«Le bix maas nojoch jeʼel u páajtal u yeʼesik u yaabilaj máakoʼ letiʼe ka u kʼub u kuxtal tu yoʼolal u amigoʼoboʼ» (Juan 15:13, Túumben Luʼum).

 «Minaʼan mix máak máan tipʼaʼan u yaabilaj tiʼ lelaʼ, ka u tsʼáa wa máax u kuxtal tioʼolal u yéet óoloʼob» (Juan 15:13, Le Tumben Nuptʼan [1970]).

 Jesúseʼ u kʼáat kaʼach ka u naʼat u discípuloʼobeʼ unaj u yeʼeskoʼob junpʼéel yaabilaj jach táaj nojoch, junpʼéel yaabilaj ka u péeksoʼob u paklan tsʼáa u kuxtaloʼob tu yoʼolaloʼob.

 Jesúseʼ tsʼokaʼaniliʼ u yáax aʼalik tiʼ u apóstoloʼob lelaʼ: «Lelaʼ letiʼe baʼax kin waʼalikteʼex ka a beeteʼexaʼ: ka a paklan yaabiltabaʼex jeʼex teen tsʼoʼok in yaabiltikeʼexoʼ» (Juan 15:12). Jach beyoʼ, letiʼeʼ jach tu yaabiltaj u discípuloʼob le beetik yéetel kiʼimak óolal tu xupuba tu yoʼolaloʼob yéetel mantatsʼ tu kaxtaj u yutsil u maasil máakoʼob. Tsʼoʼoleʼ tu tsʼakaj kʼojaʼanoʼob yéetel tu kaʼansaj u Reino Dios a tiʼ tuláakal máak. Letiʼ xaneʼ tu tsʼáaj junpʼéel maʼalob ejemplo tiʼ u discípuloʼob yoʼolal le baʼaxoʼob tu beetoʼ (Mateo 9:35; Lucas 22:27; Juan 13:3-5). Chéen baʼaleʼ le yaabilaj tu yaʼalaj Jesús teʼ Juan 15:13, maas jach nojoch. Chéen wa jaypʼéel horaʼob u yaʼal lelaʼ ka tu tsʼáaj «u kuxtal bey junpʼéel boʼol utiaʼal u salvartaʼal yaʼab máakoʼobeʼ» (Mateo 20:28; 22:39). Le nojoch yaabilaj tu yeʼesaj Jesúsoʼ mix máak uláakʼ u yeʼese tumen maas tu yaabiltaj u maasil ke letiʼ.

 Jesúseʼ u yaabiltmaj tuláakal máak, pero maas jach u yaabiltmaj le máaxoʼob beetik baʼaxoʼob tu kaʼansoʼ. Letiʼeʼ tu yaabiltaj u discípuloʼob tumen teʼ súutukoʼob maas jach talamtakoʼ maʼ pʼaʼat tu juunaliʼ (Lucas 22:28; Juan 15:14, 15). Leloʼ le péeks Jesús u kʼub u kuxtal tu yoʼolaloʼob.

 Le yáax cristianoʼoboʼ tu beetoʼob baʼax tu yaʼalaj Jesús, letiʼobeʼ tu tsʼáaj u kuxtaloʼob tu yoʼolal u maasil (1 Juan 3:16). Le yaabilajoʼ le eʼesik máaxoʼob jach tu jaajil u discípuloʼob Jesús (Juan 13:34, 35).

 Teʼ capítulo 13 tak 17, ku chíikpajal le baʼaxoʼob tu yaʼalaj Jesús tiʼ u discípuloʼob antes tiʼ u kíimiloʼ bey xan le u tsʼook oración tu beetaj tu yéeteloʼoboʼ. Teʼ capítulo 15, tiʼ Jesúseʼ meyajnaj junpʼéel ejemplo utiaʼal u kaʼansikeʼ le máax u kʼáat u beetuba u discípuloeʼ unaj u pʼáatal junmúuchʼ tu yéetel. Letiʼeʼ tu comparartoʼob yéetel u kʼaboʼob u cheʼil uva ku tsʼáaik «yaʼab ich» yéetel tu yaʼaleʼ letiʼob xaneʼ unaj u tsʼáaikoʼob yaʼab ich (Juan 15:1-5, 8). Teʼ kʼiinoʼobaʼ junpʼéel bix k-eʼesik k-tsʼáaik yaʼab icheʼ letiʼe kéen k-eʼes yaabilaj tiʼ u maasiloʼ yéetel letiʼe kéen k-tsikbalt «le baʼaloʼob maʼalobtak ken u beet u Reino Diosoʼ» (Lucas 4:43; Juan 15:10, 17).

 Utiaʼal a wilik tiʼ uláakʼ baʼaxoʼob ku tʼaan u libroil Juaneʼ, chaʼant le videoaʼ.