«Sen kiʼimakchajak a wóol ikil a meyajtik Jéeoba, letiʼ túuneʼ yaan u tsʼáaiktech baʼaxoʼob ku tsʼíiboltik a puksiʼikʼal» (Salmo 37:4, Túumben Luʼum).

 «Yaakunt Yuumtsil yéetel muumun óolal. Letiʼ túuneʼ bíin u tsʼáatech u tsʼíibolal a puksiʼikʼal» (Salmo 37:4, Quiliʼich Biblia ich Maya).

 Teʼ tekstoaʼ le salmistaoʼ tu yaʼaleʼ tuláakal le máaxoʼob adorartik Diosoʼ kʼaʼabéet u kiʼimaktal u yóoloʼob tumen ku béeytal u biskubaʼob tu yéetel. Le máaxoʼob ku biskubaʼob yéetel Jéeobaoʼ a u yojloʼobeʼ letiʼeʼ yaan u tsʼáaiktiʼob le baʼaxoʼob ku tsʼíiboltkoʼoboʼ.

 «Sen kiʼimakchajak a wóol ikil a meyajtik Jéeoba». Le tʼaan jeʼelaʼ jeʼel u béeytal u traducirtaʼal xan beyaʼ: «U meyajtaʼal Jéeobaeʼ letiʼeʼ baʼax taasik kiʼimak óolaloʼ», «disfrutart a adorartik YUUMTSIL» wa «kiʼimakchajak a wóol yoʼolal u promesaʼob YUUMTSIL». Lelaʼ ku yeʼesiktoʼoneʼ chéen jeʼel u kiʼimaktal k-óol wa k-adorartik Jéeobaeʼ (Salmo 37:4). ¿Bix túun jeʼel u béeytal leloʼ?

 Le máaxoʼob adorartik Jéeobaoʼ ku yilik u beetkoʼob baʼax tsʼíibtaʼan teʼ Bibliaoʼ. Letiʼobeʼ maʼ chéen u kʼaj óoloʼob Diosiʼ, baʼaxeʼ ku yuʼubikoʼob u tʼaan, bey u yeʼeskoʼob yaan u naʼatoʼoboʼ. Tsʼoʼoleʼ yaantiʼob junpʼéel maʼalob conciencia yéetel maʼatech u yoksikubaʼob tiʼ problemas (Proverbios 3:5, 6). Por ejemploeʼ maʼ séeb u kʼuuxiloʼobiʼ, tsʼoʼoleʼ maʼ tu tsʼíiboltkoʼob le clase kuxtal ku bisik le máaxoʼob ku tusoʼob yéetel ku yookoloʼoboʼ, kex tumen bey jach maʼalob u bintiʼobeʼ (Salmo 37:1, 7-9). Le máaxoʼob adorartik Jéeobaoʼ kiʼimak u yóoloʼob tumen u yojloʼobeʼ maʼ kun xáantal kéen u xuʼuls tuláakal baʼax kʼas yéetel yaan u sen bendecirtik le máaxoʼob kun chúukpajal u yóoloʼob tiʼ letiʼoʼ (Salmo 37:34). Kiʼimak u yóoloʼob xan tumen u yojloʼobeʼ táan u kiʼimakkúuntkoʼob u yóol Jéeoba (Salmo 5:12; Proverbios 27:11).

 «Letiʼ túuneʼ yaan u tsʼáaiktech baʼaxoʼob ku tsʼíiboltik a puksiʼikʼal». Le tʼaʼanoʼobaʼ ku traducirtaʼal xan beyaʼ: «Letiʼeʼ yaan u tsʼáaik tuláakal baʼax ka kʼatik tiʼ» wa «letiʼeʼ yaan u tsʼáaiktech baʼax ka tsʼíiboltik». Le tekstoaʼ maʼ u kʼáat u yaʼal wa Jéeobaeʼ yaan u tsʼáaiktoʼon jach jeʼel baʼaxak ka k-kʼáattiʼeʼ. Jeʼex juntúul utsul taatatsileʼ letiʼ xaneʼ jach u yojel baʼax kʼaʼabéettoʼon. Tsʼoʼoleʼ le baʼax k-kʼáatiktiʼoʼ bey xan le bix k-kuxtaloʼ maʼ unaj u bin tu contra u leyoʼobiʼ (Proverbios 28:9; Santiago 4:3; 1 Juan 5:14). Wa k-beetik beyoʼ, Jéeoba, le máax «uʼuyik le oraciónoʼoboʼ», jach seguro yaan u yuʼubkoʼon (Salmo 65:2; Mateo 21:22).

 Le Salmo 37, rey David tsʼíibte. Le salmoaʼ tsʼíibtaʼab bey junpʼéel acrósticoeʼ wa jeʼex yanil u alfabetoil le idioma hebreooʼ. b

 Davideʼ jach yaʼab bix beetaʼabik u muʼyaj. Rey Saúl yéetel uláakʼ máaxoʼob pʼekmileʼ tu chʼaʼpachtoʼob utiaʼal u kíimsoʼob (2 Samuel 22:1). Chéen baʼaleʼ Davideʼ mantatsʼ confiarnaj tiʼ Jéeoba. Letiʼe u yojleʼ yaan u kʼuchul u kʼiinil u xuʼulsaʼal le kʼasaʼan máakoʼob tumen Jéeobaoʼ (Salmo 37:10, 11). Kex bey maʼalob u bin tiʼ le kʼasaʼan máakoʼob wa kex «beyoʼob yaʼax suʼuk[eʼ]» yaniliʼ u kʼuchul u kʼiinil u láaj xuʼulsaʼaltiʼobeʼ (Salmo 37:2, 20, 35, 36).

 Le Salmo 37, ku yaʼalik bix kun bin tiʼ le máaxoʼob beetik baʼax ku yaʼalik Diosoʼ yéetel baʼax ku páaʼtik le máaxoʼob maʼatech u yuʼubikoʼob u tʼaanoʼ (Salmo 37:16, 17, 21, 22, 27, 28). Le salmoaʼ ku yáantkoʼon utiaʼal ka yanaktoʼon naʼat yéetel utiaʼal ka kuxlakoʼon jeʼex uts tu tʼaan Dioseʼ.

 Utiaʼal a wilik tiʼ baʼax ku tʼaan u libroil Salmoseʼ chaʼant le videoaʼ.