«Alabartaʼak Dios teʼ kaʼanoʼ, yéetel teʼ luʼumaʼ yanak jeetsʼelil tiʼ le máaxoʼob ku lúubloʼob utsil tiʼ Diosoʼ» (Lucas 2:14, Túumben Luʼum).

 «Nojbeʼenil tiʼ k-Yuum [Dios] tu kaʼaniloʼob, yéetel tiʼ luʼumeʼ jeetsʼel óolal tiʼ wíinikoʼob máaxoʼob ku kiʼimakkúunsaʼal yóoloʼob yéetel u yutsil» (Lucas 2:14, Quiliʼich Biblia ich Maya).

 Le tʼaanoʼobaʼ junmúuchʼ ángeloʼob aʼal le ka síij Jesúsoʼ, yéetel u kʼáat u yaʼaleʼ tuláakal le máaxoʼob ken u tsʼáa u fejoʼob tiʼ Jesúsoʼ jeʼel u páajtal u kʼaʼamloʼob tumen Dioseʼ yéetel jeʼel u yantal jeetsʼelil tiʼobeʼ.

 «Alabartaʼak Dios teʼ kaʼanoʼ». Yéetel le tʼaanoʼobaʼ le ángeloʼoboʼ tu yeʼesoʼobeʼ chéen Dios ku merecertik ka alabartaʼak. Ku yeʼesik xaneʼ le úuchik u síijil Jesús way Luʼumeʼ tu tsʼáaj tuʼux u alabartaʼal Jéeoba. a Por ejemploeʼ le táan u kaʼansaj Jesúsoʼ mantatsʼ tu alabartaj Jéeoba jeʼex le ka tu yaʼalaj: «Le baʼax kin kaʼansikoʼ maʼ in tiaʼaliʼ, baʼaxeʼ u tiaʼal le máax túuxtenoʼ» (Juan 7:16-18). Le milagroʼob tu beetaj Jesúsoʼ tu tsʼáaj tuʼux u alabartaʼal Dios (Lucas 5:18, 24-26; Juan 5:19). Le úuchik u tsʼáaik u kuxtal Jesúsoʼ áantajnaj xan utiaʼal ka alabartaʼak Dios. Tsʼoʼoleʼ tu tsʼáaj tuʼux u béeykuntik Jéeoba le baʼax u tukultmaj utiaʼal le yóokʼol kaabaʼ, u chuʼupul yéetel utsul máakoʼob u yaabiltmoʼob le justiciaoʼ yéetel le jeetsʼeliloʼ (Génesis 1:28).

 «Teʼ luʼumaʼ yanak jeetsʼelil». Le jeetsʼelilaʼ maʼ chéen u kʼáat u yaʼal maʼ u yantal guerraʼobiʼ. Baʼaxeʼ letiʼe u yuʼubikuba máak tranquiloil tumen ku lúubul utsil tiʼ Jéeobaoʼ. Tu yoʼolal le u kuxtal Jesús tu kʼubaj t-oʼolaloʼ jeʼel u páajtal k-bisikba yéetel Dioseʼ (Santiago 4:8). Beoraaʼ Jesúseʼ táan u beetik u reyil teʼ kaʼanoʼ yéetel maʼ kun xáantaleʼ yaan u taasik jeetsʼelil way Luʼumeʼ (Salmo 37:11; Lucas 1:32, 33).

 «Le máaxoʼob ku lúubloʼob utsil tiʼ Diosoʼ». Le jaats tiʼ le tekstoaʼ táan u tʼaan tiʼ le máaxoʼob ku lúubloʼob utsil tiʼ Diosoʼ wa le máaxoʼob beetik u voluntadoʼ, tumen letiʼobeʼ ku tsʼáaik u fejoʼob tiʼ letiʼ bey xan tiʼ Jesús le máax tu túuxtoʼ. Lelaʼ maʼ táan u tʼaan tiʼ le u yutsil Dios ku yeʼesik tiʼ tuláakal máakoʼ, maʼ xan táan u tʼaan tiʼ le utsil ku yeʼesik wíinikoʼ. Jujunpʼéel traducciónoʼob tiʼ le Biblia jeʼex Le Tumben Nupt’an (1970), ku traducirkoʼob le jaats beyaʼ: «Maʼalob óolal tiʼ wíinikoʼob». Chéen baʼaleʼ le úuchben tsʼíiboʼob ich Griegooʼ ku yeʼeskoʼobeʼ jach maʼalob bix traducirtaʼanil le Biblia Túumben Luʼumoʼ bey xan le uláakʼ traducciónoʼob ku jóokʼloʼob teʼ kʼiinoʼobaʼ tumen ku tsʼáaikoʼob naʼatbileʼ ku yantal jeetsʼelil tiʼ le máaxoʼob beetik baʼax ku yaʼalik Diosoʼ (ilawil le cuadro « Bix u traducirtaʼal Lucas 2:14 tiʼ uláakʼ bibliaʼob»).

 Le capítulo dos tiʼ Lucasoʼ ku tsolik bix úuchik u líiʼsaʼal Jesús tumen u papáʼob le ka kuxlaj way Luʼumeʼ. Le ka síij Jesúseʼ chíikpaj juntúul ángel tiʼ jujuntúul j-kanan tamanoʼob «pʼaatloʼob kajtal ich kʼáax. Letiʼobeʼ bul áakʼab táan kaʼach u kanáantkoʼob u yalakʼ tamanoʼobiʼ» b (Lucas 2:4-8). Le ángeloʼ tu yaʼalajtiʼob: «Taalen in waʼalteʼex junpʼéel maʼalob baʼal ken u beet u jach kiʼimaktal u yóol tuláakal le kaajoʼ. Bejlaʼeʼ tu kaajal Davideʼ tsʼoʼok u síijil le máax kun salvarkeʼexoʼ, tsʼoʼok u síijil Cristo le Yuumtsiloʼ» (Lucas 2:9-11). Le ángeloʼ tu yaʼalaj xan tiʼ le j-kanan tamanoʼob tuʼux jeʼel u yilkoʼob le chaambaloʼ. Ka tsʼoʼokeʼ le j-kanan tamanoʼoboʼ tu yiloʼob junmúuchʼ ángeloʼob táan u alabarkoʼob Dios. Letiʼobeʼ binoʼob Belén, teʼeloʼ tiʼ tu yiloʼob María, José yéetel le chaambaloʼ (Lucas 2:12-16). Le ka tsʼoʼok u tsikbaltikoʼob tuláakal le baʼax tu yiloʼoboʼ le j-kanan tamano’obo’ suunajoʼob u yiloʼob u yalakʼ tamanoʼob «táan u kʼaayoʼob yéetel táan u alabarkoʼob Dios yoʼolal tuláakal le baʼaxoʼob tu yiloʼob yéetel tu yuʼuboʼoboʼ» (Lucas 2:17-20).

 «Nojbeʼenil tiʼ Yuum [Dios] tu kaʼaniloʼob, yéetel tiʼ luʼumeʼ jeetsʼel óolal tiʼ wíinikoʼob máaxoʼob ku kiʼimakkúunsaʼal yóoloʼob yéetel u yutsil» (Lucas 2:14, Quiliʼich Biblia ich Maya).

 «Nojbe’enil tiʼ Jajal Dios tu ka’anilo’ob, yéetel jeetsʼel yóoʼ luʼum, maʼalob óolal tiʼ wíinikoʼob» (Lucas 2:14, Le Tumben Nuptʼan [1970]).

 Utiaʼal a wilik tiʼ uláakʼ baʼaxoʼob ku tʼaan u libroil Lucaseʼ chaʼant le videoaʼ.