Le sábado 14 tiʼ marzo tiʼ 2015, beetaʼab junpʼéel muchʼtáambal utiaʼal u tsʼoʼoksaʼal le xook 138 tiʼ le Escuela Bíblica tiʼ Galaadoʼ. Lelaʼ beetaʼab teʼ Centro Educativo tiʼ le Watchtower yaan tu kaajil Pattersonoʼ (Nueva York). Maas tiʼ 14,000 máakoʼob, tak le máaxoʼob táanxel tuʼux yanoʼoboʼ, béeychaj u yilkoʼob yéetel u yuʼubikoʼob le programaoʼ. Tu káajbaleʼ tsʼaʼab u paaxil kanpʼéel túumben kʼaayoʼob, le kun kʼaybiloʼob kaʼach teʼ muchʼtáambaloʼ. a

Geoffrey Jackson, máax yaan ichil le Cuerpo Gobernante tiʼ u j-jaajkunajoʼob Jéeobaoʼ, letiʼ nuʼukt le muchʼtáambaloʼ. Tu káajbaleʼ tu yaʼalaj tiʼ le j-xoknáaloʼob maʼ unaj u taʼakikoʼob le baʼaxoʼob tu kanoʼoboʼ, baʼaxeʼ kʼaʼabéet u meyajtiʼob utiaʼal u yáantkoʼob uláakʼ máakoʼob (2 Timoteo 2:2).

Le sukuʼun Jacksonoʼ tʼaanaj yoʼolal Moisés. Tiʼ junpʼéel tiempoeʼ u pasel Moiseseʼ meyajnaj utiaʼal u muchʼkuba le israelitaʼob u adorartoʼob Diosoʼ. Baʼaleʼ desde ka tsʼoʼoksaʼab le tabernaculooʼ xuʼul u muchʼkubaʼob teʼ paseloʼ. Maʼ xaaneʼ Moiseseʼ maʼ tu chaʼabal u yokol teʼ Sen Kiliʼich Kúuchiloʼ, u cuartoil le tabernáculo tuʼux ku yokol chéen u maas nojchil le sacerdoteʼoboʼ. Kex beyoʼ le Bibliaoʼ maʼ tu yaʼalik wa kʼuuxilnaj yoʼolal lelaʼ, baʼaxeʼ ku yaʼalikeʼ hasta tu apoyartaj Aarón yéetel le meyaj tu beetaj bey u maas nojchil le sacerdoteʼoboʼ (Éxodo 33:​7-​11; 40:34, 35). ¿Baʼax k-kanik tiʼ lelaʼ? Le sukuʼun Jacksonoʼ tu yaʼalaj: «Yaabilteʼex le baʼax kʼubéentaʼabteʼexoʼ pero maʼ a taʼakikeʼex».

«¿Yaan wa a sajaktaleʼex chéen tu yoʼolal u juum u lúubul u leʼ cheʼ?» Bey u kʼaabaʼ le tsoltʼaan tu máansaj le sukuʼun Kenneth Flodin, máax ku yáantaj teʼ Comité tiʼ Enseñanza tiʼ le Cuerpo Gobernanteoʼ. Tu yaʼalaj tiʼ le j-xoknáaloʼoboʼ jeʼel u kʼuchul u kʼiinil u chʼaʼpachtaʼaloʼob, u talamtal u meyajoʼob wa u aktáantkoʼob uláakʼ baʼaloʼob jeʼel u beetik u sajaktaloʼobeʼ. Tsʼoʼoleʼ tu chʼaʼchiʼitaj Levítico 26:36 utiaʼal u yaʼaliktiʼob ka u yiloʼob chéen bey u leʼ cheʼ le baʼaxoʼob ken u aktáantoʼoboʼ. Ka tsʼoʼokeʼ tʼaanaj xan tiʼ apóstol Pablo, máax tu aguantartaj yaʼab baʼaloʼob úuchik u confiar tiʼ Jéeoba (2 Corintoiloʼob 1:​8, 10).

«¿Baʼax jóokʼeʼex a wileʼex?» Mark Sanderson, máax yaan ichil le Cuerpo Gobernanteoʼ, letiʼ máans le tsoltʼaan seguernajoʼ. Tʼaanaj tiʼ baʼax ku yaʼalik Proverbios 13:12: «Alab óolal maʼ tu béeytaleʼ puksiʼikʼal ku yaj óolal». Yaʼab máakoʼobeʼ ku yaatal u yóoloʼob ken u yiloʼob maʼ tu yantaltiʼob le taakʼin yéetel le fama úuch joʼopʼok u kaxtikoʼoboʼ.

