«¡Xuʼuluk a baʼateleʼex! Ojéelteʼexeʼ teneʼ Diosen. Yaan in alabartaʼal tumen le kaajoʼoboʼ, yaan in alabartaʼal tumen u kajnáaliloʼob le luʼumoʼ» (Salmo 46:10, Túumben Luʼum).

 «¡Jetsʼkúuntabaʼex! ¡Kʼaj óolteʼexeʼ, teen [Jajal Diosen]! ¡Tiʼ yanen tu yóokʼol le múuchʼ kaajoʼoboʼ! ¡Tiʼ yanen tu yóokʼol tuláakal le luʼumaʼ!» (Salmo 46:10, Quiliʼich Biblia ich Maya).

 Dioseʼ u kʼáat ka adorartaʼak yéetel ka reconocertaʼak chéen tiʼ letiʼ yaan u derechoil u gobernar. Tuláakal le máax u kʼáat kuxtal mantatsʼeʼ unaj u reconocertik chéen Dios yaan u poder (Apocalipsis 4:11).

 «¡Xuʼuluk a baʼateleʼex! Ojéelteʼexeʼ teneʼ Diosen». Yaan Bibliaʼobeʼ kéen u traducirtoʼob le yáax tʼaan tiʼ le tekstoaʼ, ku tsʼáaikoʼob le tʼaan: «Jetsʼkúuntabaʼex» wa «maʼ a péekeʼex». Yoʼolal leloʼ yaʼab máakoʼobeʼ ku tuklikoʼobeʼ le tekstoaʼ u kʼáat u yaʼaleʼ kéen xiʼikoʼob iglesia, templo wa tuláakʼ tuʼux u adorartoʼob Dioseʼ, maʼ unaj u tʼaanoʼobiʼ, chéen unaj u kutaloʼob. Chéen baʼaleʼ u jaajileʼ le tʼaan ich hebreo ku traducirtaʼal «¡Xuʼuluk a baʼateleʼex! Ojéelteʼexeʼ teneʼ Diosen», junpʼéel baʼal ku yaʼalik Jéeoba a tiʼ tuláakal máak. Teʼelaʼ táan u yaʼaliktiʼob ka yanakoʼob yáanal u páajtalil yéetel ka u reconocertoʼob chéen tiʼ letiʼ yaan u derechoil u adorartaʼal.

 Lelaʼ óoliʼ chíikaʼan tiʼ le baʼax ku yaʼalik le Salmo capítulo 2, teʼeloʼ ku yaʼalikeʼ Dioseʼ yaan u xuʼulsik tiʼ tuláakal le máaxoʼob ku tsʼáaikubaʼob tu contraoʼ. Chéen baʼaleʼ le máaxoʼob ku reconocerkoʼob chéen tiʼ Jéeoba yaan u derechoil u gobernaroʼ u yojloʼobeʼ letiʼeʼ yaan u yáantkoʼob, yaan u nuʼuktikoʼob yéetel yaan u tsʼáaiktiʼob naʼat. Le máaxoʼob ku «natsʼkubaʼob tu yiknal» Diosoʼ kex táan u aktáantkoʼob wa baʼax beetik u muʼyajoʼobeʼ kiʼimak u yóoloʼob yéetel u yojloʼob yaan u yantaloʼob (Salmo 2:9-12).

 «Yaan in alabartaʼal tumen le kaajoʼoboʼ, yaan in alabartaʼal tumen u kajnáaliloʼob le luʼumoʼ». Úuchjeakileʼ Jéeobaeʼ jach tu kanáantaj u kaajil Israel, le oʼolaleʼ letiʼobeʼ jach tu alabartoʼob (Éxodo 15:1-3). Maʼ kun xáantaleʼ tuláakal máak ken u respetart yéetel ken u adorart Jéeoba, teʼ kʼiin jeʼeloʼ chéen Jéeoba kun alabarbil (Salmo 86:9, 10; Isaías 2:11).

 Junpʼéel libro ku tʼaan tiʼ le baʼax ku yaʼalik le Salmo 46, ku yaʼalikeʼ le kʼaayaʼ táan u tʼaan tiʼ «u jach creertik máak de ke yéetel u poder Dioseʼ jeʼel u kanáantik u kaajal tiʼ jeʼel baʼaxakeʼ». Cada ken u kʼayoʼob le Salmo 46, le israelitaʼoboʼ ku yeʼeskoʼobeʼ ku confiaroʼob de ke yaan u kanáantaʼaloʼob yéetel yaan u yáantaʼaloʼob tumen Jéeoba (Salmo 46:1, 2). Le salmoaʼ ku kʼaʼajsik xan tiʼobeʼ de ke mix bikʼin kun pʼatbiloʼob (Salmo 46:7, 11).

 Le israelitaʼoboʼ le kéen u kʼayoʼob le salmoaʼ ku tuukuloʼob tiʼ le nukuch baʼaloʼob u beetmaj Jéeobaoʼ, leloʼ tu yáantoʼob utiaʼal ka maas confiarnakoʼob tiʼ le poder yaantiʼoʼ (Salmo 46:8). Le salmo xanaʼ tu kʼaʼajsajtiʼobeʼ Dioseʼ jeʼel u xuʼulsik le guerraʼoboʼ (Salmo 46:9). Jeʼel u páajtal u yaʼalaʼaleʼ le ka tu kanáantaj Jéeoba u kaajal tiʼ le máaxoʼob pʼekmiloʼoboʼ bey men cuenta tu xuʼulsaj tiʼ le guerraʼoboʼ. Le Bibliaoʼ ku yaʼalikeʼ maʼ kun xáantaleʼ Jéeobaeʼ yaan u xuʼulsik junpuliʼ le guerraʼoboʼ (Isaías 2:4).

 ¿Kux túun bejlaʼeʼ? ¿Láayliʼ wa táan u yáantik Jéeoba le máaxoʼob meyajtikoʼ? Láayliʼeʼ. Le apóstol Pablooʼ tu yaʼalaj tiʼ le cristianoʼoboʼ ka confiarnakoʼob de ke yaan u yáantaʼaloʼob tumen Dios (Hebreos 13:6). Le baʼax ku yaʼalik le Salmo 46, ku kʼaʼajsiktoʼoneʼ jeʼel u páajtal k-confiar de ke Jéeobaeʼ yaan u kanáantkoʼon yéetel le poder yaantiʼoʼ. Yéetel ku kʼaʼajsik xan toʼoneʼ «Dioseʼ ku kanáantkoʼon yéetel ku tsʼáaiktoʼon muukʼ» (Salmo 46:1).

 Utiaʼal a wilik tiʼ baʼax ku tʼaan u libroil Salmoseʼ chaʼant le videoaʼ.