Tu kʼiinil 13 tiʼ septiembre tiʼ 2014, tsʼoʼoksaʼab le xook 137 tiʼ le Escuela Bíblica tiʼ Galaad yaan tu kaajil Patterson (Nueva York). Teʼ escuelaaʼ ku kaʼansaʼal le j-Jaajkunajoʼob úuch káajak u meyajtikoʼob Dios utiaʼal ka áantajnakoʼob teʼ múuchʼuliloʼob wa teʼ sucursaloʼob tuʼux kun túuxtbiloʼoboʼ. Le muchʼtáambalaʼ beetaʼab Patterson, baʼaleʼ máansaʼab tiʼ Internet tak tu luʼumil Canadá, Estados Unidos, Jamaica yéetel Puerto Rico. Tuláakal le máaxoʼob chaʼantoʼ 12,333 u túulal.

Samuel Herd, máax yaan ichil le Cuerpo Gobernante tiʼ u j-jaajkunajoʼob Jéeobaoʼ, letiʼ nuʼukt le muchʼtáambaloʼ. Tu káajbaleʼ tu yaʼaleʼ u tuukuloʼob Dioseʼ maas kaʼanaltak tiʼ le k-tiaʼaloʼ (Isaías 55:​8, 9). Tu yaʼalaj tiʼ le j-xoknáaloʼoboʼ le baʼaxoʼob tu kanoʼob ich cinco mesesoʼ, u jaajileʼ «chéen junpʼíit» tiʼ le bukaʼaj baʼaloʼob yaan tu tuukul Diosoʼ (Job 26:14). Tu yaʼalaj xaneʼ ku taasik utsil u muchʼkuba máak utiaʼal u tʼaan tiʼ baʼaxoʼob ku tuklik Dios, yéetel bey kun úuchul kaʼach teʼ kʼiin jeʼeloʼ.

«U yich le kiliʼich muukʼoʼ letiʼ lelaʼ: [...] chúukaʼan óolal» (Galaciailoʼob 5:​22). John Larson, máax yaan ichil le Comité tiʼ u Sucursalil Estados Unidoseʼ, tu tsolaj kaʼapʼéel forma bix jeʼel k-eʼesik «chúukaʼan óolal» wa pacienciaeʼ. Yáaxeʼ kʼaʼabéet u chúukpajal k-óol tiʼ Jéeoba le táan u kaʼanskoʼon yéetel le táan u yáantkoʼon k-pʼáatal ichil u jaajiloʼ (1 Pedro 5:​10). Abrahaneʼ bey tu beetiloʼ: chúukpaj u yóol le táan u kaʼansaʼaloʼ bey xan le táan u páaʼtik u béeytal le promesa tu beetaj Jéeobaoʼ (Hebreoʼob 6:​15).

U kaʼapʼéeleʼ kʼaʼabéet u yantaltoʼon paciencia t-éetel. Beora tsʼoʼok le xook teʼ Galaadoʼ, le j-xoknáaloʼoboʼ jeʼel u tuklikoʼobeʼ maʼalob kun jóokʼoltiʼob tuláakal. Ken kʼuchukoʼob tuʼux kun túuxtbiloʼobeʼ wa maʼ tu jóokʼol maʼalob le baʼax ken u beetoʼoboʼ maʼ xaaneʼ jeʼel u tuklikoʼobeʼ: «¿Baʼax ku yúuchulten?». Sukuʼun Larsoneʼ tu tsikbaltajtiʼob junpʼéel baʼax uchaʼantiʼ, tsʼoʼoleʼ tu yaʼalajtiʼobeʼ wa yaan paciencia tiʼob bey xan wa ku tsʼáaik u yóoloʼob meyaj le táan u kaʼansaʼaloʼob tumen Jéeobaoʼ yaan u páajtal u aktáantkoʼob jeʼel baʼalakeʼ (Hebreoʼob 6:​11, 12).

«Wa mantatsʼ kabal a wóoleʼexeʼ yaan a kuxtaleʼex minaʼan u xuul.» Anthony Morris, máax yaan ichil le Cuerpo Gobernanteoʼ, tu máansaj junpʼéel tsoltʼaan jóoʼsaʼan tiʼ Salmo 22:26, tuʼux ku yaʼalik: «Kuxlakeʼex yaʼabkach jaʼaboʼob». Utiaʼal k-kʼamik le kuxtaloʼ kʼaʼabéet k-eʼesik kabal óolal. Sukuʼun Morriseʼ tu yaʼaleʼ kʼaʼabéet k-eʼesik kabal óolal utiaʼal ka páajchajak k-meyajtik Jéeoba. Tuláakloʼon, kex wa úuch joʼopʼok k-meyajtik Jéeobaeʼ, jeʼel u tuʼubultoʼon u kʼaʼanaʼanil k-kuxtal jeʼex Jesucristoeʼ (2 Pedro 1:9).