Tu kʼiiniloʼob Jesuseʼ, jujuntúul máakoʼobeʼ yaanal baʼax ku páaʼtkoʼob yoʼolal Juan Bautista (Lucas 7:​24-​28). Maʼ xaaneʼ táan u páaʼtkoʼob kaʼach juntúul filósofo ku kaʼansik baʼaloʼob istikyaj u naʼataʼal. Wa beyoʼ jach lúub u yóoloʼob ka tu yiloʼobeʼ Juaneʼ juntaatsʼ tu kaʼansajtiʼob u jaajil yoʼolal u Tʼaan Dios. Uláakʼoʼobeʼ maʼ xaaneʼ tu tukloʼobeʼ yaan u yilkoʼob juntúul máak u búukintmaj koʼokoj nookʼoʼob, pero Juaneʼ u nookʼ óotsil tu búukintaj. Baʼaleʼ le máaxoʼob u kʼáat u yiloʼob kaʼach juntúul profetaeʼ maʼ lúub u yóoloʼobiʼ, tumen Juaneʼ maʼ chéen jeʼel máaxak profetaileʼ; letiʼ preparart le bej utiaʼal Jesusoʼ (Juan 1:​29).

Yéetel le tsikbalaʼ le sukuʼun Sandersonoʼ tu yaʼalaj tiʼ le j-xoknáaloʼob kʼaʼabéet u yantaltiʼob junpʼéel maʼalob tuukul. Tu lugar u páaʼtkoʼob ka nojbaʼalkúuntaʼakoʼob yéetel ka tratartaʼakoʼob bey minaʼan uláakʼ máakoʼob jeʼex letiʼobeʼ, unaj u yáantkoʼob le sukuʼunoʼob yéetel u kaʼanskoʼobtiʼob le baʼaxoʼob tu kaʼanoʼob tu xookil Galaad utiaʼal u muʼukʼaʼankúuntikoʼob u fejoʼob yéetel u yeʼeskoʼob yaabilaj tiʼob. «Meyajteʼex a sukuʼuneʼex yéetel kabal óolal, tsʼáa a wóol a beeteʼex baʼax u kʼáat Jéeoba, beyoʼ mix bikʼin kun lúubul a wóoleʼex», tu yaʼalaj sukuʼun Sanderson.

«Tséenteʼex máaxoʼob wiʼijoʼob.» Bey u kʼaabaʼ le tsoltʼaan tu máansaj sukuʼun James Cauthon, juntúul u maestroil Galaad. Le sukuʼunaʼ tu yaʼaleʼ máakeʼ ku yuʼubik u kʼaʼanaʼanil u yaabiltaʼal. Tak Jesús bey tu yuʼubilubaoʼ, le oʼolal Jéeobaeʼ tu yaʼalajtiʼ bukaʼaj u yaabiltmaj le ka okjaʼanajoʼ (Mateo 3:​16, 17).

Jéeobaeʼ u tsʼaamajtoʼon u páajtalil k-líiʼsik u yóol u maasil yéetel baʼax k-aʼalik, yéetel bey u páaʼtik ka k-beetoʼ (Proverbios 3:​27). «Tsʼáa a wóol a wileʼex le baʼaloʼob maʼalobtak ku beetik uláakʼ máakoʼoboʼ yéetel aʼaleʼextiʼob», tu yaʼalaj sukuʼun Cauthon. Wa yéetel u jaajil a wóoleʼex ka waʼalikeʼextiʼobeʼ, yaan u tsʼáaikoʼob cuenta jach maʼalob ka seguernak u tsʼáaik u yóol u beetoʼob baʼax maʼalob.

«Tsʼáaʼex tak u tsʼook chʼáaj.» Mark Noumair, máax ku yáantaj teʼ Comité tiʼ Enseñanzaoʼ, letiʼ máans le tsoltʼaan seguernajoʼ. Tʼaanaj tiʼ apóstol Pablo utiaʼal u yaʼalik tiʼ le j-xoknáaloʼoboʼ maʼ unaj u beetkoʼob jach chéen le ku kʼáataʼaltiʼoboʼ. Baʼaxeʼ jeʼex tu beetil apóstol Pabloeʼ unaj u beetkoʼob tak u tsʼook baʼax yaan tu kʼaboʼob utiaʼal u yáantkoʼob u maasil (Filiposiloʼob 2:​17, 18).

