«Tu tsʼookeʼ, sukuʼuneʼex, seguernak a tuukuleʼex tiʼ jeʼel baʼalak jaajtakeʼ, tiʼ jeʼel baʼalak kʼaʼanaʼaneʼ, tiʼ jeʼel baʼalak toj tu táan Dioseʼ, tiʼ jeʼel baʼalak limpioeʼ, tiʼ jeʼel baʼalak ku lúubul utsileʼ, tiʼ jeʼel baʼalak ku yúuchul maʼalob tʼaan tu yoʼolaleʼ, tiʼ jeʼel baʼalak maʼalob yéetel tiʼ jeʼel baʼalak ku náajmatik u alabartaʼaleʼ» (Filipenses 4:8, Túumben Luʼum).

 «Tu tsʼookeʼ sukuʼuneʼex, tukulteʼex tuláakal baʼax jaaj, tuláakal baʼax ku náajmatik tsiikil, tuláakal baʼax toj, tuláakal baʼax sak, tuláakal baʼax ku lúubul utsil, tuláakal baʼax ku yúuchul tʼaan maʼalob tu yoʼolal. Tukulteʼex le baʼax utsoʼ yéetel le baʼax ku náajmatik u kiʼtʼantaʼaloʼ» (Filipenses 4:8, Quiliʼich Biblia ich Maya).

 Dioseʼ jach ku chʼaʼik en cuenta baʼaxoʼob k-tuklik tumen u yojleʼ le baʼaxoʼob k-tuklikoʼ le péeksikoʼon k-beet wa baʼax (Salmo 19:14; Marcos 7:20-23). Le oʼolaleʼ le máaxoʼob taak u lúubloʼob utsil tiʼ Diosoʼ ku yilik u beetkoʼob baʼaloʼob maʼalobtak yéetel ku yilik maʼ u tuukuloʼob tiʼ baʼaloʼob kʼaastak.

 Jeʼex u yaʼalik le versículoaʼ le Bibliaoʼ ku animartik le máaxoʼob meyajtik Dios utiaʼal ka ‹seguernak u tuukuloʼob› tiʼ baʼaloʼob maʼalobtak. Junpʼéel baʼax jeʼel u yáantkoʼoneʼ letiʼe ka tuukulnakoʼon tiʼ le ocho baʼaxoʼob ku yaʼalaʼal teʼ versículoaʼ.

•   «Baʼaloʼob jaajtak». Ichil le baʼaloʼob jaajtakoʼoboʼ tiaʼan le baʼax ku yaʼalik le Bibliaoʼ tumen le baʼax ku yaʼalikoʼ jach maʼalob yéetel jeʼel u páajtal k-confiar tiʼobeʼ (1 Timoteo 6:20).

•   «Baʼaloʼob kʼaʼanaʼantak». Ichil le baʼaloʼob kʼaʼanaʼantakoʼ táakaʼan le u tuukul máak tiʼ le baʼaloʼob jeʼel u yáantik u maas meyajt Dios sáamsamaloʼ (Tito 2:6-8).

•   «Baʼaloʼob toj tu táan Dios». Lelaʼ yaan yil yéetel u beetik máak baʼaloʼob maʼalobtak jeʼex u kʼáat Dioseʼ, yéetel maʼ u beetik máak baʼaloʼob chéen jeʼex u tuklik wíinikeʼ (Proverbios 3:5, 6; 14:12).

•   «Baʼaloʼob limpiotak». Lelaʼ u kʼáat u yaʼaleʼ kʼaʼabéet u kanáantik máak tuláakal baʼax ku tuklik bey xan tuláakal baʼax ku beetik ichil u kuxtal, maʼ chéen tiʼ baʼaloʼob yaan yil yéetel sexoiʼ (2 Corintios 11:3).

•   «Baʼaloʼob ku lúubul utsil». Lelaʼ u kʼáat u yaʼaleʼ tu lugar k-pʼektik wa k-baʼateʼel yéetel u maasileʼ kʼaʼabéet k-kaxtik bix jeʼel k-eʼesik yaabilaj tiʼobeʼ (1 Pedro 4:8).

•   «Baʼaloʼob ku yúuchul maʼalob tʼaan tu yóolal». Lelaʼ u kʼáat u yaʼaleʼ kʼaʼabéet k-beetik baʼaloʼob maʼalobtak tu táan Dios ka u yeʼes jach tu jaajil táan k-meyajtik. Wa k-beetik beyoʼ yaan k-maas yaabiltaʼal tumen u maasil máaxoʼob meyajtik Dios (Proverbios 22:1).

•   «Baʼaloʼob maʼalobtak». Lelaʼ u kʼáat u yaʼaleʼ kʼaʼabéet u beetik máak baʼaloʼob maʼalobtak tu táan Dios jach jeʼex u yaʼalik letiʼoʼ (2 Pedro 1:5, 9).

•   «Baʼaloʼob ku náajmatik u alabartaʼal». Lelaʼ táan u tʼaan tiʼ le baʼaloʼob ku merecertik ka alabartaʼakoʼ. Maases le baʼaxoʼob u beetmaj Diosoʼ, maʼalob ka k-jóoʼs u súutukil utiaʼal k-tuukul tiʼ le baʼaloʼobaʼ (Salmo 78:4).

 U cartail Filipenseseʼ tsʼíibtaʼab tumen apóstol Pablo teʼ kʼiinoʼob kʼalaʼan kaʼach tu yotochoʼ. Kex kʼalaʼan Pablo kaʼach tu kaajil Roma le ka tu tsʼíibteʼ ku líiʼsik u yóol máak le baʼax tu tsʼíibtoʼ tumen yaʼab tuʼuxoʼob tʼaanaj tiʼ yaabilaj yéetel tiʼ kiʼimak óolal. Le oʼolal yaʼab máaxoʼob xakʼaltik le Bibliaoʼ ku yaʼalikoʼobeʼ «u cartail le kiʼimak óolaloʼ» (Filipenses 1:3, 4, 7, 8, 18; 3:1; 4:1, 4, 10).

 Pabloeʼ u yaabiltmaj kaʼach le sukuʼunoʼob yanoʼob Filiposoʼ yéetel u kʼáat kaʼach ka yanaktiʼob le kiʼimak óolal bey xan le jeetsʼelil yaan tiʼ letiʼoʼ (Filipenses 2:17, 18). Le oʼolal tu tsʼoʼokbal u cartaeʼ tu yaʼalaj tiʼ le sukuʼunoʼob ka kiʼimakchajak u yóoloʼoboʼ, ka orarnakoʼob mantatsʼ tiʼ Dios, ka u beetoʼob baʼaloʼob ka u taas jeetsʼelil tiʼob yéetel u maasil bey xan tu yéetel Dios (Filipenses 4:4-9).

 Utiaʼal a wilik tiʼ uláakʼ baʼaxoʼob ku tʼaan u libroil Filipensese’ chaʼant le videoaʼ.