«Teneʼ Jéeobaen, letiʼe in kʼaabaʼoʼ. Tiʼ mix máak ken in chaʼa u tsʼaʼabal le adoración unaj u tsʼaʼabaltenoʼ yéetel tiʼ mix junpʼéel póolbil imagen ken in chaʼa u tsʼaʼabal le alabanza unaj u tsʼaʼabaltenoʼ» (Isaías 42:8, Túumben Luʼum).

 «Teen Yahveh, lelaʼ letiʼe in kʼaabaʼoʼ, maʼ bíin in chaʼa u tsʼaʼabal in nojbeʼenil tiʼ yaanaliʼ mix ka tsiʼikik beetbil [diosoʼob] ku jeelinten» (Isaías 42:8, Quiliʼich Biblia ich Maya).

 Dios aʼaliktoʼon bix u kʼaabaʼ yéetel ku yaʼaliktoʼon xan maʼ uts tu tʼaan ka adorartaʼak yéetel imagenoʼob wa uláakʼ baʼaloʼobiʼ.

 Dios yéey le kʼaabaʼ yaantiʼoʼ, ich mayaeʼ suuk u traducirtaʼal bey «Jéeobaeʼ» (Éxodo 3:14, 15). a Le kʼaabaʼaʼ ku chíikpajal óoliʼ 7,000 u téenel teʼ Antiguo Testamentooʼ (tsʼíiboʼob ich hebreo yéetel arameo), chéen baʼaleʼ tiʼ yaʼab bibliaʼobeʼ ku kʼeʼexel le kʼaabaʼ Jéeoba yéetel le tʼaan Yuumtsiloʼ. Lelaʼ bey u chíikpajal tu tekstoil Salmo 110:1, teʼeloʼ ku yúuchul tʼaan tiʼ junpʼéel profecía yaan yil yéetel Jéeoba bey xan Jesús. Le Quiliʼich Bibliaoʼ bey u traducirtmil le Salmoaʼ: «Yuumtsileʼ tu yaʼalaj tiʼ in Yuumtsil» (Hechos 2:34-36). Chéen baʼaleʼ le Biblia Túumben Luʼumoʼ ku tsʼáaik u kʼaabaʼ Dios teʼ tuʼux unaj u binoʼ, beyoʼ claro u yilaʼal jach tiʼ máax táan u yúuchul tʼaan. Le Salmooʼ ku yaʼalik: «Jéeobaeʼ tu yaʼalaj tiʼ in Yuumtsil: ‹Kulen tin x-noʼoj kʼab utiaʼal ka a páaʼt in tsʼáaik a enemigoʼob bey junpʼéel kʼáancheʼ utiaʼal a tsʼáaik a wookoʼobeʼ›».

 Jujuntúul máaxoʼob kaʼanchajaʼan u xookoʼobeʼ ku yaʼalikoʼobeʼ u kʼaabaʼ Dioseʼ u kʼáat u yaʼal «Letiʼ Beetik u Yúuchul». Chéen tiʼ Jéeoba yaan u derechoil u bisik le kʼaabaʼoʼ tumen chéen letiʼ jeʼel u béeytal u beetik tuláakal baʼax kʼaʼabéet utiaʼal u tsʼoʼokbesik le baʼax ku tuklikoʼ. Tsʼoʼoleʼ wa kʼaʼabéet xaneʼ jeʼel u meyajtiʼ le baʼaxoʼob u beetmaj utiaʼal u béeykuntik le baʼax ku tuklikoʼ.

 Jéeoba beetmil tuláakal baʼal yéetel chéen letiʼ u jaajil Dios, le oʼolal chéen letiʼ unaj u adorartaʼal. Letiʼeʼ maʼ uts tu tʼaan ka adorartaʼak imagenoʼob wa uláakʼ baʼaloʼobiʼ tumen chéen letiʼ ku merecertik ka adorartaʼak (Éxodo 20:2-6; 34:14; 1 Juan 5:21).

 Teʼ yáax versículoʼob tiʼ le capítulo 42 tiʼ Isaíasoʼ, Jéeobaeʼ tu yaʼalaj baʼax meyajil ken u beet le máax u «yéeymoʼ». Jéeobaeʼ tu yaʼaleʼ yaan u «tsʼáaik [u] poder tu yóokʼol» utiaʼal beyoʼ ka u beet «justicia tiʼ le kaajoʼoboʼ» (Isaías 42:1). Tu yaʼalaj xan: «Beoraaʼ yaan in waʼalik túumben baʼaloʼob. Teneʼ táan in waʼalikteʼex antes tiʼ u káajal u béeytaloʼob» (Isaías 42:9). Le baʼax tu yaʼalaj yoʼolal le máax u «yéeymoʼ» káaj u béeytal tu yóokʼol Jesús le ka joʼopʼ u tsikbaltik u tʼaan Dios tiʼ le máakoʼoboʼ (Mateo 3:16, 17; 12:15-21).