Pabloeʼ kex yaʼab baʼaxoʼob tu aktáanteʼ maʼ tu pʼatubaiʼ. Como tu tsʼáaj tak u tsʼook chʼáajeʼ —​u kʼáat u yaʼaleʼ tu beetaj tuláakal baʼax anchaj tu kʼab tak ka kíimoʼ​—, béeychaj u yaʼalik: «Tsʼoʼok in wáalkabtik le bej tak tu xuuloʼ» (2 Timoteo 4:​6, 7). Sukuʼun Noumaireʼ tu yaʼalaj tiʼ le j-xoknáaloʼob ka u tsʼáa u yóol u meyajtoʼob le Reino jeʼel tuʼuxak ka xiʼikoʼob jeʼex tu beetil apóstol Pablooʼ.

Baʼax úuch tiʼ le j-xoknáaloʼoboʼ. Michael Burnett, uláakʼ juntúul u maestroil Galaadeʼ, letiʼ máans le uláakʼ junpʼéel tsoltʼaanoʼ. Jujuntúul j-xoknáaloʼobeʼ máan xan u yeʼesoʼob baʼax úuchtiʼob le ka jóokʼoʼob kʼaʼaytaj le tiaʼanoʼob Pattersonoʼ.

Jeʼex suukileʼ jach maʼalob úuchik u bin tiʼ le j-xoknáaloʼoboʼ, tumen tu aprovechartoʼob tuláakal súutukil utiaʼal u kʼaʼaytajoʼob bey xan tumen tu tsikbaltoʼob baʼax ku yaʼalik le Biblia ichil le idioma ku kʼuchul tu puksiʼikʼal le máakoʼoboʼ: le idioma tu kanoʼob desde tu chichniloʼoboʼ. Por ejemploeʼ juntúul j-xoknáaleʼ tu yojéelteʼ yaʼab máax tʼanik español teʼ territorio tuʼux kun kʼaʼaytajoʼ. Le oʼolaleʼ táanil tiʼ u jóokʼoleʼ tu kanaj jujunpʼéel tʼaanoʼob ich español yéetel le aplicación JW Language. Jach teʼ kʼiinoʼ tu yilaj juntúul máak ku tʼanik español teʼ calleoʼ ka joʼopʼ u yaʼaliktiʼ le junpʼíit tʼaanoʼob tu kanoʼ. Bejlaʼeʼ le máakaʼ, bey xan kantúul u láakʼtsiloʼobeʼ, táan u tsʼaʼabal xook tiʼob yéetel le Bibliaoʼ.

Entrevistaʼob. Ka tsʼoʼokeʼ William Turner, máax ku yáantaj teʼ Comité tiʼ Servicio tiʼ le Cuerpo Gobernanteoʼ, tu entrevistartaj kantúul j-xoknáaloʼob. Tu kʼáatajtiʼob baʼax úuchtiʼob wa baʼax tu beetoʼob táanil tiʼ u kʼuchloʼob Galaad, yéetel bix tu yililoʼob le kaʼansaj tsʼaʼabtiʼoboʼ.

Le j-xoknáaloʼoboʼ tu yaʼaloʼob jujunpʼéel baʼaloʼob tiʼ le xook tsʼoʼok u taasik utsil tiʼoboʼ. Juntúuleʼ tu tsikbalteʼ yaʼab baʼax tsʼoʼok u kanik tiʼ Lucas, capítulo 10. Le 70 disipuloʼob túuxtaʼab tumen Jesús kʼaʼaytajoʼ kiʼimak u yóoloʼob ka suunajoʼob tumen jach bin utsil tiʼob. Kex kiʼimakchaj xan u yóol Jesuseʼ tu yaʼalajtiʼobeʼ le kiʼimak óolaloʼ maʼ unaj u taal chéen tiʼ u bin utsil tiʼobiʼ, baʼaxeʼ unaj u kiʼimaktal u yóoloʼob tumen Dioseʼ maʼalob u yilik le baʼax ku beetkoʼoboʼ. Lelaʼ ku yeʼesiktoʼoneʼ kex maʼalob u bintoʼon wa kex maʼeʼ unaj u kiʼimaktal k-óol, tumen maʼalob yaniloʼon tu táan Jéeoba.

Sukuʼun Turnereʼ tu chʼaʼchiʼitaj Filiposiloʼob 1:6 utiaʼal u yeʼesik tiʼ le j-xoknáaloʼoboʼ Jéeobaeʼ jach tu jaajil tsʼoʼok u yéeyikoʼob utiaʼal junpʼéel meyaj, yéetel maʼ tun pʼatbiloʼob.