Le Bibliaoʼ ku tʼaan tiʼ máaxoʼob kabal u yóoloʼob bey xan tiʼ máaxoʼob kaʼanal u yichoʼob. Herodes Agripaeʼ yoʼolal u sen kaʼanal ichileʼ tu chaʼaj u tsʼaʼabaltiʼ le nojbeʼenil chéen tiʼ Dios unaj u tsʼaʼabaloʼ, le oʼolal loobiltaʼab tumen u ángel Jéeoba, ka «jaantaʼab tumen x-nookʼol» (Baʼaxoʼob [Hechos] 12:21-​23). Maʼ jeʼex Pedroeʼ; le ka kʼeʼey tumen Jesús úuchik u tuukul «jeʼex u tuukul wíinikeʼ» letiʼeʼ maʼ kʼuuxilnajiʼ (Mateo 16:21-​23). Yéetel kabal óolaleʼ tu chaʼaj u yáantaʼal. ¡Bey unaj k-beetik xanoʼ! (1 Pedro 5:5.)

Jujuntúul j-xoknáaloʼobeʼ yaan u binoʼob meyaj teʼ sucursaloʼob yaan tiʼ u j-jaajkunajoʼob Jéeobaoʼ. Sukuʼun Morriseʼ tu yaʼalajtiʼobeʼ wa maʼ kabal u yóoloʼobeʼ maʼ tun kiʼimaktal u yóoloʼob. Chéen baʼaleʼ istikyaj u tsʼáaik cuenta máak maʼ kabal u yóoliʼ. Le sukuʼunoʼ tu tsikbalteʼ juntéenjeakeʼ tsoʼol u xikin juntúul anciano, tumen maʼ tu yeʼesaj kabal óolaliʼ. Le ancianooʼ tu túuxtaj junpʼéel carta tiʼ le sucursal tuʼux tu yaʼalaj: «Minaʼan uláakʼ máak maas kabal u yóol tiʼ teen». Le sukuʼun Morrisoʼ tu yaʼalaj tiʼ le j-xoknáaloʼoboʼ kʼaʼabéet u kanáantkubaʼob utiaʼal maʼ u kaʼantal xan u yichoʼob. Wa ku kʼaʼajaltiʼob maas nojoch u autoridad Jéeoba yéetel Jesuseʼ maʼ ken u nojbaʼalkúunsubaʼob, baʼaxeʼ yaan u seguer u yeʼeskoʼob kabal óolal.

«Dioseʼ maʼ chéen junpʼíit kiliʼich muukʼ ku tsʼáaikiʼ» (Juan 3:​34). Michael Burnett, juntúul u maestroil Galaadeʼ, tu kʼaʼajsaj tiʼ le j-xoknáaloʼoboʼ letiʼe kiliʼich muukʼ ken u yáantoʼob teʼ tuʼux kun binoʼoboʼ. U kiliʼich muukʼ Dioseʼ tu yáantaj Bezalel utiaʼal u kanik u beet tuláakal baʼax kʼaʼabéetchaj teʼ tabernaculooʼ (Éxodo 35:30-​35). Le kiliʼich muukʼoʼ maʼ chéen tu yáantaj Bezalel utiaʼal u maas kaanbaliʼ, baʼaxeʼ tu yáantaj u kaʼans uláakʼ máakoʼob. Bey kun úuchul xan yéetel le máaxoʼob xooknajoʼob teʼ Galaadoʼ, maases wa ku tsʼáaik u yóol u kaʼansajoʼob jeʼex u beetik le Bibliaoʼ.

Úuchjeakileʼ tak le koʼoleloʼob israelitaʼob meyajnajoʼob ka beetaʼab le tabernaculooʼ (Éxodo 35:25, 26). Bey túun xanoʼ, le kiikoʼob binoʼob teʼ xookaʼ tu yeʼesoʼob jach u yojel u yáant u yíichamoʼob. Tu tsʼoʼokbal u tsoltʼaaneʼ sukuʼun Burnetteʼ tu yaʼalaj tiʼ le j-xoknáaloʼoboʼ: «Le baʼax a wojel a beeteʼexoʼ beeteʼex yéetel kabal óolal, yéetel uʼuyeʼex tʼaan. Wa ka beetkeʼex beyoʼ, Jéeobaeʼ yaan u tsʼáaikteʼex tuláakal le kiliʼich muukʼ kʼaʼabéetteʼexoʼ».

