«Teneʼ tiaʼanen ta wéeteleʼ, maʼ a chʼaʼik saajkil. Teen a Dios, maʼ u péek a wóol. Teen kin tsʼáaik a muukʼ, teen kin áantkech, teneʼ jach tu jaajil yaan in machkech yéetel in x-noʼoj kʼab, yéetel le in kʼab ku beetik justiciaoʼ» (Isaías 41:10, Túumben Luʼum).

 «Maʼ a chʼaʼik saajkil, tumen teneʼ tiʼ yanen ta wéeteleʼ; maʼ u péek a wóol tumen teneʼ a [Diosen]. Teen tsʼáaik a muukʼ, teen áantkech, teen latʼabkʼabtikech yéetel in kʼab yaan páajtalil tiʼ» (Isaías 41:10, Quiliʼich Biblia ich Maya, túumbenkuntaʼan u tsʼíibil).

 Jéeobaeʼ a ku yaʼalikeʼ kex jeʼel baʼaxak problema ka u aktáant le máaxoʼob meyajtikoʼ yaan u yáantkoʼob.

 «Tiaʼanen ta wéeteleʼ». Jéeobaeʼ ku yaʼalik tiʼ le máaxoʼob meyajtikoʼ maʼ u chʼaʼikoʼob saajkil tumen maʼ tu juunal yaniloʼobiʼ. Letiʼeʼ u yojel baʼax táan u muʼyajtikoʼob yéetel ku yuʼubik u oraciónoʼob, bey ka yanak tu yiknaloʼobeʼ (Salmo 34:15; 1 Pedro 3:12).

 «Teen a Dios». Jéeobaeʼ ku líiʼsik u yóol le máaxoʼob meyajtik ikil u kʼaʼajsiktiʼobeʼ kex jeʼel baʼaxak ka u aktáantoʼobeʼ láayliʼ u Diosoʼobeʼ yéetel ku kʼamik le adoración ku tsʼáaikoʼobtiʼoʼ. Kex jeʼel baʼaxak ka úuchkeʼ mix baʼal jeʼel u beetik maʼ u kanáantaʼaloʼob tumen Jéeoba (Salmo 118:6; Romanos 8:32; Hebreos 13:6).

 «Teen kin tsʼáaik a muukʼ teen kin áantkech, teneʼ jach tu jaajil yaan in machkech yéetel in x-noʼoj kʼab, yéetel le in kʼab ku beetik justiciaoʼ». Jéeobaeʼ óoxpʼéel bix u yaʼalik tiʼ le máaxoʼob meyajtik de ke jach tu jaajil yaan u yáantkoʼoboʼ. Utiaʼal u máansik tu tuukuloʼob bix kun áantbiloʼobeʼ Jéeobaeʼ ku yaʼaliktiʼob yaan u yáantkoʼob yéetel u x-noʼoj kʼab. Wa juntúul tiʼ letiʼob ku lúubuleʼ Jéeobaeʼ ku jáan tichʼik u x-noʼoj kʼab utiaʼal u líiʼsik (Isaías 41:13).

 Jéeobaeʼ ku meyajtiʼ le Biblia utiaʼal u yáantkoʼon yéetel utiaʼal u líiʼsik k-óoloʼ (Josué 1:8; Hebreos 4:12). Le Bibliaoʼ ku yaʼaliktoʼon bix jeʼel k-aktáantik le problemaʼob jeʼex le óotsililoʼ, le kʼojaʼaniloʼoboʼ wa u kíimil juntúul máax k-yaabiltmaj (Proverbios 2:6, 7). Letiʼeʼ ku tsʼáaiktoʼon xan u espíritu santo wa u páajtalil utiaʼal maʼ k-sen chʼíikil k-tukult le problemas yaantoʼonoʼ (Isaías 40:29; Lucas 11:13).

 Le baʼax ku yaʼalik le tekstoaʼ letiʼe baʼax tu yaʼalaj Dios utiaʼal u líiʼsik u yóol le judíoʼob bisaʼaboʼob Babiloniaoʼ. Jéeobaeʼ u yaʼalmiliʼeʼ le táan u tsʼoʼokol le tiempo bisaʼanoʼob Babiloniaoʼ, yaan u yuʼubal u yaʼalaʼaleʼ juntúul máakeʼ yaan u amenazartik Babilonia yéetel yaan u xuʼulsik le kaajoʼob yanoʼob tu baʼpachoʼ (Isaías 41:2-4; 44:1-4). U kaajil Babilonia bey xan le kaajoʼob yanoʼob tu baʼpachoʼ yaan u sen chʼaʼikoʼob saajkil, chéen baʼaleʼ le judíoʼoboʼ maʼ kun sajaktaloʼob tumen Jéeoba kun kanáantkoʼob. Utiaʼal u creerkoʼob jach tu jaajil yaan u kanáantaʼaloʼobeʼ Jéeobaeʼ óoxtéen tu yaʼalajtiʼob «maʼ a chʼaʼik saajkil» (Isaías 41:5, 6, 10, 13, 14).

 Le baʼax tsʼíibtaʼan tiʼ Isaías 41:10, tiʼ le judíoʼob bisaʼaboʼob Babilonia aʼalaʼaboʼ. Chéen baʼaleʼ le tʼaanoʼobaʼ láayliʼ ku meyaj tiʼ Jéeoba utiaʼal u líiʼsik u yóol máaxoʼob meyajtik (Isaías 40:8 Romanos 15:4). Jeʼex úuchik u yáantik le máaxoʼob meyajt úuchjeakiloʼ Jéeobaeʼ láayliʼ bey u beetik bejlaʼoʼ.