«Jéeoba ka u bendecirtech yéetel ka u kanáantech. Ka u yeʼes Jéeoba kiʼimak u yóol ta wéetel yéetel ka u beet u bintech utsil. Ka u yeʼestech u yutsil Jéeoba yéetel ka u beet u yantaltech jeetsʼelil» (Números 6:24-26, Túumben Luʼum).

 «Yuumtsil u kiʼ tʼantech yéetel u kanáantech. Yuumtsil ka u paktech yéetel kiʼ óolal bey xan u yeʼestech u yutsil. Yuumtsil ka u paktech yéetel yaakunaj ka u tsʼáatech xan le jeetsʼeloʼ» (Números 6:24-26, Quiliʼich Biblia ich Maya).

 Le tʼaanoʼobaʼ kʼaj óolaʼanoʼob bey u bendición Aaróneʼ, le yáax nojoch sacerdote anchaj Israeloʼ (Éxodo 28:1). Le bendición tu tsʼáajoʼ tiʼ Dios u taal (Números 6:22, 23). Dioseʼ tu yaʼalaj tiʼ Moisés: «Lelaʼ letiʼe baʼax ken a waʼal tiʼ Aarón yéetel tiʼ u hijoʼoboʼ: ‹Utiaʼal a bendecirkeʼex le israelitaʼoboʼ›». Ka tsʼoʼokeʼ tu yaʼalaj tiʼ Moisés le tʼaanoʼob ku chíikpajal teʼ Números 6:24-26. Le sacerdoteʼob chúukaʼan u yóoloʼob kaʼachoʼ ku yilik u beetkoʼob le baʼax tu yaʼalaj Diosoʼ. Tsʼoʼoleʼ jach ku respetarkoʼob xan u kʼaabaʼ Jéeoba. a Le versículo 27, ku yaʼalik: «Utiaʼal ka in bendecirt le israelitaʼoboʼ, Aarón yéetel u hijoʼobeʼ unaj u yaʼalikoʼob in kʼaabaʼ le kéen u bendecirtoʼob u kaajil Israeloʼ».

 «Jéeoba ka u bendecirtech yéetel ka u kanáantech». Jéeobaeʼ ku bendecirtik le máaxoʼob meyajtik ikil u kanáantkoʼoboʼ, u nuʼuktikoʼob yéetel u beetik u bin maʼalobil tiʼob (Proverbios 10:22). Le bix tsʼíibtaʼanil Números 6:24-26, ku yeʼesikeʼ Jéeobaeʼ taak u bendecirtik cada «juntúul» israelita.

 «Ka u yeʼes Jéeoba kiʼimak u yóol ta wéetel yéetel ka u beet u bintech utsil». Le kéen u kʼáat máak tiʼ Jéeoba ‹ka u yeʼes kiʼimak u yóol yéetel› wa máaxeʼ u jaajileʼ táan u kʼáatik tiʼ Jéeoba ka u yeʼes u yutsil tiʼ yéetel ka lúubuk utsil tu táan. b Le u xóotʼ versículoaʼ jeʼel u páajtal u traducirtaʼal xan beyaʼ: «Yuumtsil ka u paktech yéetel kiʼ óolal bey xan u yeʼestech u yutsil» (Números 6:25, Quiliʼich Biblia ich Maya). Jéeobaeʼ ku yeʼesik u yutsil tiʼ le máaxoʼob meyajtikoʼ, ku tratarkoʼob maʼalobil yéetel ku chʼaʼik óotsilil tiʼob (Isaías 30:18).

