«Le oʼolal kin waʼalikteʼexeʼ tuláakal baʼax ka kʼáatkeʼex ich oracióneʼ creerteʼex yaan u tsʼaʼabalteʼex, beyoʼ yaan a kʼamkeʼex» (Marcos 11:24, Túumben Luʼum).

 «Le oʼolaleʼ kin waʼalik tiʼ teʼex, jeʼel baʼaxak ka a kʼáateʼex ich payalchiʼeʼ, wa ka woksaj óoltikeʼex tsʼoʼok a kʼamikeʼexeʼ, yaan a kʼamikeʼex» (Marcos 11:24, Quiliʼich Biblia ich Maya).

 Yéetel le tʼaanoʼobaʼ Jesúseʼ táan kaʼach u yaʼalik tiʼ u discípuloʼobeʼ jach kʼaʼabéet fe tiʼob le kéen orarnakoʼob. Tu yaʼalaj xan tiʼobeʼ Dioseʼ maʼ chéen ku yuʼubik le oraciónoʼoboʼ, baʼaxeʼ ku núukik. Juntúul máak ku orar de acuerdo yéetel le baʼax ku yaʼalik Diosoʼ jach u yojel yaan u núukaʼal u oración. Le kéen orarnakeʼ hasta bey u yóol tsʼoʼok u núukaʼal tiʼeʼ.

 Jesúseʼ yaʼab u téenel tu yaʼalaj kʼaʼabéet fe tiʼ máak le kéen orarnak. Tu yaʼalaj xaneʼ maʼ unaj u «kaʼapʼéeltal u tuukul» máak le kéen orarnakiʼ, baʼaxeʼ jach kʼaʼabéet u «creertik yaan u yúuchul le baʼax ku yaʼalik» tiʼ Diosoʼ (Marcos 11:23). ¿Baʼaxten? Tumen le máax ku kaʼapʼéeltal u tuukuloʼ «maʼ unaj u páaʼtik u tsʼaʼabal wa baʼax tiʼ tumen Jéeobaiʼ» a (Santiago 1:5-8).

 Juntúul máax yaan u fejeʼ yaʼab u téenel ku orar (Lucas 11:9, 10; Romanos 12:12). Ikil u beetik beyoʼ ku yeʼesik jach tu jaajil kʼaʼabéettiʼ le baʼax ku kʼáatkoʼ yéetel ku yeʼesik jach u yojel yaan u núukaʼal u oración tumen Dios. U yojel xaneʼ Dioseʼ yaan u núukik le kʼiin ku tuklik maas maʼaloboʼ, maʼ le kʼiin ku páaʼtik ka núukaʼak tiʼoʼ (Efesios 3:20; Hebreos 11:6).

 Yéetel le tʼaanoʼobaʼ Jesúseʼ maʼ táan u yaʼalik wa jeʼel máaxak jeʼel u núukaʼal u oración tumen Dioseʼ. Le tʼaanoʼobaʼ Jesús aʼal tiʼ u discípuloʼob, letiʼobeʼ kaʼacheʼ máakoʼob jach yaan u fejoʼob yéetel ku adorarkoʼob Jéeoba jeʼex uts tu tʼaaneʼ. Le Bibliaoʼ ku yaʼalikeʼ Jéeobaeʼ chéen ku yuʼubik le oraciónoʼob maʼatech u binoʼob tu contra u voluntadoʼ (1 Juan 5:14). Letiʼeʼ maʼatech u yuʼubik u oración le máaxoʼob beetik baʼax kʼaas yéetel maʼ tu arrepentiroʼoboʼ (Isaías 1:15; Miqueas 3:4; Juan 9:31). Utiaʼal a wojéeltik bix le oraciónoʼob ku yuʼubaʼal tumen Diosoʼ chaʼant le videoaʼ.

 Juntéenjeakeʼ Jesúseʼ tu yaʼalaj tiʼ u discípuloʼob jach kʼaʼabéet u yeʼeskoʼob le fe yaantiʼoboʼ. Utiaʼal leloʼ meyajnajtiʼ junpʼéel ejemplo. Le táan u bin Jerusalénoʼ tu yilaj junkúul higuera, kex jatsʼuts u yilaʼaleʼ minaʼan mix junpʼéel u yich, le oʼolal Jesúseʼ tu maldecirtaj (Marcos 11:12-14). Le bix u yilaʼal le higueraoʼ chíikaʼan kaʼach tiʼ u kaajil Israel tumen kex bey táan u adorartik Dioseʼ u jaajileʼ maʼ táan u beetkiʼ (Mateo 21:43). Ka máan wa jaypʼéel kʼiineʼ le higueraoʼ kíimi, le bix úuchik u kíimiloʼ tu yeʼesaj bix kun tsʼoʼokol tiʼ u kaajil Israel tumen maʼ tu yuʼubaj u tʼaan Diosiʼ (Marcos 11:19-21).

 Jesúseʼ u yojleʼ u discípuloʼobeʼ maʼ beyoʼob jeʼex le israelitaʼoboʼ, u discípuloʼobeʼ jeʼel u páajtal kaʼach u maas nojochkíintik u fejoʼobeʼ. Le fejoʼ letiʼ kun áantkoʼob u beetoʼob uláakʼ nukuch meyajoʼob (Marcos 11:22, 23). Jach maʼalob le baʼax tu yaʼalaj Jesús tiʼ u discípuloʼob yoʼolal le oraciónoʼ tumen jach taʼaytak kaʼach u kíimsaʼal, tsʼoʼoleʼ yaan xan u chʼaʼpachtaʼal u discípuloʼoboʼ (Lucas 24:17-20; Hechos 5:17, 18, 40). Teʼ kʼiinoʼobaʼ le fe yéetel le oraciónoʼ jach jeʼel xan u yáantik le máaxoʼob tsaypachtik Jesús utiaʼal ka u aktáantoʼob wa baʼax problemaileʼ (Santiago 2:26).

 Utiaʼal a wilik tiʼ uláakʼ baʼaxoʼob ku tʼaan u libroil Marcoseʼ chaʼant le videoaʼ.