Ojéelaʼaneʼ u j-jaajkunajoʼon Jéeobaeʼ k-traducirtik publicacionoʼob ich yaʼab idiomaʼob. Tu mesil noviembre tiʼ 2014, tsʼokaʼaniliʼ k-traducirtik le Biblia ich 125 idiomaʼoboʼ bey xan uláakʼ publicacionoʼob ich 742 idiomaʼob. Baʼaleʼ ichil u meeyjil traduccioneʼ k-grabartik xan videoʼob. Jeʼex le videoʼob ¿Bix le muchʼtáambaloʼob ku beetaʼal teʼ Najil Reinooʼ? yéetel ¿Baʼaxten unaj a xokik le Bibliaoʼ?, tu mesil enero tiʼ 2015, tsʼokaʼaniliʼ k-traducirtik ich 569 idiomaʼobeʼ. ¿Baʼaxten k-beetik? ¿Bix u béeytal tuláakal le meyajaʼ?

Tu mesil marzo tiʼ 2014, le Cuerpo Gobernante tiʼ u j-jaajkunajoʼob Jéeobaoʼ tu yaʼalaj tiʼ tuláakal le sucursaloʼob ka u grabartoʼob videoʼob ichil le bukaʼaj idiomaʼob ku páajtaloʼ, beyoʼ le máakoʼoboʼ jeʼel u taaktal u maas kaanbaloʼob yoʼolal le Bibliaoʼ.

Yaʼab u meeyjil u grabartaʼal le videoʼoboʼ. Yáaxeʼ ku traducirtaʼal tuláakal le juʼunoʼob yéetel uláakʼ baʼaxoʼob kun meyajoʼ. Tsʼoʼoleʼ ku yéeyaʼal juntúul máak tʼanik le idioma utiaʼal u tsʼáaik u vozoʼ. Ken tsʼoʼokkeʼ le máaxoʼob ku meyajoʼob tiʼ audio yéetel videooʼ ku grabartikoʼob le vozoʼ, ku editartikoʼob yéetel ku preparartikoʼob le tsʼíiboʼob kun chíikpajal teʼ pantallaoʼ. Tu tsʼookeʼ ku tsʼáaikoʼob tuláakal ichil junpʼéeliliʼ archivo yéetel ku preparartikoʼob utiaʼal u naʼaksaʼal Internet teʼ jw.org.

Tiʼ jujunpʼéel sucursaloʼobeʼ yaan mejen cuartoʼob tuʼux ku yúuchul grabar bey xan máakoʼob u yojloʼob le meyajaʼ. Baʼaleʼ ¿kux túun le videoʼob ku tʼaʼanal yéetel ku traducirtaʼal teʼ náanach kaajoʼoboʼ?

Tiʼ tuláakal yóokʼol kaabeʼ ku túuxtaʼal técnicos utiaʼal u grabartikoʼob le audio yéetel nuʼukuloʼob chéen chʼaʼabil u bisaʼal jeʼel tuʼuxakoʼ. Ku biskoʼob microfonoʼob, mejen computadoraʼob bey xan programaʼob utiaʼal grabar. Yaan horaeʼ tiʼ junpʼéel oficina ku yúuchul grabar, tiʼ junpʼéel Najil Reino, wa tiʼ junpʼéel naj majáantaʼan. Le máaxoʼob tʼanik le idioma kun grabartbiloʼ ku yookloʼob grabar, ku beetik u directoriloʼob wa ku yilkoʼob wa maʼalob u bin le grabacionoʼ. Ken tsʼoʼokok tuláakaleʼ le técnico de audiooʼ ku molik u nuʼukuloʼob utiaʼal grabareʼ ku bin tuláakʼ tuʼux.

Yaʼab utsil tsʼoʼok u taasik u grabartaʼal le videoʼobaʼ. Yaʼab máakoʼobeʼ yáax u yilkoʼob junpʼéel video ichil u idiomaʼob.

Ichil le idiomaʼob grabartaʼaboʼ tiaʼan le pitiantiatiaraoʼ, junpʼéel idioma ku tʼaʼanal tumen maas tiʼ 2,500 máakoʼob teʼ Australiaoʼ. Le videoʼobaʼ grabartaʼab tu kaajil Alice Springs (Territorio del Norte). «Jach jatsʼuts le videoʼoboʼ —tu yaʼalaj Callan Thomas, máax áantajnaj teʼ grabacionoʼ—. Le máakoʼoboʼ maʼ tu luʼsik u paakatoʼob tiʼ le tabletoʼoboʼ; tu sen kʼáatoʼobtoʼon tuʼux jeʼel u páajtal u yilkoʼob u maasil videoʼobeʼ. Como maʼ yaʼab publicacionoʼob yaan ich pitiantiatiaraeʼ, ku kiʼimaktal u yóol u yojéeltkoʼob tsʼoʼok u grabartaʼal baʼaloʼob utiaʼal uʼuybil wa chaʼantbil ichil u idiomaʼob.»

Kaʼatúul j-Jaajkunajoʼob tiʼ Cameruneʼ viajarnajoʼob tiʼ junpʼéel canoa tu contra u jaʼil le ríooʼ. Jeʼeloʼob tuʼux kajaʼan le pigmeosoʼ ka tʼaanajoʼob yéetel u nojchil le kaajoʼ; le máakaʼ letiʼ xan ku kaʼansaj tiʼ junpʼéel escuela yaan teʼ kaajoʼ. Ka tu yojéeltoʼob ku tʼanik bassaeʼ le j-Jaajkunajoʼoboʼ tu yeʼesoʼobtiʼ le video ¿Baʼaxten unaj a xokik le Bibliaoʼ? tiʼ junpʼéel tablet ichil u idioma.

Tiʼ junpʼéel chan kaaj yaan Indonesiaeʼ u nojchil junpʼéel religioneʼ tu chʼaʼpachtaj le j-Jaajkunajoʼoboʼ ka tu tóokaj tuláakal le publicacionoʼob u tʼoxmoʼob teʼ kaajoʼ. Uláakʼ máakoʼobeʼ tu yóotaj u tóokoʼob le Najil Reinooʼ. Ka tsʼoʼokeʼ taal xan kantúul policía u interrogartoʼob juntúul kiik (juntúul koʼolel u j-jaajkunaj Jéeoba) yéetel u láakʼtsiloʼob tu yotoch. Le policíaʼoboʼ u kʼáat kaʼach u yojéeltoʼob baʼax ku beetaʼal teʼ Najil Reinooʼ. Le kiik túunoʼ tu yeʼesajtiʼob le video ¿Bix le muchʼtáambaloʼob ku beetaʼal teʼ Najil Reinooʼ? ich indonesio.

Ka tsʼoʼok u chaʼantik le videooʼ, juntúul policíaeʼ tu yaʼalaj: «Le máaxoʼob takik a pooleʼexoʼ junpuliʼ maʼ u yojloʼob mix baʼal ta woʼolaleʼexiʼ». Uláakʼ juntúuleʼ tu yaʼalaj: «¿Jeʼel wa a tsʼáaikeʼexten utiaʼal in weʼesik tiʼ uláakʼ máakoʼobeʼ?». Desde ka tu yiloʼob le videooʼ le policíaʼoboʼ káaj tak u kanáantik yéetel u defendertik le j-Jaajkunajoʼoboʼ.

Techeʼ ¿a chaʼantmaj wa le videoʼoboʼ? ¿Kux túun wa ka a chaʼant ichil a idioma?