«Teʼex jach yaʼab a meyajeʼex yéetel aal a kuucheʼexeʼ, taalakeʼex tin wiknal, teen ken in beet a jeʼelsikabaʼex. Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen, tumen teneʼ maʼ séeb in kʼuuxiliʼ yéetel kabal u yóol in puksiʼikʼal, beyoʼ jeʼel a jeʼelsikabaʼexeʼ. Tumen u cheʼil in kuucheʼ chéen chʼaʼabil u bisaʼal, yéetel in kuucheʼ jach sáal» (Mateo 11:28-30, Túumben Luʼum).

 «Koʼoteneʼex tiʼ teen, tuláakleʼex máaxeʼex kaʼananeʼex tiʼ a meyajeʼex yéetel máax aal a kucheʼex, teen bíin in beet a jeʼeleleʼex. Biseʼex in kuch ta wóokʼoleʼex, yéetel kaanbalneneʼex tiʼ teen, tumen teneʼ chúukaʼan in wóol yéetel kabal u yóol in puksiʼikʼal; beyoʼ bíin a kaxteʼex jeʼelel [...]. Tumen in kuche maʼ aaliʼ yéetel sáal u bisaʼal» (Mateo 11:28-30, Quiliʼich Biblia ich Maya, túumbenkuntaʼan u tsʼíibil).

 Jesúseʼ tu yaʼalaj tiʼ le máakoʼob ka taalakoʼob tu yiknaloʼ. Tu yaʼalajtiʼobeʼ wa ku kaanbaloʼob tiʼeʼ yaan u beetik u jeʼelskubaʼob.

 «Teʼex jach yaʼab a meyajeʼex yéetel aal a kuucheʼexeʼ, taalakeʼex tin wiknal». Tiʼ le máaxoʼob beetaʼab le invitaciónaʼ ‹aal u kuuchoʼob› tumen u nuuktakil le religiónoʼoboʼ ku yaʼalikoʼobtiʼob ka u beetoʼob baʼaloʼob chéen wíinik kaʼansik (Mateo 23:4; Marcos 7:7). Tsʼoʼoleʼ u maasil máakoʼob xaneʼ jach chiʼichnakoʼob tumen kʼaʼabéet u sen meyajoʼob utiaʼal u kaxtikoʼob u kuxtaloʼob.

 «Teen ken in beet a jeʼelsikabaʼex». Jesúseʼ tu yaʼaleʼ yaan u beetik u jeʼelskuba le máaxoʼob kun kʼamik u invitaciónoʼ. Junpʼéel bix úuchik u yáantkoʼobeʼ letiʼe úuchik u kaʼansiktiʼob baʼax u kʼáat Dios ka u beetoʼoboʼ (Mateo 7:24, 25). Le baʼax tu kaʼansaj tiʼoboʼ bey tu jáalkʼabtoʼob tiʼ le maʼ jaajil kaʼansajoʼ (Juan 8:31, 32). Kex maʼ chéen chʼaʼabil úuchik u beetkoʼob le baʼax tu kaʼansaj Jesúsoʼ jach yaʼab utsil tu kʼamoʼob úuchik u tsʼáaikoʼob ichil u kuxtaloʼob.

 «Biseʼex ta wóokʼoleʼex u cheʼil in kuuch yéetel kaanbalneneʼex tiʼ teen». Úuchjeakileʼ le máakoʼoboʼ suuk kaʼach u tsʼáaikoʼob junpʼéel cheʼ yóokʼol u hombroʼob utiaʼal u kuchkoʼob baʼaloʼob aaltakoʼob. Le oʼolaleʼ le tʼaan ‹cheʼil kuuchoʼ› káaj u meyaj utiaʼal u tsʼaʼabal naʼatbil u tsʼáaikuba máak yáanal u autoridad wa u nuʼuktaj yaanal máak (Levítico 26:13; Isaías 14:25; Jeremías 28:4). Le tʼaan ku yaʼalik le teksto «kaanbalneneʼex tiʼ teen» jeʼel xan u páajtal u traducirtaʼal beyaʼ: «beetabaʼex in discípulo». Jeʼex k-ilik túunoʼ Jesúseʼ táan kaʼach u yaʼalik ka u beetuba u discípuloʼob le máaxoʼob uʼuyik kaʼachoʼ (Juan 13:13-15; 1 Pedro 2:21).