«Chʼik a paakateʼex tiʼ Jéeoba.» Samuel Herd, máax yaan ichil le Cuerpo Gobernanteoʼ, letiʼ máans u noj tsoltʼaanil le muchʼtáambaloʼ. Tu yaʼaleʼ kex maʼ tu páajtal k-ilik Jéeobaeʼ jeʼel u páajtal k-chʼikik k-paakat tiʼeʼ. ¿Bix túuniʼ?

Jeʼel u páajtal «k-ilik» Jéeoba ken k-chaʼant le baʼaxoʼob u beetmoʼ, tumen le baʼaloʼobaʼ yaʼab baʼax ku yeʼesiktoʼon yoʼolal Jéeoba. Tsʼoʼoleʼ Jéeobaeʼ «tsʼoʼok u sáasilkuntik u yich [k-]puksiʼikʼaleʼex» (Efesoiloʼob 1:​18). Mientras maas k-xokik le Bibliaoʼ maas k-kaanbal yoʼolal Jéeoba, yéetel beyoʼ maas k-náatsʼal tu yiknal.

Maases letiʼe Evangelioʼob unaj k-xakʼaltikoʼ, tumen le baʼaxoʼob tu yaʼalaj yéetel tu beetaj Jesusoʼ ku yáantkoʼon k-ojéelt bix Jéeoba. Jesuseʼ jach maʼalob úuchik u chíikbesik u modos Jéeoba, le oʼolal béeychaj u yaʼalik: «Le máax tsʼoʼok u yilkeneʼ tsʼoʼok xan u yilik le Taataoʼ» (Juan 14:9).

Sukuʼun Herdeʼ tu yaʼalaj tiʼ le máaxoʼob muchʼukbaloʼoboʼ maʼ chéen unaj u «yilkoʼob» Jéeoba yoʼolal le baʼaxoʼob tu beetaj Jesusoʼ, baʼaxeʼ unaj u beetkoʼob xan le baʼax ku kankoʼoboʼ. Jeʼex Jesús tu tsʼáaj u yóol u «tséent» wa u kaʼans uláakʼ máakoʼobeʼ, toʼon xaneʼ unaj k-tsʼáaik k-óol k-kaʼans tiʼ u maasil le baʼaxoʼob tsʼoʼok k-kanikoʼ.

Wa k-chʼikik k-paakat tiʼ Jéeobaeʼ yaan u páajtal k-aʼalik jeʼex le salmista tu tsʼíibtaj: «Mantatsʼ kʼajaʼan tiʼ teen Yuumtsil [Jéeoba]; tu yoʼolal tiaʼan tin x-noʼoj kʼabeʼ, mix baʼal bíin u beet in lúubul» (Salmo 16:8).

U tsʼoʼokbal. Ka tsʼaʼab u diploma le j-xoknáaloʼoboʼ juntúul tiʼ letiʼobeʼ tu xokaj junpʼéel carta tuʼux ku tsʼáaikoʼob u diosboʼotikil úuchik u binoʼob tu escuelail Galaad. Ka tsʼoʼokeʼ sukuʼun Jacksoneʼ tu yaʼalaj tiʼ le j-xoknáaloʼoboʼ maʼ unaj u tuklikoʼob wa tuláakal le baʼaxoʼob ken u tsikbaltoʼob tiʼ le sukuʼunoʼoboʼ kʼaʼabéet túumbentak yéetel talam u naʼataʼaloʼob, tumen óoliʼ tuláakal le baʼaloʼobaʼ ojéelaʼan tumen le sukuʼunoʼoboʼ. Sukuʼun Jacksoneʼ tu yaʼalaj xan kʼaʼabéet u yeʼesik máak kabal óolal. Le j-xoknáaloʼoboʼ tu lugar u sen tʼaanoʼob tu yoʼolaloʼob yéetel tiʼ le baʼaxoʼob tu kanoʼob Galaadoʼ, maases unaj u tʼaanoʼob tiʼ le Biblia yéetel tiʼ le publicacionoʼob yaantoʼonoʼ. Tu lugar xan u lúuʼskoʼob u yóol le máaxoʼob maʼ xaan maʼ tun páajtal u binoʼob Galaadoʼ, unaj u yáantkoʼob utiaʼal u jóoʼskoʼob u yutsil le kaʼansaj jeʼel u páajtal u kʼamkoʼob tu kaajal Jéeobaoʼ. Ka tsʼoʼok le muchʼtáambaloʼ tuláakloʼob kiʼimak u yóoloʼob yéetel taak u yáantkoʼob tuláakal le sukuʼunoʼob yéetel kiikoʼoboʼ.