Tu mesil diciembre tiʼ 2012, u j-jaajkunajoʼob Jéeoba yaan Tailandiaeʼ tu tsʼáaj u yóol u yáantoʼob le paalal u jóoʼsoʼob u yutsil le xookoʼ. Veinte j-Jaajkunajoʼobeʼ tu xíimbaltoʼob u escuelailoʼob Bangkok, tʼaanajoʼob yéetel le directoroʼoboʼ, ka tu tsʼáajoʼob tiʼ le maestroʼob yéetel tiʼ le paalal le revista ¡Despertad! octubre tiʼ 2012 ku kʼaabaʼtik «Cómo aprovechar al máximo la escuela».

Le ka tu yiloʼob yaʼab utsil tu taaseʼ, tu xíimbaltoʼob uláakʼ escuelaʼob teʼ Tailandiaoʼ. Ichil año y medioeʼ, le j-Jaajkunajoʼoboʼ tu xíimbaltoʼob 830 escuelaʼob. Le maestroʼob yéetel le paalaloʼ jach jatsʼuts tu yiloʼob le revistaoʼ, le oʼolal anchaj u imprimirtaʼal uláakʼ óoxpáak. Tu káajbaleʼ chéen 30,000 imprimirtaʼabi, baʼaleʼ tu tsʼookeʼ tʼoʼox maas tiʼ 650,000 u pʼéelal.

Le directoroʼob yéetel le maestroʼoboʼ séeb úuchik u tsʼáaikoʼob cuenta jach táaj maʼalob baʼax ku yaʼalik le revistaoʼ. Juntúul maestraeʼ tu yaʼalaj: «Le revistaaʼ yaan u yáantik le j-xoknáaloʼob utiaʼal u biskubaʼob maʼalob yéetel u taataʼob bey xan utiaʼal u béeytaloʼob yéetel le baʼax ku tuklikoʼoboʼ». Tiʼ jujunpʼéel escuelaʼobeʼ joʼopʼ u meyaj utiaʼal u kaʼansaʼal le paalaloʼ, tiʼ uláakʼoʼobeʼ utiaʼal u practicartaʼal xook. Tiʼ junpʼéel escuelaeʼ meyajnaj utiaʼal u beetik u tarea le paalaloʼ, hasta tsʼaʼab u premio le máax maas maʼalob tu beetiloʼ.

Juntúul x-chʼúupaleʼ tu tsʼáaj u diosboʼotikil yoʼolal le xook «Cómo ganarle la batalla a la obesidad infantil y juvenil» jóokʼ teʼ revistaoʼ. Le x-chʼúupaloʼ tu yaʼaleʼ yaʼab máak ku sen poloktal bejlaʼeʼ, le oʼolal u amigoʼobeʼ maʼ uts tu tʼaan u tsikbaloʼob tu yoʼolal leloʼ. Tu yaʼalaj xan: «Diosboʼotik yoʼolal le jatsʼuts consejos ka tsʼáaikeʼexoʼ; chéen chʼaʼabil u beetaʼal».

Le taatatsiloʼoboʼ tu tsʼáajoʼob xan u diosboʼotikil yoʼolal le revistaoʼ. Juntúul maamatsileʼ tu yaʼalal tiʼ kaʼatúul x-Jaajkunajoʼob xíimbalt tu yotoch: «Le jatsʼuts consejos ku taaskoʼ tsʼoʼok u yáantik in hija utiaʼal ka xiʼik utsil tiʼ teʼ escuelaoʼ».

Pichai Petratyotin, juntúul u j-jaajkunaj Jéeoba tailandiaileʼ, tu yaʼalaj: «Le revista ¡Despertad! k-tʼoxkoʼ ku yeʼesikeʼ kex ka máanak tiempoeʼ le jatsʼuts kaʼansaj yaan teʼ Bibliaoʼ láayliʼ jach maʼalobeʼ. U j-jaajkunajoʼon Jéeobaeʼ k-tuklikeʼ le xookoʼ jach kʼaʼanaʼan, le oʼolal kiʼimakchaj k-óol úuchik k-tʼoxik gratis le revista tiʼ tuláakal máakoʼ».