«¿Jeʼel wa a wóokʼot tin wéeteleʼ?» Mark Noumair, máax ku yáantaj teʼ Comité tiʼ Enseñanzaoʼ, tʼaanaj tiʼ baʼax tu beetaj rey David ka bisaʼab u cofreil, wa u arcail, le núuptʼaan tu kaajil Jerusalenoʼ (2 Samuel 6:​12-​14). Le táan u yoksaʼal le cofre teʼ kaajoʼ, tumen kabal u yóol Davideʼ óokʼotnaj yéetel kiʼimak óolal «tu táan u x-kʼoosoʼob[,] tu táan xan u palitsiloʼob» (2 Samuel 6:​20-​22). Maʼ xaaneʼ le koʼoleloʼobaʼ maʼ tu tuʼubsoʼob le baʼax úuchoʼ. Le sukuʼunoʼ, tu yaʼalaj tiʼ le j-xoknáaloʼob «ka óokʼotnakoʼob yéetel le x-kʼoosoʼoboʼ». ¿Baʼax u kʼáat u yaʼal leloʼ? Le sukuʼunoʼ tu beetajtiʼob le kʼáatchiʼobaʼ: «¿Yaan wa u suuktal a wáantkeʼex le túumbenoʼoboʼ? ¿Yaan wa a yaabiltikeʼex u maasil yoʼolal le jatsʼuts modos yaantiʼoboʼ?».

Wa ku beetkoʼob le baʼax aʼalaʼabtiʼobaʼ yaan u yeʼeskoʼob yaabilaj jach jeʼex u beetik Jéeobaeʼ (Salmo 113:​6, 7). Kex kaʼanal u yich le máaxoʼob yéetel kun tʼaanoʼoboʼ, letiʼobeʼ maʼ unaj u ketiktiʼobiʼ. Le sukuʼunoʼ tu yaʼalaj baʼax jeʼel u páajtal u beetkoʼobeʼ: «Unaj a wilkeʼex maʼ a creertikabaʼex». Tsʼoʼoleʼ tu yaʼalajtiʼob: «Kanáanteʼex le tamanoʼob jeʼex u beetik Jéeobaoʼ».

«Kʼaʼaytajnakoʼon tuláakal tuʼux.» William Samuelson, u superintendenteil le Departamento tiʼ Escuelas Teocraticasoʼ, tu yaʼaleʼ apóstol Pabloeʼ tu yilaj u kʼaʼaytaj tuláakal tuʼux (Baʼaxoʼob 17:17). Tsʼoʼoleʼ tu yaʼalaj ka máanak jujuntúul sukuʼunoʼob u yeʼesoʼob baʼax úuchtiʼob teʼ kʼaʼaytaj le kʼiinoʼob tiaʼanoʼob tu Escuelail Galaadoʼ. Juntúul sukuʼun yéetel u yataneʼ tu yeʼesoʼob bix úuchik u tsikbaloʼob yéetel juntúul koʼolel ku meyaj tiʼ junpʼéel supermercado. Tu páaʼtoʼob junsúutukeʼ, ka tu yeʼesoʼobtiʼ le video ¿Baʼaxten unaj a xokik le Bibliaoʼ? Ka tsʼoʼokeʼ tu yaʼaloʼobtiʼ ka okok Internet teʼ jw.org utiaʼal u yilik baʼaloʼob yaan ich lao, le idioma ku tʼankoʼ. Ka máan kʼiineʼ, suunaj u yiloʼob le koʼolelaʼ ka tu líiʼsoʼob u yóol u xok le Bibliaoʼ.

«Seguernak a meyajeʼex tu yoʼolal le Reinooʼ.» William Nonkes, máax ku meyaj teʼ Departamento tiʼ Serviciooʼ, tu entrevistartaj kantúul tiʼ le j-xoknáaloʼoboʼ. Le sukuʼunoʼobaʼ u chʼaʼtukultmiliʼ u beetkoʼob baʼax ku yaʼalik Isaías 6:8: u meyajoʼob yoʼolal le Reinooʼ. Pero u escuelail Galaadeʼ áantajnaj utiaʼal u beetkoʼob u maasil. Le kiik Snolia Masekooʼ tu yaʼaleʼ áantaʼab tumen u escuelail Galaad utiaʼal u yilik baʼax jeʼel u páajtal u beetik maas maʼalobeʼ, maases bix jeʼel u aprovechartik le tiempooʼ, tak le ken tsʼoʼokok u kʼaʼaytaj bul kʼiinoʼ. Tu yaʼalaj: «Le escuelaaʼ táan u yáantken in beet maas tiʼ le in tukultmaj kaʼachoʼ. Le sukuʼun Dennis Nielsenoʼ, tu yaʼaleʼ áantaʼab tumen Sofonías 3:​17 utiaʼal maʼ u lúubul u yóol kʼaʼaytaj. Bey tu yaʼalilaʼ: «Wa junpʼéel kʼiin maʼ tu binten maʼalobil teʼ kʼaʼaytajoʼ, unaj in kʼaʼajsikeʼ Jéeobaeʼ jach táaj kiʼimak u yóol tumen táan in weʼesik in yaabilaj tiʼ, le oʼolal kʼaʼabéet u kiʼimaktal in wóol».

