«Techeʼ yaan a kanáantik le máaxoʼob kʼáatiktech áantajoʼ. Mantatsʼ ken a beet u yantaltiʼob jeetsʼelil, tumen tiʼ teech ku kʼubik u yóoloʼob» (Isaías 26:3, Túumben Luʼum).

 «Yuumtsil, techeʼ ka tʼilkúuntik jeetsʼelil tiʼ máaxoʼob chúukaʼan u yóoloʼobeʼ, tumen u yoksmajoʼob u yóoloʼob tiʼ teech» (Isaías 26:3, Quiliʼich Biblia ich Maya).

 Le tʼaanoʼob tu tsʼíibtaj profeta Isaíasoʼ ku yeʼesikeʼ Jéeobaeʼ ku kanáantik le máaxoʼob ku confiaroʼob tiʼoʼ. Ku beetik u yantaltiʼob jeetsʼelil.

 «Yaan a kanáantik le máaxoʼob kʼáatiktech áantajoʼ». Le jaats tiʼ le tekstoaʼ táan u tʼaan tiʼ le máaxoʼob jach tu jaajil ku confiaroʼob tiʼ Jéeobaoʼ. a Juntúul máak ku confiar tiʼ Dioseʼ jach u yojel chéen letiʼ jeʼel u yáantikeʼ. Por ejemploeʼ kéen u chʼaʼ junpʼéel decisióneʼ maʼatech u beetik chéen le baʼax ku tuklikoʼ, baʼaxeʼ ku chʼaʼik en cuenta baʼax ku tuklik Dios yoʼolal le baʼax taak u beetkoʼ (Proverbios 3:5, 6). Utiaʼal u yojéeltik baʼax ku tuklik Dioseʼ ku xokik le Bibliaoʼ yéetel ku tuukul yoʼolal le baʼax ku xokikoʼ (Salmo 1:2; 119:15). Tsʼoʼoleʼ le kéen u máans problemas ichil u kuxtaleʼ, yáax baʼax ku beetkeʼ u kʼáatik u yáantaj Jéeoba ich oración (Salmo 37:5; 55:22). Le máaxoʼob beetik beyoʼ yaan u tsʼaʼabal jeetsʼelil tiʼob tumen Jéeoba.

 «Mantatsʼ ken a beet u yantaltiʼob jeetsʼelil». Le tekstoaʼ ich hebreoeʼ kaʼatéen u chíikpajal le tʼaan «jeetsʼeliloʼ». Leloʼ ku yeʼesikeʼ jach importante le baʼax ku kaʼansikoʼ. Le oʼolaleʼ uláakʼ Bibliaʼob xaneʼ bey u traducirkoʼob le tʼaanaʼ «mantatsʼ ken a beet u yantaltiʼob jeetsʼelil» wa «chúukaʼan jeetsʼelil». Lelaʼ u kʼáat u yaʼaleʼ le máaxoʼob ku confiaroʼob tiʼ Jéeobaoʼ kex yaantiʼob problemaseʼ mantatsʼ kun antal jeetsʼelil tiʼob (Salmo 112:7; 119:165). Le jeetsʼelilaʼ chéen jeʼel u yantaltech wa ka biskaba maʼalob yéetel Jéeoba bey xan wa ka beetik baʼax uts tu tʼaaneʼ (Proverbios 3:32; Isaías 48:18).

 U tsʼáaik jeetsʼelil Jéeoba tiʼ le máaxoʼob meyajtikoʼ maʼ u kʼáat u yaʼal wa maʼ kun antal problemas tiʼobiʼ wa mix baʼal kun beetik u chiʼichnaktaloʼobiʼ (1 Samuel 1:6, 7; Job 6:1, 2; Salmo 31:9). Baʼaxeʼ Jéeobaeʼ yaan u yáantkoʼob u aguantartoʼob le problemasoʼ (Isaías 41:10, 13). Letiʼeʼ ku núukik u oraciónoʼob ikil u tsʼáaiktiʼob naʼat, muukʼ yéetel u líiʼsik u yóoloʼob (Salmo 94:19; Proverbios 2:6; Isaías 40:29). Le oʼolal ku páajtal u pʼáatloʼob tranquiloil kex táan u máanskoʼob problemas (Filipenses 4:6, 7).

 Le profeta Isaíasoʼ kuxlaj teʼ siglo ocho táanil tiʼ u taal Jesúsoʼ. Teʼ kʼiinoʼob jeʼeloʼ yaʼab judíoʼobeʼ xuʼulul u meyajtikoʼob Jéeoba. Le oʼolaleʼ tu añoil 607 táanil tiʼ u taal Jesúseʼ Jéeobaeʼ tu chaʼaj u xuʼulsaʼal tiʼ Jerusalén tumen maʼ xuʼul u beetkoʼob baʼaloʼob kʼaastakiʼ.

 Maas tiʼ cien años u bin u xuʼulsaʼal Jerusaléneʼ le profeta Isaíasoʼ tu tsʼíibtaj junpʼéel kʼaay utiaʼal u alabartik Jéeoba, le kʼaayaʼ junpʼéel profecía yéetel tiaʼan teʼ capítulo 26 (Isaías 26:1-6). Le kʼaayaʼ ku yaʼalikeʼ yaan u kʼuchul u kʼiinileʼ junpʼéel kaaj yaan tu luʼumil Judáeʼ yaan u kaʼa jel líiʼsaʼal, maʼ xaaneʼ le kaajaʼ Jerusalén.

 Tu añoil 537 táanil tiʼ u taal Jesúseʼ káaj u jel líiʼsaʼal u kaajil Jerusalén. Le kaʼa tsʼoʼok u jel líiʼsaʼal le kaajoʼ le judíoʼob chúukaʼan u yóoloʼoboʼ tu yuʼuboʼob jach kanáantaʼanoʼob le oʼolal tu yaʼaloʼob: «K-kaajaleʼ jach yaan u páajtalil» (Isaías 26:1). Chéen baʼaleʼ maʼ letiʼe u baʼpakʼiloʼob le kaaj beetik u yuʼubikubaʼob kanáantaʼanoʼoboʼ baʼaxeʼ tumen Jéeoba bendecirtik yéetel kanáantik le kaajoʼ (Isaías 26:2).

 Le máaxoʼob adorartik Jéeoba teʼ kʼiinoʼobaʼ bey xan u yuʼubikubaʼoboʼ. Letiʼobeʼ u yojloʼob Jéeoba kun kanáantkoʼob tumen letiʼeʼ bey junpʼéel «Tuunich» tuʼux u taʼakikubaʼobeʼ (Isaías 26:4).

 Utiaʼal a wilik tiʼ uláakʼ baʼaxoʼob ku tʼaan u libroil Isaíaseʼ chaʼant le videoaʼ.