 «Beyoʼ jeʼel a jeʼelsikabaʼexeʼ». Jesúseʼ maʼ tu yaʼalaj u láaj utskíintik u problemas le máakoʼoboʼ. Pero le baʼaxoʼob tu kaʼansajoʼ tu líiʼsaj u yóoloʼob yéetel tu tsʼáajtiʼob esperanza (Mateo 6:25-32; 10:29-31). Le máaxoʼob tu beetubaʼob u discípuloʼob Jesúseʼ tu yiloʼobeʼ maʼ talam u beetaʼal baʼax ku yaʼalik Diosiʼ, baʼaxeʼ ku taasik kiʼimak óolal (1 Juan 5:3).

 «Tumen u cheʼil in kuucheʼ chéen chʼaʼabil u bisaʼal, yéetel in kuucheʼ jach sáal». Jesúseʼ maʼ jeʼex u nuuktakil le religiónoʼob yaan kaʼach teʼ kʼiinoʼoboʼ. Letiʼeʼ jach kabal u yóol, jatsʼuts u modos yéetel maʼ tu séeb tsʼíikil (Juan 7:47-49). Jesúseʼ jach uts yéetel ku chaʼik u náatsʼal le máakoʼob tu yiknaloʼ, tsʼoʼoleʼ u yojel xan maʼ tuláakal baʼal ku páajtal u beetik u discípuloʼobiʼ (Mateo 7:12; Marcos 6:34; Lucas 9:11). Tu kaʼansaj xan tiʼob baʼax unaj u beetkoʼob utiaʼal u chʼaʼabal óotsilil tiʼob tumen Dios yéetel bix jeʼel u páajtal u yantaltiʼob junpʼéel maʼalob concienciaeʼ (Mateo 5:23, 24; 6:14). Le jatsʼuts modos tu yeʼesaj Jesúsoʼ maʼ chéen tu péeksaj le máakoʼob utiaʼal u náatsʼloʼob tu yiknaloʼ, baʼaxeʼ tu yáantoʼob utiaʼal u biskoʼob u cheʼil u kuuch yéetel u beetkubaʼob u discípuloʼob.

 Le tʼaanoʼob ku chíikpajal teʼ Mateo 11:28 tak 30, Jesús aʼal le táan u kʼaʼaytaj Galilea tu añoil 31. Chéen Mateo tsʼíibt le invitación tu beetaj Jesúsoʼ. Como judío yéetel ku cobrartik impuesto kaʼacheʼ u yojel bix u pechʼ óoltaʼal le máakoʼob tumen le romanoʼoboʼ bey xan tumen u nuuktakil le religiónoʼoboʼ. Le oʼolal jach líikʼ u yóol ka tu yilaj bix u meyaj tiʼ Jesús le autoridad tsʼaʼantiʼ tumen Jéeoba, a u Taata, utiaʼal u natsʼik tu yiknal le máakoʼob kabal u yóoloʼob yéetel pechʼ óoltaʼanoʼoboʼ (Mateo 11:25-27).

 U Evangelioil Mateoeʼ ku yaʼalik le jatsʼuts modos tu yeʼesaj Jesús le ka taal way Luʼum bey le Mesíasoʼ, tsʼoʼoleʼ ku yeʼesik xaneʼ láayliʼ letiʼe jatsʼuts modos ken u yeʼes le ken u beet u Reyil tiʼ u Reino Diosoʼ (Mateo 1:20-23; Isaías 11:1-5).

 Utiaʼal a wilik baʼax uláakʼ ku tsolik u libroil Mateoeʼ chaʼant le videoaʼ.