«Ilawileʼex le chʼíichʼoʼob ku xikʼnaloʼob teʼ kaʼanoʼ» (Mateo 6:​26). Le noj tsoltʼaan máansaʼab tumen Stephen Lett, máax yaan ichil le Cuerpo Gobernanteoʼ, tʼaanaj tiʼ le ka tu yaʼalaj Jesús unaj ‹k-paktik le chʼíichʼoʼoboʼ›. Le sukuʼunaʼ tu yaʼaleʼ yaʼab baʼax jeʼel k-kanik tiʼ le chʼíichʼoʼoboʼ (Job 12:7).

Jeʼex u tséentik Jéeoba le chʼíichʼoʼoboʼ bey u tsʼáaiktoʼon xan le baʼax kʼaʼabéettoʼonoʼ. Toʼoneʼ kajaʼanoʼon «tu yotoch Dios», le oʼolal kʼaʼabéet k-kʼubik k-óol tiʼ letiʼ, tumen jeʼex u yaʼalik le Bibliaoʼ Dioseʼ ku tsʼáaik baʼax kʼaʼabéet tiʼ le máaxoʼob «yanoʼob tu yotochoʼ» (1 Timoteo 3:​15; 5:8). Baʼaleʼ maʼ u kʼáat u yaʼal wa mix baʼal xan ken k-beetiʼ. Jeʼex le chʼíichʼoʼob ku kaxtik u yoʼochoʼobeʼ, toʼon xaneʼ unaj ‹k-kaxtik táanil u Reino Dios› utiaʼal k-kʼamik u bendición (Mateo 6:​33).

Le sukuʼun Lettoʼ tu yaʼalaj xaneʼ le chʼíichʼoʼoboʼ ken u yiloʼob yaan baʼax jeʼel u beetik loob tiʼobeʼ ku yawatoʼob utiaʼal u kanáantkuba u maasil. Toʼon xaneʼ ken k-il juntúul sukuʼun «táan u jóokʼol tiʼ le bej[oʼ]» unaj k-aʼaliktiʼ utiaʼal u kanáantkuba (Galaciailoʼob 6:1). Tsʼoʼoleʼ yéetel le kʼaʼaytaj k-beetkoʼ k-tsʼáaik u yojéelt le máakoʼob jach taʼaytak u kʼuchul «u noj kʼiinil Yuumtsil», le kʼiin ken u xuʼuls Dios le baʼaloʼob kʼaastakoʼ (Sofonías 1:​14). Tu tsʼookeʼ le sukuʼunoʼ tu yaʼaleʼ jeʼex le chʼíichʼoʼob ku kʼáatmáanskoʼob nukuch puʼukoʼob kaʼanaltakoʼob utiaʼal u binoʼob táanxel tuʼuxoʼ, toʼon xaneʼ yéetel u yáantaj Jéeobaeʼ kex bukaʼaj nojchil k-problemaʼobeʼ jeʼel k-pʼatik paachileʼ (Mateo 17:20).

U tsʼoʼokbal. Ka tsʼaʼab u diploma le j-xoknáaloʼoboʼ, juntúul tiʼ letiʼobeʼ tu xokaj junpʼéel carta tuʼux ku tsʼáaikoʼob u diosboʼotikil úuchik u binoʼob tu escuelail Galaadoʼ. Le sukuʼun Herdoʼ tu yaʼalaj tu tsʼoʼokbaleʼ u líiʼsik máak tu puksiʼikʼal le bix u tuukul Diosoʼ bey jeʼex ka baʼajak clavos teʼ durmienteʼob, wa cheʼob, ku tsʼaʼabal tu yáanal u rielil le trenoʼ. Kʼaʼabéet u baʼabaxaʼal utiaʼal ka béeyak u machikuba tubeel. Bey túunoʼ le j-xoknáaloʼoboʼ kʼaʼabéet u seguer u máanskoʼob tu tuukuloʼob le baʼax tu kanoʼoboʼ. Le sukuʼunoʼ tu yaʼalaj: «Jóoʼseʼex u súutukil utiaʼal a baʼabaxkeʼex ta puksiʼikʼaleʼex le baʼax tsʼoʼok a kankeʼexoʼ». Tu tsʼookeʼ tu yaʼalaj: «Wa ka tuukuleʼex jeʼex Jéeobaeʼ, yaan a kʼamkeʼex yaʼab bendicionoʼob».