 «Ka u yeʼestech u yutsil Jéeoba c yéetel ka u beet u yantaltech jeetsʼelil». Jéeobaeʼ ‹ku yeʼesik u yutsil› tiʼ le máaxoʼob meyajtik le kéen u tratartoʼob yéetel yaabilaj bey xan kéen u tsʼáa jeetsʼelil tiʼob. Jujunpʼéel libroʼobeʼ ku yaʼalikoʼobeʼ le tʼaan jeetsʼelil (shalom) ku chíikpajal teʼ versículoaʼ ich hebreoeʼ maʼ chéen u kʼáat u yaʼal maʼ u yantal baʼateliʼ, baʼaxeʼ ku tsʼáaik xan naʼatbil ka yanak toj óolal tiʼ máak, maʼ u bineltik mix baʼal tiʼ, ka xiʼik utsil tiʼ yéetel ka u meyajt Dios.

 Utiaʼal u kʼamik le israelitaʼob le bendiciónoʼob ku yaʼalik le tekstoaʼ kʼaʼabéet kaʼach u yuʼubikoʼob u tʼaan Jéeoba (Levítico 26:3-6, 9). Beyoʼ Jéeobaeʼ ku béeykuntik le baʼax u prometermajtiʼoboʼ yéetel ku yáantkoʼob. Lelaʼ bey úuchik teʼ kʼiinoʼob táan u reinar jujuntúul reyoʼob jeʼex Salomón yéetel Ezequías (1 Reyes 4:20, 25; 2 Crónicas 31:9, 10).

 Le máaxoʼob meyajtik Jéeoba teʼ kʼiinoʼobaʼ maʼ tsaaj u repetirkoʼob le bendición jach jeʼex tsʼíibtaʼanil teʼ tekstooʼ. Chéen baʼaleʼ jeʼel u páajtal u kʼáatkoʼob tiʼ Dios ka u bendecirt uláakʼ sukuʼunoʼob wa jeʼel u meyajtiʼob u tuukulil le teksto utiaʼal u líiʼskoʼob u yóol u maasil (1 Tesalonicenses 5:11, 25). Jéeobaeʼ maʼatech u kʼexpajal, letiʼeʼ mantatsʼ u kʼáat u bendecirt yéetel u kanáant le máaxoʼob meyajtikoʼ. Le oʼolal yaan jeetsʼelil tiʼob tumen u yojloʼobeʼ ‹Jéeobaeʼ kiʼimak u yóol tu yéeteloʼob› yéetel ku lúubloʼob utsil tu táan.

 Teʼ yáax diez capítuloʼob yaan tu libroil Númerosoʼ tiʼ tsʼíibtaʼan le baʼax tu yaʼalaj Dios tiʼ u kaajil Israel le tiaʼanoʼob naatsʼ tu montañail Sinaíoʼ. Letiʼobeʼ jach taʼaytak kaʼach u yookloʼob teʼ luʼum u yaʼalmaj Dios u tsʼáaikoʼ. Tu yáamil le año pʼáatoʼob teʼeloʼ Jéeobaeʼ jach maʼalob tu organizartil u kaajal yéetel tu tsʼáajtiʼob jujunpʼéel leyoʼob. Le leyoʼobaʼ letiʼe táakpajoʼob ichil u pactoil le Leyoʼ.

 Jéeobaeʼ tu yaʼalaj tiʼ Moisés ka u yaʼal tiʼ Aarón yéetel u paalaloʼob ka u bendecirtoʼob le kaajoʼ yéetel tu yaʼalajtiʼob bix ken u beetiloʼob (Números 6:22, 23). Desde teʼ kʼiin jeʼeloʼ Aarón yéetel u paalaleʼ suukchaj u meyajtiʼob le tʼaanoʼob ku chíikpajal teʼ Números 6:24-26 utiaʼal u bendecirkoʼob le kaajoʼ. Ka maan kʼiineʼ le sacerdoteoʼ suukchaj u chʼaʼchiʼitik le baʼax ku yaʼalik le teksto cada ken u kʼub u tsʼook sacrificio teʼ templooʼ.

 Utiaʼal a wilik tiʼ uláakʼ baʼaxoʼob ku tʼaan u libroil Númeroseʼ chaʼant le videoaʼ.