan u taataʼob (Levítico 19:3; Proverbios 1:8). Tsʼoʼoleʼ kex wa tsʼoʼok u nojochtaloʼob yéetel yaan xan u familiaʼobeʼ láayliʼ unaj u yeʼeskoʼob yaabilaj tiʼ u taataʼobeʼ yéetel u kanáantkoʼob. Por ejemploeʼ unaj u yilkoʼob u yáantkoʼob yéetel baʼaxoʼob kʼaʼabéettiʼob bey xan yéetel taakʼin wa ku kʼaʼabéettal (Mateo 15:4-6; 1 Timoteo 5:4, 8).

 Le israelitaʼob kaʼachoʼ maʼ chéen u papáʼob ku respetarkoʼobiʼ baʼaxeʼ tak u maamaʼob, beyoʼ ku yeʼeskoʼob jach ku apreciarkoʼob tuláakal le meyaj ku beetik le maamatsiloʼ (Proverbios 6:20; 19:26). Teʼ kʼiinoʼobaʼ tuláakal le paalaloʼob bey xan unaj u beetkoʼoboʼ.

 Chéen baʼaleʼ, le Ley tsʼaʼab tiʼ le israelitaʼoboʼ ku yaʼalik xaneʼ, wa juntúul taatatsil táan u yaʼalik tiʼ u paal ka u beet junpʼéel baʼal ku bin tu contra Dioseʼ, le paaloʼ maʼ unaj u beetkiʼ, baʼaxeʼ maas unaj u beetik baʼax uts tu tʼaan Dios (Deuteronomio 13:6-8). Teʼ kʼiinoʼobaʼ toʼon xaneʼ maas «unaj k-uʼuyik u tʼaan Dios, maʼ u tʼaan chéen máakoʼobiʼ» (Hechos 5:29).

 Dioseʼ tu yaʼalaj tiʼ le israelitaʼoboʼ wa ku respetartik u taataʼobeʼ yaan u kuxtaloʼob yaʼab años yéetel yaan u bintiʼob maʼalobil teʼ luʼum kun tsʼaabiltiʼob kaʼachoʼ (Deuteronomio 5:16). Tsʼoʼoleʼ maʼ tun castigarbiloʼob kaʼach jeʼex u castigartaʼal le paalaloʼob tercotakoʼob yéetel maʼatech u beetkoʼob baʼax maʼaloboʼ (Deuteronomio 21:18-21). Kex tsʼoʼok u máan yaʼab añoseʼ láayliʼ unaj k-beetik le baʼax aʼalaʼab tiʼ le israelitaʼoboʼ (Efesios 6:1-3). Tsʼoʼoleʼ unaj k-kʼaʼajsikeʼ cada juntúul tiʼ toʼon ken u kʼub cuenta tiʼ Dios. Tuláakal le máaxoʼob ku beetkoʼob le baʼax ku yaʼalik Dios yéetel ku respetartik u taataʼoboʼ yaan u kuxtaloʼob utiaʼal mantatsʼ (1 Timoteo 4:8; 6:18, 19).

 Le baʼax ku yaʼalik Éxodo 20:12, okaʼan ichil le Diez mandamientoʼob tsʼaʼab tiʼ le israelitaʼoboʼ (Éxodo 20:1-17). Le mandamientoʼob ku chíikpajloʼob antes tiʼ le versículoʼobaʼ ku tʼaanoʼob tiʼ le baʼax ku kʼáatik kaʼach Dios tiʼ le israelitaʼob jeʼex u adorarkoʼob chéen letiʼoʼ. Yéetel le mandamiento yaan kéen tsʼoʼokok le versículoaʼ ku tʼaan tiʼ bix unaj u tratartik le israelitaʼob u maasil máakoʼoboʼ, jeʼex por ejemploeʼ ku yaʼalikeʼ maʼ unaj u tusik u núupoʼobiʼ yéetel maʼ unaj u yookoloʼobiʼ. Le posición tuʼux yaan le mandamiento ku yaʼalik «Respetart a papá yéetel a maamaoʼ», jach jatsʼuts tumen letiʼe yáax mandamiento ku káajal u tʼaan tiʼ bix unaj u tratartik máak u maasiloʼ.