«Le boʼol ku tsʼáaik le kʼebanoʼ letiʼe kíimiloʼ, chéen baʼaleʼ le siibal ku tsʼáaik Diosoʼ kuxtal minaʼan u xuul tu yoʼolal k-Yuumtsil Cristo Jesús» (Romanos 6:23, Túumben Luʼum).

 «U boʼolil le kʼebanoʼ kíimil, baʼaleʼ le siibal ku tsʼáaik [Diosoʼ] kuxtal minaʼan u xuul tu yoʼolal Cristo Jesús k-Yuumtsil» (Romanos 6:23, Quiliʼich Biblia ich Maya).

 Teʼ tekstoaʼ Pabloeʼ tu yaʼaleʼ wíinikeʼ ku kíimil yoʼolal le kʼebanoʼ, chéen baʼaleʼ Dioseʼ ku yaʼalikeʼ le máax kun chúukpajal u yóol tak tu xuuleʼ yaan u yantal kuxtal minaʼan u xuul tiʼ.

 «Le boʼol ku tsʼáaik le kʼebanoʼ letiʼe kíimiloʼ». Tuláakal máakeʼ kʼeban kéen síijik le oʼolal ku beetik baʼax kʼaas a (Salmo 51:5; Eclesiastés 7:20). Yoʼolal xan le kʼebanoʼ ku kʼuchul u kʼiinil u chʼíijil yéetel u kíimil máak (Romanos 5:12).

 Utiaʼal k-maas naʼatik lelaʼ Pabloeʼ tu ketaj yéetel juntúul patrón ku boʼotik u j-meyajoʼob. Juntúul máax ku meyajeʼ u yojel deporsi yaan u kʼuchul u kʼiinil u boʼotaʼal, máak xaneʼ u yojel deporsi yaan u kʼuchul u kʼiinil u kíimil yoʼolal kʼebanoʼ.

 Pabloeʼ tu yaʼalaj xaneʼ kéen kíimik máakeʼ ku «jáalkʼabtaʼal tiʼ u kʼeban» (Romanos 6:7). Le kéen kíimik máakeʼ ku boʼotik tuláakal u kʼeban, le oʼolal maʼ unaj k-tuklik wa yaan tuʼux ku beetaʼal u muʼyaj le kimenoʼob yoʼolal le baʼaloʼob kʼaastak u beetmoʼoboʼ. Le Bibliaoʼ jach claro u yaʼalikeʼ le kimenoʼoboʼ maʼ tu páajtal u tuukuloʼob, u beetkoʼob wa baʼax mix u yuʼubikoʼob wa baʼax (Eclesiastés 9:5).

 «Chéen baʼaleʼ le siibal ku tsʼáaik Diosoʼ kuxtal minaʼan u xuul tu yoʼolal k-Yuumtsil Cristo Jesús». Le boʼol tu beetaj Diosoʼ ku tsʼáaik kuxtal minaʼan u xuul. Le tʼaan ich griego ku traducirtaʼal siibaloʼ ku traducirtaʼal xan bey «junpʼéel regalo maʼ tu merecertik máakeʼ» wa «junpʼéel jatsʼuts regalo». Leloʼ ku tsʼáaik naʼatbil u tsʼaʼabal wa baʼax tiʼ máak sin ke u náajaltik. Tuláakal máak kʼeban le oʼolal mix máak náajaltik le salvaciónoʼ mix le kuxtal minaʼan u xuuloʼ (Salmo 49:7, 8). Kex beyoʼ Dioseʼ ku yaʼalik u síik kuxtal minaʼan u xuul tiʼ le máaxoʼob ku tsʼáaik u fejoʼob tiʼ Jesúsoʼ (Juan 3:16; Romanos 5:15, 18).

 Le carta jeʼelaʼ Pablo tsʼíibt tiʼ le máaxoʼob meyajtik Dios kajaʼanoʼob Roma kex teʼ año 56 tsʼoʼokok u taal Jesúsoʼ. Jujuntúul tiʼ le máaxoʼob meyajtik Dios kaʼachoʼ maʼ tu naʼatkoʼob tubeel baʼax u kʼáat u yaʼal u chʼaʼ óotsilil Dios. Como jach yaʼab le máaxoʼob creertik le baʼaxoʼob ku kaʼansik le griegoʼoboʼ, maʼ xaaneʼ tak le máaxoʼob meyajtik Diosoʼ ku tuklikoʼobeʼ mientras maas ku kʼebantaloʼobeʼ maas jeʼel u chʼaʼabal óotsilil tiʼob tumen Dios yéetel u perdonartaʼaloʼobeʼ (Romanos 6:1). Uláakʼoʼobeʼ maʼ xaaneʼ ku tuklikoʼobeʼ mix baʼaltiʼ ka kʼebanchajkoʼob tumen tsʼoʼok u pʼáatal minaʼanoʼob yáanal u Ley Moisés (Romanos 6:15). Teʼ carta tsʼíibtaʼabtiʼob tumen Pablooʼ aʼalaʼabtiʼobeʼ Dioseʼ maʼ ken u chʼaʼ óotsilil tiʼob wa ku chaʼik u suʼusutaʼaloʼob tumen le kʼebanoʼ (Romanos 6:12-14, 16).

 Le baʼax tu yaʼalaj Pablooʼ jeʼel u yáantik le máaxoʼob meyajtik Dios teʼ kʼiinoʼobaʼ tumen kex kʼeban máakoʼob kéen síijkoʼobeʼ yaantiʼob esperanza. Dioseʼ ku yaʼalik u tsʼáaik kuxtal minaʼan u xuul tiʼ le máaxoʼob beetik baʼax ku yaʼalikoʼ (Romanos 6:22).

 Utiaʼal a wilik tiʼ baʼax uláakʼ ku tʼaan u libroil Romanoseʼ chaʼant le videoaʼ.